Luka 17 - MBIVILIA ŨVOO MŨSEO

Kũlika Naĩnĩ Nũndũ wa Matatwa

¹ Yesũ nĩwasyokie atavya amanyĩw'a make amea atĩĩ, “Matatwa mailea kũka mũndũnĩ, ĩndĩ kyeva nĩ kwa mũndũ ũla ũtumaa moka.

² Nĩ kavaa mũndũ ũsu akoveewa ĩvia ĩnene ngingo na kwĩkw'a ũkanganĩ, kwĩ kũtuma ũmwe wa aa anini eka naĩ!

³ Kwoou ĩsũvĩei mũno maũndũnĩ ala mũkwĩka! “Ethĩwa mwana-a-au nĩwakũvĩtĩsya mũkany'e, na akwĩtya ũekeo mũekee.

⁴ O na ethĩwa akũvĩtĩsya mavinda mũonza kwa mũthenya na kĩla ĩvinda ayũka aikw'ĩa, ‘Nĩngũvĩtĩsye, ndekee,’ no nginya ũmũekee.”

Ũtonyi wa Mũĩkĩĩo

⁵ Atũmwa nĩmeeie Mwĩai atĩĩ, “Twongeleele mũĩkĩĩo!”

⁶ Nake Mwĩai amea atĩĩ, “Kethĩwa mwĩ na mũĩkĩĩo wĩana o mbeke ĩla nini ya mũtĩ nĩkwĩa mũkũyũ ũũ, ‘Kũka vau ũkevande ũkanganĩ,’ na ũyĩka ũu mwasya.

Wĩa wa Mũthũkũmi

⁷ “Nũũ katĩ wenyu mũthũkũmi wake ekũĩmaa kana ekũĩthasya malondu asyoka mũsyĩ aumĩte wĩanĩ ũmwĩa, ‘Ĩkalaate wĩkale nthĩ ũathĩw'e?’

⁸ Vandũ va ũu amwĩaa atĩĩ, ‘Enda ũnzeũvĩsye lĩu wa wĩoo, na ũyĩyova kĩkoi wũke ũnthũkũme nambe kũathĩw'a. We nũkwĩsa kũya ĩtina.’

⁹ Mũthũkũmi ũsu ndatũngĩawa mũvea nũndũ wa kwĩanĩsya ũndũ weewa eke.

¹⁰ Kwoou o nenyu, yĩla mweanĩsya kĩla mwĩĩtwe mwĩke aasyai, ‘Ithyĩ twĩ o athũkũmi, na tweeka kũtethya o wĩa ũla witũ.’ ”

Yesũ Aivosya Aũme Ĩkũmi Mawaĩte Mangũ

¹¹ Yesũ o aendete Yelũsalemu, nĩwesĩlile mũvakanĩ wa Samalia na Kalilii.

¹² Aendete akalike ndũanĩ ĩmwe, nĩwakomanie na aũme ĩkũmi mawaĩte mangũ. Nĩmaũngamie vaasa,

¹³ na meetana na wasya mũnene mayasya atĩĩ, “Yesũ! Mũmanyĩsya, twĩw'ĩe tei!”

¹⁴ Yĩla Yesũ wamonie nĩwameie atĩĩ, “Endai mũkeyonany'e kwa athembi maĩkĩĩthye kana mwĩ avou.” Me nzĩanĩ maendete nĩmavoiw'e.

¹⁵ Yĩla ũmwe woo woonie kana nĩwavow'a, nĩwasyokie aimũkatha Ngai na wasya mũnene.

¹⁶ Nĩwakomie nthĩ na ĩvu vakuvĩ na Yesũ na amũtũngĩa mũvea; mũndũ ũsu aĩ Mũsamalia.

¹⁷ Yesũ nĩwakũlilye atĩĩ, “Andũ ala mavow'a ti ĩkũmi? Ala angĩ kenda maĩva?

¹⁸ Mbona mũeni ũũ e weka nowe wasyoka amũtũngĩe Ngai mũvea?”

