MALIKO 11 - MBIVILIA ŨVOO MŨSEO

Yesũ Ailika Yelũsalemu ta Mũsumbĩ

¹ Yesũ na amanyĩw'a make me vakuvĩ kũvika Yelũsalemu, nĩmavikie ndũanĩ yĩtawa Mbethivake na ĩngĩ yĩtawa Mbethani, vakuvĩ na Kĩĩma kya Mĩthata. Me vau Yesũ nĩwatũmie amanyĩw'a make elĩ

² amea atĩĩ, “Endai ndũanĩ ĩya yĩ mbee wenyu. Mwavika vo, nĩmũkwĩthĩa ndena ya ĩng'oi ĩtaakua mũndũ yovetwe mũtĩnĩ. Mĩthasyei na mũimĩete vaa.

³ Mwakũlw'a nĩ mũndũ, ‘Mwĩmĩthasya yakĩ?’ Mũtavyei, ‘Mwĩai e na vata nayo na nũkũmĩtũnga o mĩtũkĩ.’ ”

⁴ Nĩvo ĩndĩ maendie na meethĩa ndena ya ĩng'oi yovetwe nza, vakuvĩ na mũomo wa nyũmba ũla ũsyaĩtye ngalĩko ya nzĩanĩ nene. Maimĩthasya,

⁵ andũ maũngyĩ vau nĩmamakũlilye atĩĩ, “Mwĩthasya ndena ĩsu ya ĩng'oi yakĩ?”

⁶ Namo ala amanyĩw'a masũngĩa o tondũ Yesũ wamatavĩtye, na andũ asu mamaeka mathi.

⁷ Nĩmaetie ndena ĩsu vala ve Yesũ, na mailĩĩla ngũa syoo mũongo kwayo, na Yesũ atũla ĩũlũ yamũkua.

⁸ Andũ nĩmalanilye ngũa syoo nzĩanĩ, na angĩ nĩmatũlaa mbonge sya mĩtĩ makalany'a kũu nzĩanĩ.

⁹ Andũ ala maĩ mbee wake na ala mamumĩte ĩtina nĩmookĩlilye wasya mũnene mayasya atĩĩ, “Hosana! Nĩ mũathime ũla wũkĩte ĩsyĩtwanĩ ya Mwĩai.

¹⁰ Nĩ mũathime ũsumbĩ ũla wĩũka wa ũmae waitũ Ndeviti! Hosana ĩũlũ ĩtunĩ!”

¹¹ Yesũ nĩwalikile Yelũsalemu na athi Ĩkalũnĩ; nĩwasyaisye kĩla kĩndũ kũu kw'onthe, na nũndũ kwaĩ vakuvĩ kũtuka, aumaala athi Mbethani e na ala amanyĩw'a ĩkũmi na elĩ.

Yesũ Ayĩumanĩa Mũkũyũ Ũte na Ũsyao

¹² Ũnĩ ũsu maumĩte Mbethani, Yesũ nĩweew'aa nzaa.

¹³ E vaasa nĩwoonie mũkũyũ waĩ na matũ mathungu, na athi kũsisya kana wĩ na makũyũ aye. Yĩla wavikie vo, nĩweethĩie ndwĩ na ũsyao ĩndĩ no matũ mathei, nũndũ yĩyaĩ ĩvinda ya mĩkũyũ kwĩthĩwa na ũsyao.

¹⁴ Yesũ nĩweeie mũkũyũ ũsu atĩĩ, “Ndũkaasyaa ĩngĩ ĩkũyũ o na yĩmwe yĩĩwa nĩ mũndũ!” Amanyĩw'a make nĩmeewie aineena ndeto isu.

Yesũ Ailũngya Andũ Mathooeasya Syĩndũ Ĩkalũnĩ

¹⁵ Yĩla mavikie Yelũsalemu, Yesũ nĩwalikile Ĩkalũnĩ na ambĩĩa kũlũngya andũ onthe ala mathooasya na ala mathooaa syĩndũ vo. Nĩwang'uthũlangile mesa sya ala mavunzasya mbesa na ivĩla sya ala mathooasya ndumbũ.

¹⁶ Ndaaĩtĩkĩlya mũndũ o na ũmwe avĩtĩlye kĩndũ vau Ĩkalũnĩ.

