Luka 19 - MBIVILIA ŨVOO MŨSEO

Yesũ na Sakayo

¹ Yesũ nĩwalikile ndũanĩ ya Yeliko ĩndĩ o avĩtĩte.

² Vaĩ mũndũ ũmwe ndũanĩ ĩsu weetawa Sakayo waĩ mumĩthya mũnene wa koti na waĩ mũthwii mũno.

³ Nĩwendaa kwona Yesũ amanye nĩwe ũũ, ĩndĩ ndaatonya kũmwona nũndũ wa wingĩ wa andũ, na kwongela aĩ mũkuvĩ mũno.

⁴ Kwoou nĩwasembie aendaa mbee na alĩsa mũkũyũnĩ nĩ kana atonye kũmwona Yesũ, nũndũ aĩ esĩle nzĩanĩ ĩsu.

⁵ Yĩla Yesũ wavikie vau, nĩwasyaisye ĩũlũ na amwĩa atĩĩ, “Sakayo, Uma mĩtũkĩ; ũmũnthĩ no nginya ndinde mũsyĩ kwaku.”

⁶ Sakayo nĩwaumie mũtĩnĩ mĩtũkĩ, athi amũthokya Yesũ e na ũtanu mwingĩ.

⁷ Yĩla andũ onthe moonie ũu, nĩmanyungunyĩisye mayasya atĩĩ, “Mũndũ ũũ athi kwĩthĩwa mũeni wa mũndũ mũvĩtany'a!”

⁸ Ĩndĩ Sakayo nĩwaũngamie na eea Mwĩai atĩĩ, “Ĩthukĩĩsye Mwĩai, nyie nĩngũnenga ngya nyusu ya ũthwii wakwa, na ethĩwa ve mũndũ naavena kĩndũ, nĩngũmũtũngĩa mavinda ana ma kĩndũ kĩu.”

⁹ Yesũ nĩwaisye atĩĩ, “Ũmũnthĩ ũtangĩĩo nĩwalika mũsyĩnĩ ũũ, nũndũ mũndũ ũũ o nake nĩ nzyawa ya Avalaamu.

¹⁰ Nĩkwĩthĩwa Mwana wa Mũndũ ookie kũmantha na kũtangĩĩa andũ ala au.”

Ngelekany'o ya Athũkũmi Manengiwe Mbesa sya Thaavu Matandĩthye

¹¹ Andũ o maendee na kwĩthukĩĩsya maũndũ asu, Yesũ nĩwamatavisye ngelekany'o. Aĩ vakuvĩ kũvika Yelũsalemu na andũ masũanĩaa kana ũsumbĩ wa Ngai nũkwambĩĩa o mĩtũkĩ.

¹² Nĩwameie atĩĩ, “Kwaĩ mũndũ ũmwe wa nyũmba ya kĩ-ũsumbĩ waendaa kyalo nthĩ yĩ kũasa, akatw'ĩkĩthw'e mũsumbĩ na aisyoka.

¹³ Atanamba kũthi, nĩweetie athũkũmi make ĩkũmi amanenga kĩla ũmwe mbesa sya thaavu na amea atĩĩ, ‘Tandĩthyai mbesa ii kũvika yĩla nĩũka.’

¹⁴ Mũndũ ũsu nĩwamenetwe nĩ andũ, na kwoou matũma andũ mamume ĩtina mathi makasye, ‘Tũikwenda mũndũ ũũ atw'ĩke mũsumbĩ waitũ.’

¹⁵ “Yĩla wasyokie mũsyĩ amina kũtw'ĩkĩthw'a mũsumbĩ, nĩwatũmanie ala athũkũmi moke, nĩ kana amanye ũndũ matandĩthĩtye mbesa syake.

¹⁶ “Ũla wa mbee nĩwookie na amwĩa atĩĩ, ‘Mũnene, mbesa syaku nĩnĩnaitandĩthisye nakwata ingĩ ĩkũmi.’

¹⁷ Nake amwĩa, ‘Wĩkĩte nesa; we wĩ mũthũkũmi mũseo! Nũndũ ũneethĩiwe wĩ wa kwĩkwatw'a ũndũnĩ mũnini, nĩkũnenga kũũngamĩa ndũa ĩkũmi.’

¹⁸ Wa kelĩ nake nĩwookie na amwĩa atĩĩ, ‘Mũnene, mbesa syaku nĩnaitandĩthisye nakwata ingĩ itano.’

¹⁹ Nĩwamwĩie ũsu nake, ‘Naku nĩkũnenga kũũngamĩa ndũa itano.’

²⁰ “Nĩvo ĩndĩ mũthũkũmi ũngĩ wookie amwĩa atĩĩ, ‘Mũnene, mbesa syaku nii vaa; nasyoveeie kĩtambaanĩ naivitha vo.

²¹ Nyie nĩnĩnaũkĩaa nũndũ we wĩ mũndũ mũmũ mũno; wosaa syĩndũ ite syaku na ũkethaa kĩla ũtaavanda.’

²² Mũnene ũsu amwĩa, ‘Nĩkũsilĩla o na ndeto syaku we mũthũkũmi ũũ. Nĩwĩsĩ nĩ mũndũ mũmũ mũno na nosaa syĩndũ ite syakwa, na kũkethaa kĩla ndaavanda!

²³ Waleaa ĩndĩ kũtwaa mbesa syakwa vengi nĩkĩ, na nasyoka nĩthĩwa nĩnasyosie syĩ na ũsyao?’

