MALIKO 16 - MBIVILIA ŨVOO MŨSEO

Kũthayũũka kwa Yesũ

¹ Ĩtina wa mũthenya wa Savato kũthela, Meli Makitalene, Salome na Meli inyia wa Yakovo, nĩmathooie mauta meũnyunga nesa makavake mwĩĩ wa Yesũ.

² Nĩmaendie mbũanĩ Wakyumwa kĩoko tene syũa yĩyuma.

³ Me nzĩanĩ nĩmakũlanasya atĩĩ, “W'o twĩthi kũvetangĩwa ĩvia mũomonĩ wa mbũa nũũ?”

⁴ Ĩndĩ yĩla masiisye nĩmoonie ĩvia yĩu yĩĩvete, nayo yaĩ ĩnene mũno.

⁵ Malika mbũanĩ, nĩmoonie mwanake weekĩĩte ngũa nzaũ ndaasa ailyĩ nthĩ ngalĩko ya kw'oko kwa aũme. Namo matelema mũno.

⁶ Mwanake ũsu nĩwameie atĩĩ, “Ekai kũseng'a, nĩnĩsĩ mwĩmantha Yesũ wa Nasaleti ũla ũnambiwe. Nde vaa, nũthayũũkie! Kwa sisyai, vaa nĩvo manamwiĩte.

⁷ Endai yu mũkamatavye amanyĩw'a make, na mũno mũno Vetelo, mũmee kana Yesũ nũkũthi mũkamwĩthĩae avikie Kalilii. Kũu nĩmũũthi kũmwona o tondũ wamũtavĩtye.”

⁸ Nĩmaumie mbũanĩ mĩtũkĩ na masemba, nũndũ nĩmathĩlĩĩte nĩ w'ĩa na nĩmaseng'ete. Mayaatavya mũndũ ũndũ ũsu nũndũ nĩmatelemete. [

Yesũ Aimumĩlĩĩla Meli Makitalene

⁹ Yesũ amina kũthayũũka kuma kwa akw'ũ kwakya kĩoko tene, mũthenya wa mbee wa kyumwa, nĩwambie kũmumĩlĩĩla Meli Makitalene, ũla navu mbeenĩ wamumĩtye maimũ mũonza.

¹⁰ Meli nĩwaendie na amatavya ala mekalanasya na Yesũ. Nĩwamethĩie makĩĩa me na kĩmako.

¹¹ Yĩla meewie kana Yesũ e thayũ na nĩwonekie nĩ Meli, nĩmaleile kwĩtĩkĩla ndeto isu.

Maumĩla Angĩ ma Yesũ

¹² Ĩtina wa ũu, Yesũ e na mũvw'ano ũngĩ, nĩwamaumĩlĩĩle amanyĩw'a make elĩ maendete ndũanĩ.

¹³ Namo masyoka na mamatavya ala angĩ, ĩndĩ mayaaĩtĩkĩla ndeto syoo.

¹⁴ Mũthya vyũ, nĩwamaumĩlĩĩle amanyĩw'a onthe me ĩkũmi na ũmwe makĩya lĩu. Nĩwamatetisye nũndũ wa wũmũ wa ngoo syoo, na kũlea kwĩtĩkĩla ndeto sya ala mamwonete athayũũka.

¹⁵ Nĩvo ĩndĩ wameie atĩĩ, “Endai nthĩ yonthe mũkatavany'e Ũvoo Mũseo kwa andũ onthe.

¹⁶ O ũla ũketĩkĩla na aivatiswa, ũsu akatangĩĩwa, ĩndĩ ũla ũtaketĩkĩla ũsu akasilĩlwa.

¹⁷ Andũ ala maketĩkĩla makeethĩwa matonya kwĩka maũndũ aa: Makalũngasya maimũ maitũmĩa ĩsyĩtwa yakwa, na makaneenaa na ithyomo ngeni.

¹⁸ O ta ũu, makakwata nzoka na moko, na manyw'a kĩndũ kĩ sumu kĩikamathũkya. Makailĩĩla andũ awau moko na makavoa.”

Yesũ Ayambata Ĩtunĩ

¹⁹ Yesũ amina kũneena na amanyĩw'a make, nĩwambatie ĩtunĩ na ekala nthĩ ngalĩko ya kw'oko kwa aũme kwa Ngai.

²⁰ Nĩvo ĩndĩ amanyĩw'a make maendie maitavany'a Ũvoo Mũseo kĩla vandũ, na Mwĩai atethya wĩa vamwe namo, na oonany'a kana ũtavany'a woo nĩ wa w'o kwa syama ila meekaa.]