Kuma 23 - MBIVILIA ŨVOO MŨSEO

Ũsili wa katĩ na Kwĩw'anĩa Tei

¹ “Ndũkanyaĩĩkye ndeto sya ũvũngũ. Ndũkatetheesye mũndũ mũthũku kwa kumya ũkũsĩ wa ũvũngũ.

² Ndũkaatĩĩe wingĩ wa andũ yĩla mekwĩka naĩ, kana yĩla mekumya ũkũsĩ ũtekwĩtĩkĩlana na ũsili wa katĩ.

³ Ndũkendeesye mũndũ ngya yĩla ũkũsilĩlwa.

⁴ “Wakomana na ng'ombe kana ĩng'oi ya mũndũ wĩ ũthũ naku yaĩte inga ũmũtũngĩe.

⁵ Na woona ĩng'oi yake yĩvalũkĩtw'e nĩ ũito wa mĩio, mũtetheesye kũyũkĩlya yĩũngame; ndũkamũtianĩsye nayo.

⁶ “Ndũkelelũkye sila wa katĩ ũla waĩlĩte kũnengwa mũndũ ngya yĩla ũkũsilĩlwa.

⁷ Ndũkaumye ũkũsĩ wa ũvũngũ, na ndũkoae mũndũ ũte ĩvĩtyo kana mũlũngalu, nĩkwĩthĩwa ngamũtalĩla ĩvĩtyo mũndũ ũla wĩkĩte ũndũ ũsu mũthũku.

⁸ Ndũketĩkĩle kwosa ĩtuvi ya wendeesyo, nũndũ ũu ũtumaa andũ matamanya maũndũ ala maĩlu na kwananga mwĩkalo wa ala alũngalu.

⁹ “Ndũkamwĩke naĩ mũndũ wĩ ũeninĩ; nĩmwĩsĩ ũndũ kwĩthĩwa wĩ mũeni kũilyĩ, nũndũ o nenyu mwaĩ ũeninĩ nthĩ ya Misili.

Mwaka wa Mũonza na Mũthenya wa Savato

¹⁰ “Vandũ va myaka thanthatũ ũkavandaa mĩũnda yaku na kũketha kĩla ũvandĩte.

¹¹ Ĩndĩ mwakanĩ wa mũonza ũkaekanaa na mũũnda waku ũte mũĩme, na ndũkaakethe kĩndũ o na kĩmwe kĩmeete vo. Ngya nĩtonya kũya kĩla kĩmeete vo, na nyamũ sya kĩtheka iiya kĩla kĩũtiala. Ũu now'o waĩlĩte kwĩkana na mĩũnda yaku ya mĩsavivũ na ya mĩthata.

¹² “Tethasya wĩa mĩthenya thanthatũ kwa kyumwa, ĩndĩ ndũkatethye wĩa mũthenyanĩ wa mũonza nĩ kana ng'ombe syaku, na mang'oi maku mathũmũe, na syana sya ngombo yaku mũndũ mũka, na aeni mathũmũe.

¹³ “Ĩthukĩĩsye maũndũ onthe ala nyie Mwĩai Ngai ngũtavĩtye. Ndũkekaĩle ngai ingĩ; o na ndũkaiwete.

Mboka Itatũ Nene

¹⁴ “Mũkeethĩawa na mboka mavinda atatũ kwa mwaka kwondũ wa ndaĩa yakwa.

¹⁵ Mweinĩ wa mbee ũla wĩtawa Avivu, naw'o nĩ mwei ũla mwaumie nthĩ ya Misili, mũkeethĩawa na Mboka ya Mũkate ũte Mbota kwĩanana na ũndũ namwĩaĩie. Mũikaye mũkate wĩkĩĩtwe mbota ĩvindanĩ ya mĩthenya ĩsu mũonza ya mboka ĩno. Mũikaaũke kũnthaitha mũtakuĩte nthembo.

¹⁶ “Mũkeethĩawa na Mboka ya Ngetha ya ũsyao wa mbee wa syĩndũ ila syumanĩte na ũthũkũmi wenyu, naw'o nĩ wa syĩndũ ila inyw'ĩ mũvandaa mĩũndanĩ yenyu. Ĩthĩawai na mboka ya kũmbany'a ngetha mũminũkĩlyonĩ wa mwaka yĩla mũkũmbany'a kuma mĩũndanĩ ũsyao ũla wumanĩte na wĩa wenyu.