²⁴ “Nĩvo ĩndĩ wameie ala maũngyĩ nake vau atĩĩ, ‘Mũvenei mbesa isu mũnenge ũla mũthũkũmi wĩ na ĩkũmi.’

²⁵ Ĩndĩ andũ asu mamwĩa, ‘Mũnene, mbona ũsu e na ĩkũmi!’

²⁶ Nake amasũngĩa amea, ‘Ekai nĩmũtavye, mũndũ ũla wĩ na kĩndũ akongeleelwa ingĩ mbingĩ, ĩndĩ ũla ũte na kĩndũ o na kala kanini wĩthĩwa e nako akavenwa.

²⁷ Yu ĩndĩ ala amaitha makwa matendaa ngĩtw'ĩka mũsumbĩ woo, maetei vaa mũmoaĩe mbee wakwa!’ ”

Yesũ Ailika Yelũsalemu ta Mũsumbĩ

²⁸ Yesũ amina kũneena ndeto isu, nĩwatongoeisye andũ elekele Yelũsalemu.

²⁹ Yĩla wathengeeie ndũa yĩtawa Mbethivake na ĩngĩ yĩtawa Mbethani, vakuvĩ na Kĩĩma kya Mĩthata, nĩwatũmie amanyĩw'a make elĩ,

³⁰ amea atĩĩ, “Endai ndũanĩ ĩya yĩ mbee wenyu, na mũilika nĩmũkwona ndena ya ĩng'oi ĩtaakua mũndũ yĩ mbove. Mĩthasyei na mũimĩete vaa.

³¹ Mwakũlw'a nĩ mũndũ, ‘Mwĩmĩthasya yakĩ?’ Mũtavyei, ‘Mwĩai e na vata nayo.’ ”

³² Kwoou nĩmaendie na mamyona o ũndũ wamatavĩtye.

³³ Maendee na kũthasya ndena ĩsu, ene mayo nĩmamakũlilye atĩĩ, “Mwĩmĩthasya yakĩ?”

³⁴ Namo masũngĩa masya, “Mwĩai e na vata nayo.”

³⁵ Nĩmatwaĩie Yesũ ndena ĩsu. Nĩvo ĩndĩ mailĩĩile ngũa syoo mũongo kwayo, na mamũtetheesya kũtũla ĩũlũ.

³⁶ Yesũ aendete akuĩtwe nĩ ndena ĩsu, andũ nĩmalanilye ngũa syoo kũu nzĩanĩ.

³⁷ Athengee mũsyĩ wa Yelũsalemu e kĩtheeonĩ kya Kĩĩma kya Mĩthata, ĩkomano yonthe ya amanyĩw'a make nĩyambĩĩie kũtũngĩa Ngai mũvea, na kũmũkatha nũndũ wa maũndũ manene onthe ala moonete.

³⁸ Nĩmaasya atĩĩ, “Nĩ mũathime mũsumbĩ ũla wũkĩte ĩsyĩtwanĩ ya Mwĩai! Mũuo wĩthĩwe ĩtunĩ, na ũkumyo kwa Ngai ĩũlũ ĩtunĩ!”

³⁹ Nĩvo ĩndĩ Avalisi amwe maĩ ĩkomanonĩ yĩu mamwĩie Yesũ atĩĩ, “Mũmanyĩsya, kany'a amanyĩw'a aa maku mavindye.”

⁴⁰ Nake Yesũ amasũngĩa amea atĩĩ, “Aa makavindya, mavia nĩkũneena na wasya mũnene.”

Yesũ Ayĩĩa nũndũ wa Yelũsalemu

⁴¹ Yĩla Yesũ wathengeeie mũsyĩ wa Yelũsalemu na awona, nĩwaĩie nũndũ waw'o

⁴² ayasya atĩĩ, “Kethĩwa ũmũnthĩ nũmanya kĩla kĩtonya ũkũetee mũuo! Ĩndĩ nĩ kĩvithe ndũkyona.

⁴³ Ĩvinda nĩyũkĩte yĩla amaitha maku makomba ivumbu ikũthyũlũlũkĩte. Makakũthyũlũlũka na maikũvinganĩsya kuma ngalĩko syonthe.

⁴⁴ Makakwananga vyũ vamwe na andũ ala matũaa nthĩnĩ waku. Vai ĩvia makatia mataomboete. Makeeka ũu nũndũ ndwaaenda kũmanya ĩvinda yĩla Ngai wookie akwovosye.”

Yesũ Ailũngya Andũ Mathooeasya Syĩndũ Ĩkalũnĩ

⁴⁵ Nĩvo ĩndĩ Yesũ waendie alika Ĩkalũnĩ, na ambĩĩa kũlũngya andũ ala mathooeasya syĩndũ vo

⁴⁶ akĩmea atĩĩ, “Maandĩko Matheu maĩtye, ‘Nyũmba yakwa nĩ nyũmba ya kũvoyea,’ nayu kwa sisyai, mũmĩtw'ĩkĩthĩtye vandũ va kwĩvithaa avutani.”

⁴⁷ Yesũ nĩwamanyĩasya Ĩkalũnĩ kĩla mũthenya. Athembi anene na amanyĩsya ma Mĩao na atongoi ma andũ nĩmamanthaa ũndũ matonya kũmũaa,

⁴⁸ ĩndĩ mayaaona nzĩa meka ũu, nĩkwĩthĩwa andũ onthe matindaa mamwĩthukĩĩsye matekwenda kũvĩtũkwa nĩ kateto.