Luka 21 - MBIVILIA ŨVOO MŨSEO

Mũvothi wa Kĩveti Ndiwa

¹ Yesũ nĩwasyaĩĩisye andũ, na oona ũndũ andũ athwii meekĩaa mĩvothi yoo kĩnandũnĩ kya Ĩkalũ.

² O ta ũu nĩwoonie kĩveti kĩmwe ndiwa na kĩtaĩ kĩndũ kyeekĩa tũsumunĩ twĩlĩ.

³ Nĩvo ĩndĩ waisye atĩĩ, “Nĩmũtavya w'o, kĩveti kĩĩ ndiwa na kĩte syĩndũ, nĩkyo kyaumya mbingĩ kũte andũ ala angĩ onthe.

⁴ Nũndũ andũ ala angĩ onthe meumasya nũndũ wa kwingĩvĩwa, ĩndĩ kyo o na kau nĩ ngya, kyaumya kyonthe kĩla kĩĩ kĩkwatya kwondũ wa mavata makyo onthe.”

Yesũ Ayathana Kwanangwa kwa Ĩkalũ

⁵ Amanyĩw'a amwe ma Yesũ nĩmaneenaa ĩũlũ wa Ĩkalũ, ũndũ yanakavĩtw'e nĩ mavia ala yakĩtwe namo, na mĩthĩnzĩo ĩla yaumĩw'e Ngai. Yesũ nĩwameie atĩĩ,

⁶ “Syĩndũ ii mũkwona, ve ĩvinda yũkĩte wĩthĩe vai ĩvia o na yĩmwe yĩkatiwa yĩ ĩũlũ wa yĩngĩ; syonthe ikaomboangwa vyũ.”

Mathĩna na Monyamao ala Mokĩte

⁷ Nĩvo ĩndĩ mamũkũlilye atĩĩ, “Mũmanyĩsya, maũndũ aa makeethĩwa ĩndĩĩ, na nĩ kyaũ kĩkwonany'a kana ĩvinda nĩ ĩviku maũndũ asu methĩwe?”

⁸ Yesũ amea atĩĩ, “Ĩkalai mwĩsũvĩĩte na mũiketĩkĩle mũndũ o na wĩva amũkenge. Andũ aingĩ makooka na ĩsyĩtwa yakwa mayasya, ‘Ninyie Klĩsto,’ na, ‘Ĩvinda nĩ ĩviku!’ Mũikatate kũmaatĩĩa.

⁹ Yĩla mwĩĩw'a ituu sya makaũ na ithokoo mũikaamake, nũndũ maũndũ asu no nginya meamba kwĩthĩwa, ĩndĩ maikethĩwa mayonany'a kana ĩvinda ya mũminũkĩlyo nĩ ĩviku.”

¹⁰ Nĩwaendeeie na kũmatavya amea atĩĩ, “Nthĩ ĩkakwatya kaũ na ĩngĩ, na ũsumbĩ ũkavithũkĩa ũngĩ.

¹¹ Kũkeethĩwa itetemo nthũku sya nthĩ, na kũkeethĩwa mayũa kũũ na kũũ na mowau mathũku mũno. O ta ũu kũkeethĩwa syĩndũ sya kũtelemya na mawonany'o manene yayayanĩ.

¹² Ĩndĩ maũndũ aa onthe matanamba kwĩthĩwa nĩmũkakwatwa na kũthĩnw'a. Mũkatwawa nyũmbanĩ sya Ayuti sya kũthaithĩa na kũmbanĩa mũkasilĩlwe na mũyovwa yela. O ta ũu nũndũ wa kwĩthĩwa mwĩ aatĩĩi makwa, mũkatwawa mbee wa makavana na asumbĩ.

¹³ Yĩu yĩkeethĩwa ĩvinda yenyu ya kwĩthĩwa mwĩ ngũsĩ.

¹⁴ Kwoou tw'ai ngoonĩ syenyu kana mũikambaa kũtinda mũisũanĩa ũndũ mũũthi kũneena,

¹⁵ nũndũ nyie ngamũnenga ũĩ wa kũmanya ndeto sya kũneena, ila amaitha menyu matakethĩwa matonya kwilea kana kwikananĩa.

¹⁶ O na nĩmũkathoow'a nĩ ana-a-inyia menyu, andũ ma mũsyĩ na anyanyae menyu; na amwe menyu nĩmakoawa.

¹⁷ Mũkamenwa nĩ kĩla mũndũ nũndũ wakwa.

¹⁸ Ĩndĩ vai ũsw'ĩĩ o na ũmwe wa mĩtwe yenyu ũkaa.

¹⁹ Kwa kũmĩĩsya kwenyu mũkakwata thayũ ũtathela.

