MALIKO 14 - MBIVILIA ŨVOO MŨSEO

Atongoi ma Ayuti Maimũsamĩa Yesũ Mamũae

¹ Vatiele mĩthenya ĩlĩ mũthenya wa Mboka ya Vasaka na wa Mĩkate ĩte Mbota ũvike, athembi anene na amanyĩsya ma Mĩao nĩmamanthaa ũndũ matonya kũmũkwata Yesũ kwa ũseleke na kũmũtw'ĩĩa kũawa.

² Nĩmaneenanisye masya atĩĩ, “Tũikeke ũu mũthenya wa mboka, andũ maikese kũkĩlya ituu.”

Yesũ Ayĩtĩkĩw'a Mauta e Mbethani

³ Ĩvinda yĩmwe Yesũ nĩwaendie Mbethani mũsyĩ kwa Simioni ũla navu ĩtina wawaĩte mangũ. Aendee na kũathĩw'a, mũndũ mũka ũmwe nĩwookie akuĩte sũva ũseũvĩtw'e na ĩvia yĩtawa alambasita, wusũĩte mauta me mũuke mũseo na ma mbesa mbingĩ metawa nando. Nĩwaũkunũie na etĩkĩsya Yesũ mauta asu onthe mũtwe.

⁴ Andũ amwe maĩ vau nĩmathatie mũno na makũlany'a atĩĩ, “Yu wanango ũũ wa mauta nĩ wakĩ?

⁵ Mauta aa meĩ matewa mbee wa ndinalĩ maana atatũ na iinengwa ngya.” Nĩmambĩĩie kũtavya mũndũ mũka ũsu ndeto nthũku.

⁶ Ĩndĩ Yesũ nĩwameie atĩĩ, “Ekanai nake; mwĩmũthĩnĩsya kĩ? Ambĩka nesa mũno.

⁷ Mũkekalaa na ngya mavinda onthe, na no mũitethasye o yĩla mũkwenda, ĩndĩ nyie ndyĩkalaa nenyu mavinda onthe.

⁸ Mũndũ mũka ũũ eeka ũndũ ũtonya. Etĩkĩsya mwĩĩ wakwa mauta awũmbany'e kwondũ wa mathiko makwa.

⁹ Nĩmũtavya w'o, kũndũ kw'onthe ĩũlũ wa nthĩ kũla Ũvoo Mũseo ũkatavanw'a, o naw'o ũndũ ũũ mũndũ mũka ũũ weeka, ũkawetawa nĩ kana andũ mamũlilikanae.”

Yutasi Ayĩtĩkĩla Kũmũthoosya Yesũ kwa Amaitha

¹⁰ Nĩvo ĩndĩ Yutasi Ĩsikalioti, nake nĩ ũmwe wa ala amanyĩw'a ĩkũmi na elĩ, waendie kwa athembi anene nĩ kana athoosye Yesũ kũla maĩ.

¹¹ Namo meew'a ũu matana na mamwatha kũmũnenga mbesa. Kuma vau Yutasi nĩwambĩĩie kũmantha mwanya mũseo wa kũmũthoosya Yesũ kũla maĩ.

Yesũ Aiya Mboka ya Vasaka na Amanyĩw'a Make

¹² Mũthenyanĩ wa mbee wa Mboka ya Mũkate ũte Mbota, na now'o mũthenya ũla Ayuti mathĩnzaa kalondu ka Mboka ya Vasaka, amanyĩw'a ma Yesũ nĩmamũkũlilye atĩĩ, “Wĩenda tũkaũseũvĩsye Mboka ya Vasaka va?”

¹³ Nake atũma elĩ moo amea atĩĩ, “Endai mũsyĩnĩ mũnene wa Yelũsalemu, na nĩmũũkomana na mũndũ-ũme akuĩte kĩw'ũ na kĩkuu. Mũatĩĩei,

¹⁴ na nyũmba ĩla ũkũthi kũlika mũyĩa mwene wayo atĩĩ, ‘Mũmanyĩsya aũkũlya: Ĩĩva nyũmba ĩla nyie na amanyĩw'a makwa tũkũĩĩa Mboka ya Vasaka?’

¹⁵ Nũkũmwony'a nyũmba nene yĩ ngolovanĩ na nzeũvye yĩna kĩla kĩndũ; seũvĩsyai vau.”

