MATHAYO 17 - MBIVILIA ŨVOO MŨSEO

Kũalyũka kwa Mũvw'ano wa Yesũ

¹ Ĩtina wa matukũ thanthatũ, Yesũ nĩwaendie e na Vetelo, Yakovo na Yoana mwana-a-inyia wa Yakovo kĩĩmanĩ kĩtũlu vandũ me oka.

² Me vau, mũvw'ano wa Yesũ nĩwaalyũkile mamũsyaĩĩsye. Ũthyũ wake nĩwatisie ta syũa na ngũa syake syeeũva kw'ũ syakengakenga.

³ Nĩvo ĩndĩ Eliya na Mwose maumĩlile vau, na amanyĩw'a asu atatũ mamona maineena na Yesũ.

⁴ Vetelo nĩweeie Yesũ atĩĩ, “Mwĩai, nĩ ũndũ ũseo kwitũ ithyĩ kwĩthĩwa twĩ vaa. Eka twake tũsũmba tũtatũ: Kamwe kaku, kangĩ ka Mwose, na kangĩ ka Eliya.”

⁵ Vetelo aendee kũneena, ĩtu yaĩ yeũ kw'ũ nĩyesĩlile ĩũlũ woo yamavw'ĩka onthe, na wasya weew'ĩka wumĩte ĩtunĩ yĩu ũkwasya atĩĩ, “Ũũ nĩwe mwana wakwa mwendwa ũla nendeeaw'a nĩwe; mwĩthukĩĩsyei.”

⁶ Yĩla amanyĩw'a meewie wasya ũsu, nĩmatelemile mũno mavalũka nthĩ na ĩvu.

⁷ Yesũ nĩwaendie vala maĩ na amakiita aimea atĩĩ, “Ũkĩlai, ekai kũkĩa!”

⁸ Yĩla mookĩlilye metho, mayaaona mũndũ ũngĩ vau ate o Yesũ.

⁹ Yesũ na amanyĩw'a asu matheete kuma kĩĩmanĩ, nĩwameaĩie amea atĩĩ, “Mũikatavye mũndũ o na ũmwe ĩũlũ wa woni ũsu mwoona, kũvika yĩla nyie Mwana wa Mũndũ nĩthayũũka kuma kwa akw'ũ.”

¹⁰ Nĩvo ĩndĩ amanyĩw'a asu mamũkũlilye atĩĩ, “Nĩkĩ amanyĩsya ma Mĩao maasya kana Eliya akamba kũsyoka kũũ nthĩ Mũtangĩĩi atanoka?”

¹¹ Yesũ amasũngĩa amea atĩĩ, “Eliya kwa w'o akamba kũka nĩ kana ombany'e maũndũ onthe.

¹² Ĩndĩ ekai nĩmũtavye, Eliya nĩwookie na andũ mayaamanya nĩwe ũũ, ĩndĩ mamwĩka o ũndũ mo ene mendie. Ũu now'o methĩny'a Mwana wa Mũndũ o nake.”

¹³ Nĩvo ĩndĩ amanyĩw'a asu maeleiwe kana ematavasya ĩũlũ wa Yoana Mũvatisi na ti Eliya.

Yesũ Aivosya Kamwana Kalikĩtwe nĩ Ĩimũ

¹⁴ Yĩla Yesũ na amanyĩw'a asu make masyokie vala ve ĩkomano, mũndũ ũmwe nĩwookie vala ũĩ na atulya ndu mbee wake aimwĩa atĩĩ,

¹⁵ “Mwĩai, ĩw'ĩa kamwana kakwa tei; kawaĩte mũng'athũko na kethĩna mũno, nũndũ mavinda amwe nĩkavalũkaa mwakinĩ kana kakavalũka kĩw'ũnĩ.

¹⁶ Nĩkaetie vala ve amanyĩw'a maku, ĩndĩ maemwa nĩ kũkavosya.”

¹⁷ Yesũ nĩwameie atĩĩ, “Inyw'ĩ andũ mũte na mũĩkĩĩo na aemu! Naĩlĩte kwĩkala nenyu ĩvinda yĩana ata? Nĩũmĩanĩsya nenyu nginya ĩndĩĩ? Ndeteei kamwana kau vaa.”

¹⁸ Yesũ nĩweeaĩie ĩimũ yĩu yalikĩte kamwananĩ yume, na yauma, na vau kwa vau kamwana kavoa.

¹⁹ Nĩvo ĩndĩ amanyĩw'a maendie vala ve Yesũ me oka, mamũkũlya atĩĩ, “Nĩkĩ ithyĩ tũtanatonya kũlũngya ĩimũ yĩu?”

²⁰ Nake amasũngĩa amea atĩĩ, “Nũndũ mũĩkĩĩo wenyu nĩ mũnini vyũ. Nĩmũtavya w'o, kethĩwa mwĩ na mũĩkĩĩo wĩana o mbeke ĩla niini vyũ ya mũtĩ, nĩkwĩa kĩĩma kĩya, ‘Thama vau ũthi vaya,’ na kĩithama. Vai ũndũ o na ũmwe ũmũema. [

²¹ No kwa kũvoya na kũtĩĩa kũya mũtonya kũlũngya ĩimũ ya mũthemba ũsu.”]

Yesũ Aineena ĩngĩ ĩũlũ wa Kĩkw'ũ kyake

²² Yĩla amanyĩw'a onthe moombanie vamwe Kalilii, Yesũ nĩwameie atĩĩ, “Mwana wa Mũndũ nũkũthi kũnenganwe ũtonyinĩ wa andũ,

²³ na maimũaa, ĩndĩ akathayũũka ĩtina wa mĩthenya ĩtatũ.” Ndeto isu nĩsyatumie amanyĩw'a makwatwa nĩ kĩmako mũno.

Yesũ Aineena ĩũlũ wa Kũĩva Koti wa Ĩkalũ

²⁴ Yesũ na amanyĩw'a make nĩmaendie Kavelinaũmu. Me kũu, andũ ala moombanasya koti ũla watũmĩawa mavatanĩ ma Ĩkalũ, nĩmookie vala ve Vetelo mamũkũlya atĩĩ, “Mũmanyĩsya wenyu we nũĩvaa koti wa Ĩkalũ?”

²⁵ Nake amasũngĩa atĩĩ, “Ĩĩ, nũĩvaa.” Yĩla Vetelo walikile nyũmba, atanamba kũneena, Yesũ nĩwamũkũlilye atĩĩ, “Simioni, kwandavye we wĩona ata? Naaũ ala maumĩasya asumbĩ ma nthĩ ĩelo kana koti? Nĩ ene nthĩ kana nĩ aeni ala me ungu wa ũsumbĩ woo?”

²⁶ Vetelo amũsũngĩa atĩĩ, “Nĩ aeni.” Yesũ amwĩa atĩĩ, “Kwoou ĩndĩ, ene nthĩ me na ũthasyo wa kũlea kũĩva koti.

²⁷ Ĩndĩ nĩ kana tũikew'ĩthye andũ aa woo, enda ĩianĩ ũkalikye ndoano. Ĩkũyũ yĩla ũũkwatya mbee, yose na waathamũkany'a kanyw'a wayo, nũkwĩthĩa mbesa itonya kũĩva koti wa Ĩkalũ wa andũ elĩ. Osa ũthi ũkamaĩve koti wakwa na waku.”