Yesũ Ayathana Kwanangwa kwa Yelũsalemu

²⁰ “Yĩla mũkona Yelũsalemu yathyũlũlũkwa nĩ asikalĩ ma kaũ, mwĩmanya kana kwanangwa kwayo kwĩ vakuvĩ.

²¹ Andũ ala meĩthĩwa Yutia mekĩa mathi iĩmanĩ ĩũlũ. Ala makethĩwa Yelũsalemu nthĩnĩ meuma vo mathi. Namo andũ ala makethĩwa na ku motũinĩ, maikaatate kũthi Yelũsalemu.

²² Ĩsu ĩkeethĩwa yĩ mĩthenya ya ũĩvanĩsyo, nĩ kana maũndũ onthe ala mawetetwe Maandĩkonĩ Matheu meanĩe.

²³ Tei nĩ kwa aka ala makethĩwa me aito na ala makethĩwa mena twana tũnini tũkwonga! Kũkeethĩwa thĩna mwingĩ mũno ĩũlũ wa nthĩ, na ũthatu wa Ngai ũkatheea ĩũlũ wa andũ aa.

²⁴ Amwe moo makooawa na mbyũ, na angĩ maitavwa manyaĩĩkw'e nthĩ syonthe. Yelũsalemu nayo ĩkakinyangĩwa nthĩ nĩ Andũ-ma-mbaĩ-ingĩ, kũvika yĩla ĩvinda yoo yĩkathela.

Kũka Ĩngĩ kwa Mwana wa Mũndũ

²⁵ “Maũndũ ma kũseng'ya makeekĩka syũanĩ, mweinĩ, na ndatanĩ. Ĩũlũ wa nthĩ mbaĩ sya andũ ĩkeethĩwa mathĩnanĩ itesĩ ũndũ ikwĩka, nũndũ wa kĩlitũko kya ũkanga na kũkĩlany'a kwa itulumo.

²⁶ Andũ makatw'ĩka nda nĩ w'ĩa, meteelete kĩla kyũkĩte ĩũlũ wa nthĩ, nũndũ mavinya ma syĩndũ ila syĩ yayayanĩ makathingithangw'a.

²⁷ Nĩvo ĩndĩ makamwona Mwana wa Mũndũ okĩte e mathweonĩ, e na ũtonyi na ndaĩa nene.

²⁸ Mwoona maũndũ asu mambĩĩa kwĩkĩka, mwĩũngama na kũng'elela ĩũlũ, nũndũ wovosyo wenyu ũkeethĩwa wĩ vakuvĩ.”

Kwĩmanyĩsya kuma Mũkũyũnĩ

²⁹ Nĩvo ĩndĩ Yesũ wamatavisye ngelekany'o ĩno: “Kwa sũanĩai ĩũlũ wa mũkũyũ, o vamwe na mĩtĩ ĩla ĩngĩ yonthe.

³⁰ Yambĩlĩĩlya kũthongoosya matũ, nĩmũmanyaa kana ĩvinda ya mbua yĩ vakuvĩ.

³¹ No ta ũu, mwoona maũndũ asu mayĩkĩka, mwĩmanya kana ũsumbĩ wa Ngai wĩ vakuvĩ.

³² “Nĩmũtavya w'o, maũndũ aa makeekĩka andũ ala me thayũ yu tũĩ matanakw'a onthe makathela.

³³ Ĩtu na nthĩ ikathela, ĩndĩ ndeto syakwa ikekala tene na tene.

Vata wa Andũ Kwĩkala Meyũmbanĩtye

³⁴ “Ĩkalaai mwĩsũvĩĩte, ngoo syenyu iikakwatwe nĩ ũyi na ũnywi na mawĩmakĩo ma thayũ ũũ, naw'o Mũthenya ũsu ũimũkĩa kwa kĩthũlũmũko.

³⁵ Mũthenya ũsu ũkooka ta mũteo kwa andũ onthe ala me ĩũlũ wa nthĩ.

³⁶ Kwoou ĩkalaai mwĩyũmbanĩtye na kũvoyaa kĩla ĩvinda, mũnengwe kũsinda maũndũ asu onthe makekĩka, na kũũngama mbee wa Mwana wa Mũndũ.”

³⁷ Kĩla mũthenya ĩvindanĩ yĩu, Yesũ eethĩawa Ĩkalũnĩ akĩmanyĩsya andũ, ĩndĩ ĩa mawĩoo aendaa Kĩĩmanĩ kya Mĩthata kwĩkala vo.

³⁸ Kĩoko tene kĩla mũthenya, andũ onthe nĩmaendaa Ĩkalũnĩ kũmwĩthukĩĩsya.