¹⁶ Amanyĩw'a asu nĩmaumaalile mathi mũsyĩnĩ mũnene wa Yelũsalemu na meethĩa kĩla kĩndũ kĩilyĩ o ũndũ Yesũ wamatavĩtye, na maseũvya Mboka ya Vasaka.

¹⁷ Kwavika wĩoo, Yesũ nĩwookanisye na amanyĩw'a make me ĩkũmi na elĩ.

¹⁸ Maendee na kũathĩw'a, Yesũ nĩwameie atĩĩ, “Ekai nĩmũtavye, ũmwe wenyu tũũya ĩmwe vaa, nũkũnthoosya kũla kwĩ amaitha.”

¹⁹ Amanyĩw'a nĩmeewie woo na mambĩĩa kũmũkũlya ũmwe kwa ũmwe, “No kwĩthĩwa ne inyie?”

²⁰ Nake amea atĩĩ, “Nĩ ũmwe wenyu mwĩ ĩkũmi na elĩ, na ũkũvokanĩa nakwa ĩsaaninĩ yĩmwe.

²¹ Kwa w'o Mwana wa Mũndũ ekw'a o kwĩanana na ũndũ Maandĩko Matheu maĩtye, ĩndĩ kyeva nĩ kwa mũndũ ũsu ũkũmũthoosya Mwana wa Mũndũ kwa amaitha. Nĩ kavaa kethĩwa mũndũ ũsu ndaasyawa.”

Mboka ya Mwĩai

²² Maendee na kũathĩw'a, Yesũ nĩwoosie mũkate na atũnga mũvea kwa Ngai; nĩwaũtilangile na aũnenga amanyĩw'a make ayasya atĩĩ, “Kwatai mũye, ũũ nĩ mwĩĩ wakwa.”

²³ O ta ũu nĩwoosie kĩkombe kĩ ndivai, atũnga mũvea kwa Ngai na amanenga onthe manyw'a.

²⁴ Nĩwameie atĩĩ, “Ĩĩ nĩ nthakame yakwa ya ũtianĩo mweũ, ĩla ĩkwĩtĩkw'a kwondũ wa andũ aingĩ.

²⁵ Nĩmũtavya w'o, ndikanyw'a ĩngĩ ndivai ĩno kũvika mũthenya ũla nganyw'a ndivai nzaũ ũsumbĩnĩ wa Ngai.”

²⁶ Nĩvo ĩndĩ mainie wathi na maumaala mathi Kĩĩmanĩ kya Mĩthata.

Yesũ Aiweta kana Vetelo Nũkwĩsa Kũmũkaĩa

²⁷ Yesũ nĩweeie amanyĩw'a make atĩĩ, “Inyw'onthe nĩmũũndia mũthi, nũndũ nĩkũandĩkĩtwe Maandĩkonĩ Matheu: ‘Ngai akooaa mũĩthi na malondu mainyaĩĩkĩa kĩthekanĩ.’

²⁸ Ĩndĩ ĩtina wa kũthayũũka kwakwa, ngaenda mũkambĩthĩae mbikie Kalilii.”

²⁹ Vetelo amwĩa atĩĩ, “O na ethĩwa ala angĩ nĩmeũkũtia mathi, nyie ndikaũtia o na ĩndĩĩ.”

³⁰ Nake Yesũ amwĩa atĩĩ, “Nĩkũtavya w'o, ũtukũ ũũ nzamba ĩtanamba kwasya ya kelĩ, nũũkaĩa katatũ wasye ndũmbĩsĩ.”

³¹ Vetelo amwĩa atĩĩ, “O na ethĩwa no nginya nĩkw'e vamwe naku, ndiasya kana ndikwĩsĩ.” Amanyĩw'a ala angĩ onthe nĩmaisye oou.

Yesũ Aivoya e Ngethisemani

³² Yesũ na amanyĩw'a make nĩmaendie vandũ vetawa Ngethisemani, na amea atĩĩ, “Ĩkalai vaa nambe kũvoya.”

³³ Nĩwaendanisye na Vetelo, Yakovo na Yoana, na akwatwa nĩ kĩmako na kĩũũyũ kingĩ,

³⁴ na kwoou amea atĩĩ, “Nĩna kĩmako kingĩ ngoonĩ yakwa, o na kĩĩw'a kũmbũaa; ĩkalai vaa na mũikakome.”

³⁵ Yesũ nĩwaendangie mbee vanini, eevalũkya nthĩ na avoya nĩ kana ĩvinda yĩu ya thĩna yĩmũvĩtũke ethĩwa nĩvatonyeka.