¹⁹ Yesũ amwĩa atĩĩ, “Ũkĩla ũthi, nĩwavow'a nũndũ wa mũĩkĩĩo waku.”

Kũka kwa Ũsumbĩ wa Ngai

²⁰ Avalisi amwe nĩmamũkũlilye Yesũ yĩla ũsumbĩ wa Ngai ũkoka. Nake amasũngĩa amea atĩĩ, “Ũsumbĩ wa Ngai ti kĩndũ kya kwoneka kyũkĩte.

²¹ Vai mũndũ ũkethĩwa atonya kwasya, ‘Kwa sisyai nĩ ũũ vaa,’ kana, ‘Nĩ ũya vaya,’ nũndũ ũsumbĩ wa Ngai wĩ katĩ wenyu.”

²² Nĩvo ĩndĩ weeie amanyĩw'a make atĩĩ, “Ĩvinda nĩyũkĩte yĩla mũkenda kwona ũmwe wa mĩthenya ya Mwana wa Mũndũ, ĩndĩ mũikawona.

²³ Ve andũ makokĩla mamwĩe, ‘Sisyai e vaya,’ kana ‘Sisyai e vaa!’ Mũikaamaatĩĩe.

²⁴ Mwana wa Mũndũ akaumĩla ta ũtisi, ũla ũtisaa ũkathesya ĩtu yonthe.

²⁵ Ĩndĩ mbee wa ũu, akamba kũthĩnw'a mũno na kũlewa nĩ andũ ma ĩvinda yĩĩ.

²⁶ O ũndũ kwailyĩ ĩvindanĩ ya Noa, now'o kwĩĩthĩwa kũilyĩ ĩvindanĩ ya Mwana wa Mũndũ.

²⁷ Ĩvindanĩ yĩu, andũ nĩmaĩsaa na kũnyw'a, na nĩmatwaanaa na kũtwawa, kũvika mũthenya ũla Noa walikile ngalawanĩ, na kwooka kĩla kĩw'ũ kingĩ kyamoaa.

²⁸ Yĩkeethĩwa yĩilyĩ ũndũ kwailyĩ ĩvindanĩ ya Loto. Andũ nĩmaĩsaa na kũnyw'a, na nĩmathooaa syĩndũ na kũthoosya, na nĩmavandaa na kwaka myako.

²⁹ Ĩndĩ mũthenya ũla Loto waumie Sondomu, mwaki wa lavuti nĩwatheeie kuma ĩtunĩ wamavĩvya andũ onthe makw'a.

³⁰ Ũu now'o kwĩĩthĩwa kũilyĩ mũthenya ũla Mwana wa Mũndũ wĩumĩla.

³¹ “Mũthenyanĩ ũsu, mũndũ ũla ũkethĩwa nyũmbanĩ yake ĩũlũ, ndakaatinde aitheea ose mĩio kuma nyũmbanĩ yake, na o ta ũu, ũla ũkethĩwa mũũndanĩ ndakaatinde aisyoka mũsyĩ.

³² Lilikanai kĩla kyeekĩkie kwa mũka wa Loto!

³³ Mũndũ ũla wendaa kũsũvĩa thayũ wake akawasya; ĩndĩ ũla waasya thayũ wake akawona ĩngĩ.

³⁴ Ekai nĩmũtavye, ũtukũ ũsu andũ elĩ nĩmakethĩwa makomete kĩtandanĩ kĩmwe; ũmwe nũkoswa, na ũla ũngĩ aitiwa.

³⁵ Aka elĩ nĩmakethĩwa maithiĩa ĩvianĩ yĩmwe; ũmwe nũkoswa na ũla ũngĩ aitiwa.” [

³⁶ O ta ũu, aũme elĩ makeethĩwa mũũndanĩ; ũmwe nũkoswa na ũla ũngĩ aitiwa.]

³⁷ Amanyĩw'a ma Yesũ nĩmamũkũlilye atĩĩ, “Mwĩai ũndũ ũũ ũkeethĩwa va?” Nake Yesũ amasũngĩa, “Vandũ vala ve kimba nĩvo ndei syũmbanĩlĩĩlaa.”