Kuma 25 - MBIVILIA ŨVOO MŨSEO

Nthembo ya kwaka Ĩeema Ĩtheu

¹ Mwĩai Ngai nĩwaneenie na Mwose amwĩa atĩĩ,

² “Tavya andũ ma Ĩsilaeli mambumĩsye nthembo. Osa nthembo o na yĩva ĩla mũndũ waumya kwa ngenda yake.

³ Ii nĩsyo syĩndũ ila wĩosa ta nthembo kuma kwoo: Thaavu, silĩva, na kyũma kĩtawa mbulonzi;

⁴ ngũa sya mbuluu, sya langi wa nzambalaũ, ingĩ ndune mũno, na ingĩ itumĩtwe na ndii nzeo ndũmu mbokothe; ngũa sya w'ĩa wa mbũi,

⁵ ithuma sya ndũũme ikundĩtw'e langi mũtune, ithuma nzeo mbololo; mbwaũ sya mũtĩ wa mũea;

⁶ mauta ma taa; syĩndũ sya kũnyungya nesa mauta ma kwĩtĩkĩsya andũ, na ma ũvani wĩ mũuke mũseo;

⁷ mavia ma thooa mũnene metawa onekisi na angĩ ma kwendeesya ma kũtumĩĩwa ngũanĩ ya ĩũlũ ya Mũthembi ũla Mũnene na ngusunĩ yake ya kwoveea kĩthũi.

⁸ Tavya andũ mambakĩe Ĩeema ĩtheu nĩ kana nĩkalanasye namo.

⁹ Seũvya Ĩeema yĩu na kũyĩkĩa syĩndũ kwĩanana na ũelesyo ũla ngũũnenga.

Ĩsandũkũ ya Ũtianĩo

¹⁰ “Seũvya ĩsandũkũ ya mbwaũ sya mũtĩ wa mũea, yĩna ũasa wa mita ũmwe na sendimita ĩkũmi, ũthanthau wa sendimita mĩongo thanthatũ na thanthatũ, na ũtũlu wĩanene na ũthanthau.

¹¹ Yũmbĩĩe thaavu mũthei nthĩnĩ na nza, na ũiyĩkĩa ndeenĩ syayo thaavu ũyĩlingĩlĩte.

¹² Seũvya ngome inya sya thaavu na ũisyĩkĩa maũũnĩ ana mayo; ngome ilĩ ngalĩko ĩmwe na isu ingĩ ilĩ ngalĩko ĩla ĩngĩ.

¹³ Seũvya mĩtĩ kuma mũtĩnĩ wa mũea na ũimyũmbĩĩa thaavu.

¹⁴ Ĩkĩa mĩtĩ ĩsu ila ngomenĩ syĩ ndeenĩ wa ĩsandũkũ kwondũ wa kũyĩkua.

¹⁵ Mĩtĩ ĩsu ĩkekalaa ngomenĩ sya ĩsandũkũ yĩu; ndĩkaaumw'e vo.

¹⁶ Ĩkĩa ĩsandũkũnĩ yĩu masengea elĩ ma mavia, ala maandĩkĩtwe ĩla mĩao.

¹⁷ “Seũvya ngunĩko ya thaavu ĩla nĩ vandũ va Ngai va kũekeaa naĩ, yĩna ũasa wa sendimita ĩana na ĩkũmi na ũthanthau wa sendimita mĩongo thanthatũ na thanthatũ.

¹⁸ Seũvya mavisa elĩ ma syũmbe syĩ nthwau syĩtawa akelũvi sya thaavu mũtumbatumbe, syĩthĩwe mĩthyanĩ ya ngunĩko ĩsu.

¹⁹ Seũvya ĩvisa ya kyũmbe kĩmwe mũthyanĩ ũmwe, na ĩvisa ya kyũmbe kĩla kĩngĩ mũthyanĩ ũla ũngĩ. Syũmbe isu syĩthĩwe ikwatanĩte na ĩla ngunĩko mĩthyanĩ ĩsu ĩlĩ.

²⁰ Syũmbe isu nĩsyĩthĩwe itambũũkĩtye nthwau, ikavw'ĩka ngunĩko ĩsu. Syĩthĩwe isianĩtye na syelekelye ũthyũ ngunĩkonĩ ĩsu.

²¹ Ĩkĩa ala masengea elĩ ma mavia ĩsandũkũnĩ yĩu, na ũyilĩĩla ĩla ngunĩko ĩũlũ wayo.

²² Vau ngunĩkonĩ ĩũlũ, katĩ wa syũmbe isu ilĩ syĩ nthwau, ila syĩ ĩũlũ wa Ĩsandũkũ ya Ũtianĩo, ngakomanĩaa naku vo, na ngĩũnenga mĩao yakwa yonthe kwondũ wa andũ ma Ĩsilaeli.