¹⁷ Nĩvo ĩndĩ wamanyĩisye andũ amea atĩĩ, “Maandĩkonĩ Matheu Ngai nũneenete akasya, ‘Nyũmba yakwa nĩ nyũmba ya kũvoyeawa nĩ andũ ma mbaĩ syonthe.’ Ĩndĩ mũmĩtw'ĩkĩthĩtye vandũ va kwĩvithaa avutani.”

¹⁸ Athembi anene na amanyĩsya ma Mĩao nĩmeewie ũvoo ũsu, na mambĩĩa kũmantha nzĩa ya kũmũaa Yesũ nũndũ nĩmamũkĩaa, nĩkwĩthĩwa kĩla mũndũ nĩwaseng'etw'e nĩ momanyĩsyo make.

¹⁹ Syũa yĩ vakuvĩ kũthũa, Yesũ na amanyĩw'a make nĩmaumie mũsyĩnĩ ũsu wa Yelũsalemu mathi.

Ũmanyĩsyo kuma Mũkũyũnĩ

²⁰ Kwakya kĩoko tene Yesũ na amanyĩw'a make maendete na nzĩa, nĩmoonie ũla mũkũyũ wĩ mũmũ, o na kũvikĩa ũkoma mĩi.

²¹ Vetelo nĩwalilikanile ũndũ Yesũ waneenete ĩũlũ wa mũkũyũ ũsu na amwĩa atĩĩ, “Mũmanyĩsya, sisya ũla mũkũyũ ũnaumanĩie nĩwũmie.”

²² Yesũ nĩwamasũngĩie amea atĩĩ, “Mũĩkĩĩei Ngai.

²³ Nĩmũtavya w'o, o ũla ũkatavya kĩĩma kĩĩ, ‘Kũka vau wĩyĩkye ũkanganĩ,’ na aiĩkĩĩa ate na nzika ngoonĩ yake kana ũu wasya nũkwĩthĩwa, ndeto syake ikeanĩw'a.

²⁴ Kwa kĩtumi kĩu, nĩmũtavya kana yĩla mwavoya na mweetya Ngai kĩndũ, ĩkĩĩai kana nĩmwakwata na nũkũmũnenga.

²⁵ Na yĩla mwaũngama mũvoye, ekeai kĩla mũndũ ũla mwĩ na ũndũ nake, nĩ kana o nake Ĩthe wenyu ũla wĩ ĩtunĩ amũekee naĩ syenyu. [

²⁶ Ĩndĩ mwalea kũekea andũ ala angĩ mavĩtyo moo, o nake ĩthe wenyu ũla wĩ ĩtunĩ ndakamũekea mavĩtyo menyu.”]

Yesũ Aikũlw'a vala Wumĩtye Ũkũmũ Wake

²⁷ Yesũ na amanyĩw'a make nĩmavikie ĩngĩ Yelũsalemu, na aitembeanga Ĩkalũnĩ, athembi anene na amanyĩsya ma Mĩao na atumĩa nĩmaendie vala ũĩ,

²⁸ na mamũkũlya atĩĩ, “Wĩĩka maũndũ aa na ũkũmũ mwaũ, na nũũ ũla ũkũnengete ũkũmũ ũsu wa kũmeka?”

²⁹ Yesũ nĩwamasũngĩie amea atĩĩ, “Nĩngũmũkũlya ĩkũlyo o yĩmwe, na mwanzũngĩa nĩngũmũtavya nĩĩka maũndũ aa na ũkũmũ mwaũ.

³⁰ Kwa ndavyei, Yoana anengetwe ũkũmũ wa kũvatisa nĩ andũ kana anengetwe nĩ Ngai?”

³¹ Namo mambĩĩa kũoany'a maikũlany'a atĩĩ, “Twĩasya ata? Twasya, ‘Anengetwe nĩ Ngai,’ etũkũlya, ‘Nĩkĩ ĩndĩ mũtaaĩtĩkĩla ũvoo wa Yoana?’

³² Na tũitonya kwasya, ‘Anengetwe nĩ andũ.’ ” (Nĩmakĩaa andũ nũndũ andũ onthe nĩmeesĩ kana Yoana aĩ mwathani).

³³ Kwoou mamwĩa atĩĩ, “Tũyĩsĩ.” Nake Yesũ amea, “O nakwa ndimũtavya nĩĩka maũndũ aa na ũkũmũ mwaũ.”