Kuma 6 - MBIVILIA ŨVOO MŨSEO

¹ Nĩvo ĩndĩ Mwĩai Ngai weeie Mwose atĩĩ, “Yu nũkwona ũndũ ngwĩkana na mũsumbĩ. Nĩngũtũmĩa ũtonyi wakwa amalekye mathi. Kwa w'o, nĩmũtũmĩĩa ũtonyi kũvikĩa amalũngye maume nthĩ yake.”

² Ngai nĩwasyokie amwĩa Mwose, “Nyie ninyie Mwĩai Ngai.

³ Nĩnaumĩlĩĩle Avalaamu, naumĩlĩĩla Isaka, na naumĩlĩĩla Yakovo ta nĩ Ngai Mwene Ũtonyi W'onthe, ĩndĩ ndyaaĩmanyĩthany'a kwa andũ makwa na ĩsyĩtwa yakwa, nayo nĩ Mwĩai Ngai.

⁴ O ta ũu nĩnaseũvisye ũtianĩo wakwa namo, na namatha kũmanenga nthĩ ya Kanaani, vala matwĩe me aeni.

⁵ Nĩnĩw'ĩte kĩĩo kya andũ ma Ĩsilaeli ala makwatĩtwe ũkombo nĩ andũ ma Misili na nĩngwĩka ũndũ natianĩie namo.

⁶ Kwoou tavya andũ ma Ĩsilaeli kana nyie nĩmea atĩĩ, ‘Ninyie Mwĩai Ngai; ngamũthasya na kũmũvonokya mũeke kwĩthĩwa ngombo sya andũ ma Misili. Ngatũmĩa ũtonyi wakwa nĩete ũsilĩlo mũthũku ĩũlũ woo na ngĩmwovosya.

⁷ Ngamũtw'ĩkĩthya andũ makwa, nakwa ngeethĩwa Ngai wenyu. Mũkamanya kana ninyie Mwĩai Ngai, Ngai wenyu yĩla ngamũthasya mũeke kwĩthĩwa ngombo sya andũ ma Misili.

⁸ Ngamũtwaa nthĩ ĩla neevĩtie na nathana kana ngamĩnenga Avalaamu, Isaka na Yakovo; ngamũnenga yo yĩthĩwe nthĩ yenyu. Ninyie Mwĩai Ngai!’ ”

⁹ Mwose nĩwatavisye andũ ma Ĩsilaeli ndeto isu, ĩndĩ mayaamwĩthukĩĩsya nĩkwĩthĩwa nĩmakw'ĩte ngoo mũno kumana na kũthĩnw'a kũla mathĩnĩtw'e.

¹⁰ Nĩvo ĩndĩ Mwĩai Ngai wamwĩie Mwose,

¹¹ “Enda ũtavye Valao mũsumbĩ wa Misili alekye andũ ma Ĩsilaeli mathi maume nthĩ yake.”

¹² Ĩndĩ Mwose eea Mwĩai Ngai atĩĩ, “Ethĩwa andũ ma Ĩsilaeli nĩmeũlea kũmbĩthukĩĩsya, nĩ kyaũ kĩtuma mũsumbĩ ethukĩĩsya mũndũ ũneenaa aithita takwa?”

¹³ Nĩvo ĩndĩ Mwĩai Ngai waneenie na Mwose na Alũni na ameaĩa mathi kwa Valao mũsumbĩ wa Misili makaumye andũ ma Ĩsilaeli nthĩ ĩsu.

Mosyaanĩo ma Mwose na Alũni

¹⁴ Aa nĩmo masyĩtwa ma aaũmae ma nzyawa sya Ĩsilaeli: Ana ma Lũveni, mwana wa mbee wa Yakovo maĩ ana: Anoki, Valu, Esiloni, na Kalĩmi; asu nĩmo maĩ aaũmae ma nzyawa sya Lũveni.

¹⁵ Nake Simioni aĩ ana thanthatũ: Yemũeli, Yamini, Oati, Yakini, Nzoali, na Sauli, ũla waĩ mwana wa kĩveti Kĩmũkanaani; asu nĩmo maĩ aaũmae ma nzyawa sya Simioni.

¹⁶ Aa nĩmo masyĩtwa ma ana ma Livai, kũatĩĩa mosyaanĩo moo: Ngelisoni, Koathi na Melali. Livai ekalile thayũ myaka ĩana na mĩongo ĩtatũ na mũonza.

¹⁷ Ngelisoni aĩ na ana elĩ: Livini na Simei; asu nĩmo maĩ aaũmae ma nzyawa sya Ngelisoni.

¹⁸ Koathi ana make maĩ ana: Amulamu, Ĩsiali, Eviloni na Usieli; Koathi ekalile thayũ myaka ĩana na mĩongo ĩtatũ na ĩtatũ.

¹⁹ Melali aĩ na ana elĩ: Mali na Musi. Asu nĩmo aaũmae ma nzyawa sya Livai kũatĩĩa mosyaanĩo moo.

²⁰ Amulamu nĩwatwaie mwĩĩtu-a-inyia wa ĩthe wake weetawa Yokeveti na masyaa Alũni na Mwose. Amulamu ekalile thayũ myaka ĩana na mĩongo ĩtatũ na mũonza.

²¹ Ĩsiali aĩ ana atatũ: Kola, Nevengi, na Nzikili.

²² O ta ũu Usieli aĩ na ana atatũ: Misaeli, Elisavani na Sithili.

²³ Alũni nĩwatwaie Elisieva, mwĩĩtu wa Aminatavu, ũla waĩ mwĩĩtu-a-inyia wa Nasoni. Nĩmasyaie syana inya: Natavu, Aviu, Eleasali, na Ĩthamali.

²⁴ Kola aĩ na ana atatũ: Asili, Elikana, na Aviasavu; asu nĩmo maĩ aaũmae ma nzyawa sya Kola.

²⁵ Eleasali mwana wa Alũni nĩwatwaie ũmwe wa eĩtu ma Vutielo na masyaa mwana weetawa Vineasi. Asu nĩmo maĩ aaũmae ma nzyawa sya Livai kũatĩĩa mĩsyĩ yoo.

²⁶ Alũni na Mwose nĩmo Mwĩai Ngai waneenie namo aimea atĩĩ, “Tongoesyai andũ ma Ĩsilaeli mũmaumye nthĩ ya Misili kwĩanana na mbaĩ syoo.”

²⁷ O ta ũu nomo maneenie na Valao mũsumbĩ wa Misili nĩ kana alekye andũ ma Ĩsilaeli maume Misili.

²⁸ Yĩla Mwĩai Ngai waneenie na Mwose e nthĩ ya Misili,

²⁹ amwĩie atĩĩ, “Ninyie Mwĩai Ngai. Tavya Valao mũsumbĩ wa Misili maũndũ onthe ala ngũũtavya.”

³⁰ Ĩndĩ Mwose amũsũngĩa, “Nĩ kyaũ kĩtuma mũsumbĩ ambĩthukĩĩsya nakwa nĩneenaa ngĩthita?”