Mesa ya Kwilĩĩla Mĩkate Ĩthembeetwe Ngai

²³ “Seũvya mesa ya mbwaũ sya mũtĩ wa mũea yĩna ũasa wa sendimita mĩongo nyanya na nyanya, ũthanthau wa sendimita mĩongo ĩna na inya, na ũtũlu wa sendimita mĩongo thanthatũ na thanthatũ.

²⁴ Myũmbĩĩe thaavu mũthei na ũimĩkĩa ndeenĩ syayo thaavu ũmĩlingĩlĩte.

²⁵ Athĩĩa ũtiivonĩ wayo ũvwaũ wĩ na ũthanthau wa sendimita nyanya na kũmbĩĩa thaavu wĩlingĩlĩte ũvwaũ ũsu.

²⁶ Seũvya ngome inya sya thaavu na kũsyĩkĩa ndeenĩ sya maũũ ana ma mesa ĩsu.

²⁷ Ngome isu syaĩlĩte kwĩthĩwa vakuvĩ na ũtiivo nĩ kana ikwatae mĩtĩ ya kũkua mesa ĩsu.

²⁸ Seũvya mĩtĩ ĩsu kuma mũtĩnĩ wa mũea na kũmyũmbĩĩa thaavu, na ĩkatũmĩkaa kwa kũkua mesa ĩsu.

²⁹ Seũvya masaani, mbakũli sya kwĩkĩa ũvani, ngilasi sya kwĩkĩa ndivai, na mbakũli itũmĩawe kwa kũthemba ndivai. Syĩndũ isu syonthe iseũvw'e na thaavu mũthei.

³⁰ “Mesa ĩsu yiwe mbee wa Ĩsandũkũ ya Ũtianĩo, na kĩla ĩvinda vayĩthĩawa ĩũlũ wayo mĩkate ĩthembetwe kwondũ wakwa.

Kĩndũ kya Kwilĩĩla Taa

³¹ “Seũvya kĩndũ kya kwilĩĩla taa kya thaavu mũthei. Ĩtina yakyo, na kĩla kĩũngamĩtye kĩndũ kĩu iseũvw'e na thaavu mũtumbatumbe. Ikombe, mĩthya na malaa makyo syĩthĩwe ikwatene nakyo.

³² Kĩthĩwe na mbonge thanthatũ; itatũ kuma ngalĩko ĩmwe, na ila ingĩ itatũ kuma ngalĩko ĩla ĩngĩ.

³³ Ikombe itatũ iseũvĩtw'e ta malaa ma mũtĩ wĩtawa mũlosi me na tũmatũ twamo, nĩsyĩthĩwe ũvongenĩ ũmwe, na ikombe itatũ ũvongenĩ ũla ũngĩ. Ũu wĩthĩwe kwa mbonge syonthe thanthatũ ila syumĩte kĩndũnĩ kĩu kya kwilĩĩla taa.

³⁴ Kĩla kĩũngamĩtye kĩndũ kĩu kya kwilĩĩla taa nĩkĩthĩwe na malaa ana ma kũkyanakavya mailyĩ ta malaa ma mũtĩ wa mũlosi me na tũmatũ twamo.

³⁵ Ĩtũ yĩmwe ya ĩlaa yĩthĩwe ungu wa mbonge ilĩ sya mbee ila syumĩte kĩndũnĩ kĩu, ĩtũ ya kelĩ ungu wa mbonge ila ingĩ ilĩ, na ĩtũ ya katatũ yĩyĩthĩwa ungu wa mbonge ila ingĩ ilĩ; syonthe vamwe nĩ mbonge thanthatũ.

³⁶ Matũ, mbonge, na kĩndũ kĩu kya kwilĩĩla taa syĩthĩwe ikwatene na iseũvĩtw'e na thaavu mũthei mũtumbatumbe.

³⁷ Seũvya taa mũonza sya kĩndũ kĩu kya kwilĩĩla taa na ũisilĩĩla ĩũlũ wakyo nĩ kana imulĩkae mbee wakyo.

³⁸ Syĩndũ sya kũvosya taa na masaani ma kwĩkĩa mũu wa ndambi, syĩthĩwe iseũvĩtw'e na thaavu mũthei.

³⁹ Tũmĩa kĩlo mĩongo ĩtatũ na itano sya thaavu mũthei kũseũvya kĩndũ kĩu kya kwilĩĩla taa na syĩndũ isu ingĩ syonthe.

⁴⁰ Sisya wiseũvye kwĩanana na mũseũvĩlye ũla ũkwonw'a wĩ kĩĩmanĩ.”