Kuma 24 - MBIVILIA ŨVOO MŨSEO

Kũlũlũmĩĩlw'a kwa Ũtianĩo

¹ Mwĩai Ngai nĩweeie Mwose atĩĩ, “Ambata wũke kĩĩmanĩ kũũ nĩĩ, we na Alũni, Natavu, Aviu, na atongoi mĩongo mũonza ma andũ ma Ĩsilaeli, na mwĩ vaasa mũikumana mũnthaithe.

² Noue wĩ weka na vai mũndũ ũngĩ waĩlĩte kũthengeea vakuvĩ nakwa o na andũ mayaĩlĩte kwambata kĩĩmanĩ.”

³ Mwose nĩwaendie na amatavya andũ ndeto syonthe na myamũlo yonthe ya Mwĩai Ngai, na andũ onthe masũngĩa vamwe masya, “Tũkeekaa maũndũ onthe ala Mwĩai Ngai waneena.”

⁴ Mwose nĩwaandĩkie maũndũ onthe ala Mwĩai Ngai weeaie. Ũnĩ ũsu kwakya nĩwaakie kĩthembeo vakuvĩ na kĩĩma na enzĩla mavia ĩkũmi na elĩ, kĩla yĩmwe yĩũngamĩte vandũ va ĩmwe ya ila mbaĩ ĩkũmi na ilĩ sya andũ ma Ĩsilaeli.

⁵ Nĩvo ĩndĩ watũmie anake na mathembea Mwĩai Ngai nthembo sya kũvĩvw'a, na nthembo sya ngwatanĩo sya ng'ombe.

⁶ Mwose nĩwoosie nyusu ĩmwe ya nthakame ya nyamũ isu na amĩkĩa mbakũlinĩ nene; nyusu ĩla ĩngĩ nĩwamĩtĩkĩisye kĩthembeo.

⁷ Nĩvo ĩndĩ Mwose woosie ĩvuku ya ũtianĩo na ayĩsomea andũ. Namo andũ masũngĩa masya atĩĩ, “Tũkeekaa maũndũ onthe ala Mwĩai Ngai ũneenete. Tũkeethĩawa twĩ ewi.”

⁸ Mwose nĩwoosie nthakame ĩla yaĩ mbakũlinĩ, aminzangĩsya andũ. Nĩwameie atĩĩ, “Ĩĩ nĩyo nthakame ĩla ĩkũlũlũmĩĩlya ũtianĩo ũla Mwĩai Ngai ũseũvĩtye nenyu ĩtina wa kũmũnenga mĩao ĩno yonthe.”

⁹ Mwose, Alũni, Natavu, Aviu, na ala atongoi mĩongo mũonza ma andũ ma Ĩsilaeli nĩmambatie kĩĩmanĩ,

¹⁰ na moona Ngai wa Ĩsilaeli. Ungu wa nyaĩĩ syake vaĩ kĩndũ kyailyĩ nzĩa ĩseũvĩtw'e na ĩvia ya thooa mũnene yĩtawa savaya yaĩ ĩtheu ta yayaya.

¹¹ Ĩndĩ Ngai ndaameka ũndũ ũthũku atongoi asu ma andũ ma Ĩsilaeli. Nĩmoonie Ngai, maya, na manyw'a.

Mwose e Kĩĩmanĩ kya Sinaĩ

¹² Mwĩai Ngai nĩweeie Mwose atĩĩ, “Ambata kĩĩmanĩ kũũ nĩĩ, na ĩvindanĩ yĩla ũkwĩthĩwa vo, nĩngũũnenga masengea elĩ ma mavia ala me na mĩao yonthe ĩla nĩandĩkĩte ya kũmanyĩsya andũ.”

¹³ Kwoou Mwose na mũtetheesya wake Yosua nĩmookĩlile meeyũmbany'a, na Mwose ambata kĩĩmanĩ kĩu kya Ngai.

¹⁴ Mwose nĩweeie ala atongoi atĩĩ, “Ĩkalai vaa mũtweteele nginya tũke. Alũni na Uulu me vamwe nenyu; ethĩwa mũndũ e na ĩkoani na ũngĩ, nĩathi vala maĩ.”

¹⁵ Mwose nĩwambatie Kĩĩmanĩ kya Sinaĩ na ĩtu yakĩvw'ĩka,

¹⁶ na ũtheu mũtisu wa Mwĩai Ngai watheea kĩĩmanĩ kĩu. Vandũ va mĩthenya thanthatũ yĩla ĩtu nĩyavw'ĩkĩte kĩĩma kĩu, na mũthenyanĩ wa mũonza Mwĩai Ngai nĩweetie Mwose kuma ĩtunĩ yĩu.

¹⁷ Kwa andũ ma Ĩsilaeli ũtheu ũsu mũtisu wa Mwĩai Ngai wailyĩ ta mwaki wavĩvasya kĩĩma kĩu ĩũlũ.

¹⁸ Mwose nĩwalikile ĩtunĩ yĩu o aendee na kwambata kĩĩmanĩ. Nĩwekalile kĩĩmanĩ ĩũlũ vandũ va matukũ mĩongo ĩna, ũtukũ na mũthenya.