³⁶ Nĩwavoyie ayasya atĩĩ, “Nau, Asa, we nũtonya maũndũ onthe. Mbetangĩe kĩkombe kĩĩ kya mathĩna, ĩndĩ ndũkeke ũndũ ngwenda nyie, ĩka ũndũ ũkwenda we.”

³⁷ Yesũ nĩwasyokie vala ve ala amanyĩw'a atatũ na amethĩa makomete. Nĩwamũkũlilye Vetelo atĩĩ, “Simioni, ko ũkomie? O na ndwĩkala ĩsaa yĩmwe ũsalukĩtye?

³⁸ Ĩkalai mũsalukĩtye na mũivoya mũikalike matatwanĩ. Nĩmũkwenda kwĩka ũla waĩlu ĩndĩ mwĩ onzu.”

³⁹ Yesũ nĩwaendie ĩngĩ akavoye, na atũngĩlĩĩla o ĩla mboya.

⁴⁰ Nĩwasyokie ĩngĩ vala ve amanyĩw'a na amethĩa makomete, nũndũ maĩ na too mwingĩ, namo mayaamanya memwĩa ata.

⁴¹ Yĩla wasyokanĩisye ya katatũ nĩwamakũlilye atĩĩ, “O nayu nomũkomete na kũthũmũa? Nĩmweany'a ĩndĩ! Aaya, saa nĩwavika wa Mwana wa Mũndũ kũnenganwe ũtonyinĩ wa andũ athũku.

⁴² Ũkĩlai tũthi; mũndũ ũla ũkũnthoosya kwa amaitha nĩwavika.”

Kũkwatwa kwa Yesũ

⁴³ Yesũ o aendee na kũneena, Yutasi, ũmwe wa ala amanyĩw'a ĩkũmi na elĩ nĩwavikie. Ookanisye na andũ angĩ aingĩ makuĩte mbyũ na nzũma, matũmĩtwe nĩ athembi anene na amanyĩsya ma Mĩao na atumĩa.

⁴⁴ Yutasi ũla wamũthooisye Yesũ nĩwamatavĩtye akamea atĩĩ, “Mũndũ ũla ngũthi kũkethya na ngethi ya wendo, mũndũ nĩwe ũsu; mũkwatei mũmũtwae mũmũsungĩte mũno.”

⁴⁵ Mavika oou, Yutasi nĩwaendie ĩmwe kwa ĩmwe vala ve Yesũ na amwĩta, “Mũmanyĩsya!” Na amũkethya na ngethi ya wendo.

⁴⁶ Nĩvo ĩndĩ ala andũ mamwĩkũmbĩlile Yesũ na mamũkwata.

⁴⁷ Ĩndĩ ũmwe wa ala maũngeme vakuvĩ na Yesũ nĩwakũie ũvyũ wake na atema mũthũkũmi wa Mũthembi Mũnene, amũtila kũtũ.

⁴⁸ Nake Yesũ amakũlya atĩĩ, “Mwooka kũngwata mũkuĩte mbyũ na nzũma ko nĩ kĩng'endilĩ?

⁴⁹ Mbona kĩla mũthenya nĩnatindanasya nenyu ngĩmanyĩsya Ĩkalũnĩ na mũyaangwata? Ĩndĩ ekai yu Maandĩko Matheu meanĩw'e.”

⁵⁰ Nĩvo ĩndĩ amanyĩw'a make onthe masembie mamũtia.

⁵¹ No mwanake ũmwe wamũatĩĩie Yesũ, na eevotoete suka yoka mwĩĩnĩ wake. Andũ asu nĩmamũkwatie,

⁵² ĩndĩ eetithũkany'a, amatiĩa ĩla suka na asemba athi e mũthei.

Yesũ e Mbee wa Nzama

⁵³ Yesũ nĩwatwaiwe mũsyĩ kwa Mũthembi Mũnene, navo nĩvo athembi anene onthe, vamwe na atumĩa na amanyĩsya ma Mĩao, moombanĩĩte.

⁵⁴ Vetelo nĩwamumĩte Yesũ ĩtina ĩndĩ e kũasa. Yĩla wavikie kĩwanzanĩ kĩla kĩ nza kwa Mũthembi ũsu Mũnene nĩwekalile nthĩ ote mwaki na asikalĩ.

⁵⁵ Athembi anene na andũ ala angĩ ma nzama nĩmatatie kũmantha andũ matonya kũsikata Yesũ nĩ kana mamũtw'ĩĩe kũawa, ĩndĩ mayaaona mũndũ o na ũmwe.