¹⁷ Kĩla mwaka mavindanĩ ma mboka isu itatũ, aũme menyu onthe makookaa kũnthaitha, nyie Mwĩai Ngai, Ngai wenyu.

¹⁸ “Mũikambumĩsye nthembo ya nthakame ĩvulanĩtw'e na mũkate ũuĩtwe na mbota. “Mathunya ma nyamũ ĩla wĩnthembeaa ĩvindanĩ ya mboka ĩsu, maikaekawe mavike kĩoko kya mũthenya ũla ũatĩĩe.

¹⁹ “Etae kĩla kĩseo kya ũsyao wa mbee wa nthĩ yenyu nyũmbanĩ ya Mwĩai Ngai, Ngai waku. “Ndũkaue nyama sya katena ka ĩlondu kana ka mbũi na ĩia ya inyia wako.

Mawatho na Momanyĩsyo

²⁰ “Sisya, nĩndũmĩte mũlaĩka aende mbee waku akũsũvĩae wĩ nzĩanĩ na kũũtwaa vala nzeũvĩtye.

²¹ Mwĩthukĩĩsye na kũmwĩw'a. Ndũkaleane nake nĩkwĩthĩwa nĩnĩmũtũmĩte, na ndakakũekea ĩvĩtyo yĩu.

²² Ethĩwa ũkeethukĩĩsya vyũ kĩla ũkũneena na kwĩka kyonthe kĩla ngũũtavya, nyie ngeethĩwa mũmaitha kwa amaitha maku na ngaleana na ala meleana naku.

²³ Mũlaĩka wakwa akakũtongoesya na kũũtwaa nthĩ ya Aamoli, Aititi, Avelisi, Akanaani, Aivi, na Ayevusi, nakwa ngamamina vyũ.

²⁴ Ndũkakumanĩe ngai syoo, kana kwithũkũma, kana kwĩka maũndũ ala mekawa mothaithinĩ masyo. Ĩndĩ mwĩsyĩkya kũasa vyũ na kwananga ithembeo syasyo.

²⁵ Ethĩwa ũkanthaithaa nyie, Mwĩai Ngai, Ngai waku, ngakũathima kwa ũkũnenga lĩu na kĩw'ũ na ũkũvetangĩa mowau.

²⁶ Vai mũndũ mũka ũkasyaa naĩ kana ethĩwe ngũngũ nthĩnĩ wa nthĩ yaku. Ngakũnenga kwĩkala thayũ ĩvinda ĩasa.

²⁷ “Ngatuma andũ ala makũkananĩasya mambĩĩa kũngĩa. Ngaete kũlea kũeleanwa katĩ wa andũ ala wũkitaa namo. O ta ũu ngatuma amaitha maku onthe maũkĩa vyũ.

²⁸ Ngatũmĩa amaitha maku mauĩ makwatwe nĩ w'ĩa; ngalũngya Aivi, Akanaani, na Aititi maume vala mũĩ.

²⁹ Ndikamalũngya maume vala ũĩ ĩvindanĩ ya mwaka ũmwe. Ethĩwa ngeeka ũu nthĩ ĩkatiwa yĩ nthei na nyamũ sya kĩtheka iyĩthĩwa syĩ mbingĩ mũno kĩla vandũ.

³⁰ Ngamalũngasya kavola kwa kavola nginya mwingĩve na kwosa nthĩ ĩsu yĩthĩwe yĩ yenyu.

³¹ Ngeekĩa nthĩ yaku mĩvaka kuma Ũkanga Mũtune kũvika Ũkanga wa Menditelenia na kuma weũnĩ kũvika Ũsĩnĩ wa Euvalati. Nĩkwĩthĩwa nyie ngamanengane andũ ala matũaa nthĩ ĩsu mokonĩ maku, naku ũkamalũngya maume mbee waku.

³² Ndũkaaseũvye ũtianĩo namo kana na ngai syoo.

³³ Ndũkaaekane na andũ asu matũe nthĩ yaku; ethĩwa ũkamaeka makatuma ũmbĩtĩsya. Na wathaitha ngai syoo, naw'o ũsu ũkeethĩwa wĩ mũteo mũthũku mũno kwaku.”