⁵⁶ Andũ aingĩ nĩmaumisye ũkũsĩ wa ũvũngũ ĩũlũ wa Yesũ, ĩndĩ mokũsĩ moo mayaaosana.

⁵⁷ Nĩvo ĩndĩ andũ amwe maũngamie maumya ũkũsĩ wa ũvũngũ masya atĩĩ,

⁵⁸ “Nĩtũneewie mũndũ ũũ ayasya, ‘Ngaananga Ĩkalũ yĩĩ yakĩtwe nĩ andũ, na ĩtina wa mĩthenya ĩtatũ ndyaka yĩngĩ yĩtakĩtwe nĩ andũ.’ ”

⁵⁹ Ĩndĩ o vamwe na ũu, mokũsĩ moo mayaaosana.

⁶⁰ Nĩvo ĩndĩ Mũthembi Mũnene waũngamie e mbee woo na amũkũlya Yesũ atĩĩ, “We ndwĩ na ũndũ ũsũngĩa? Wĩĩw'a andũ aa mayasya ata ĩũlũ waku?”

⁶¹ Ĩndĩ Yesũ ndaatumũa. Mũthembi Mũnene nĩwamũkũlilye ĩngĩ, “We nue Klĩsto, Mwana wa Ngai ũla Mũathime?”

⁶² Yesũ amwĩa atĩĩ, “Ĩĩ ninyie, na inyw'ĩ mũkamwona Mwana wa Mũndũ ailyĩ nthĩ ngalĩko ya kw'oko kwa aũme kwa Ũla wĩ Ũtonyi, na ayũka kũũ nthĩ akuĩtwe nĩ mathweo ma ĩtunĩ.”

⁶³ Mũthembi Mũnene nĩwatembũie ngũa syake nĩ woo na asya atĩĩ, “Vai vata wa ngũsĩ ingĩ.

⁶⁴ Inyw'ĩ nĩmweew'a ayĩuma Ngai; mwĩtw'a ata?” Onthe nĩmamũtw'ĩĩie kana nũvĩtĩtye na aĩlĩtwe nĩ kũawa.

⁶⁵ Amwe nĩmambĩĩie kũmũtw'ĩlanga mata na kũmũmandũlanga mamwovete metho makĩmwĩa atĩĩ, “Tũtavye nũũ ũla wakũmandũla.” Namo asikalĩ mamwosa na mamũlumangya.

Vetelo Ayasya Ndamwĩsĩ Yesũ

⁶⁶ Vetelo e o naku thome, mwĩĩtu ũmwe mũthũkũmi wa Mũthembi Mũnene nĩwaendie vo,

⁶⁷ na yĩla wamwonie Vetelo ayota mwaki, amũketeea na amwĩa atĩĩ, “We ũnaĩ na Yesũ ũla wumĩte Nasaleti.”

⁶⁸ Ĩndĩ Vetelo akaĩa asya atĩĩ, “Ndyĩsĩ, o na ndiũmanya kĩla ũũneena,” na akwata nzĩa aumaala athi mũvĩanĩ, na vau kwa vau nzamba yasya.

⁶⁹ Ũla mwĩĩtu nĩwamwonie Vetelo ĩngĩ na atavya andũ ala maũngamĩte nake amea atĩĩ, “Mũndũ ũũ nĩ ũmwe wa andũ ala maneethĩawa na Yesũ.”

⁷⁰ Ĩndĩ Vetelo asya ĩngĩ ndamwĩsĩ. Ĩtina wa kavinda kanini ala andũ maũngeme vau nĩmeeie Vetelo atĩĩ, “Kwa w'o we wĩ ũmwe wa andũ asu maneethĩawa na Yesũ, nũndũ o naku wumĩte Kalilii.”

⁷¹ Ĩndĩ Vetelo nĩwambĩĩie kwĩyĩumanĩa na kwĩvĩta ayasya atĩĩ, “Nyie ndimwĩsĩ mũndũ ũsu mũũneena ĩũlũ wake!”

⁷² O vau kwa vau nzamba nĩyaisye ĩvinda ya kelĩ. Vetelo nĩwalilikanile ũndũ Yesũ wamũtavĩtye kana, “Nzamba ĩtanasya ĩvinda ya kelĩ nũũkaĩa katatũ wasye ndũmbĩsĩ,” na kwoou ambĩĩa kũĩa.