Kuma 17 - MBIVILIA ŨVOO MŨSEO

Ngai Ainenga Andũ ma Ĩsilaeli Kĩw'ũ kuma Ĩvianĩ

¹ Andũ onthe ma Ĩsilaeli nĩmambĩĩie kyalo kuma weũnĩ wa Sini, mesĩlĩte kũndũ kwĩ kĩvathũkany'o kwĩanana na ũndũ Mwĩai Ngai wameaĩie. Nĩmambie maeema vandũ vetawa Levitimu, ĩndĩ vau vayaĩ kĩw'ũ andũ matonya kũnyw'a.

² Kwoou andũ asu nĩmatetisye Mwose na mamwĩa atĩĩ, “Tũnenge kĩw'ũ tũnyw'e.” Mwose amea, “Mwĩndetesya kyaũ? Nĩkĩ mũũtata Mwĩai Ngai?”

³ Ĩndĩ andũ asu maĩ na waũni mwingĩ na kwoou maendeea na kũnyungunyĩsya kũla kwĩ Mwose. Nĩmamũkũlasya atĩĩ, “Ũnatumisye Misili nĩkĩ ũtũae na waũni vamwe na syana sitũ na indo sitũ?”

⁴ Mwose nĩwamwĩkaĩlile Mwĩai Ngai ayasya atĩĩ, “Nĩĩkana ata na andũ aa? Makilĩlye kũngimanga na mavia.”

⁵ Mwĩai Ngai nĩwasũngĩie Mwose amwĩa atĩĩ, “Vĩtũka ũthi mbee wa andũ asu, wĩ na amwe ma atongoi moo. Kua ĩla ndata wakũnie kĩw'ũ kya Ũsĩ wa Naeli nayo na ũithi.

⁶ Nĩngũũngama vau mbee waku vakuvĩ na ĩvia yĩla yĩ Kĩĩmanĩ kya Sinaĩ. Kũna ĩvia yĩu, na kĩw'ũ nĩkĩkuma vo nĩ kana andũ manyw'e.” Kwoou Mwose nĩweekie ũu atongoi asu ma Ĩsilaeli masyaĩĩsye.

⁷ Mwose nĩweetie vandũ vau Masa na ĩsyĩtwa yĩngĩ Meliva nũndũ andũ ma Ĩsilaeli nĩmatetie na matata Mwĩai Ngai na kũkũlya, “Mwĩai Ngai e vamwe naitũ kana nde vamwe naitũ?”

Andũ ma Ĩsilaeli Mayũkita na Aamaleki

⁸ Andũ ma Ĩsilaeli me vau Levitimu, Aamaleki nĩmookie kũmavithũkĩa.

⁹ Mwose nĩweeie Yosua atĩĩ, “Nyuva aũme amwe maitũ makokite na Aamaleki. Ũnĩ ngaũngama kĩĩmanĩ ĩũlũ ngwete ĩla ndata Ngai wambĩie nĩkue.”

¹⁰ Kwoou Yosua nĩweekie kwĩanana na ũndũ Mwose wamwĩie na okita na Aamaleki. Mwose, Alũni, na Uulu nĩmaendie kĩĩmanĩ ĩũlũ.

¹¹ Ĩvindanĩ yĩla Mwose weethĩawa okĩlĩtye moko, andũ ma Ĩsilaeli nĩmaendeeaa na kũsinda kaũ ũsu. Ĩndĩ atheesya moko Aamaleki nĩmo meethĩawa maisinda.

¹² Yĩla Mwose wanoie moko, Alũni na Uulu nĩmamũeteie ĩvia ekalĩla na maũngama ũtee wake, ũmwe ngalĩko ĩmwe na ũla ũngĩ ngalĩko ĩla ĩngĩ. Nĩmakwatĩĩie moko make na kũmokĩlya ĩũlũ nginya syũa yathi kũthũa.

¹³ Kwa nzĩa ĩsu Yosua nĩwasindie Aamaleki vyũ.

¹⁴ Nĩvo ĩndĩ Mwĩai Ngai wamwĩie Mwose atĩĩ, “Andĩka ũeleetye ĩũlũ wa ũsindi ũũ nĩ kana andũ makaũlilikanaa. Tavya Yosua kana ngamina Aamaleki vyũ.”

¹⁵ Mwose nĩwaakie kĩthembeo vau na akĩta: “Mwĩai Ngai nĩwe Kĩvevelo kya ũsindi wakwa.”

¹⁶ Mwose nĩwaisye atĩĩ, “Ũkĩlyai ĩũlũ kĩvevelo kya ũsindi kya Mwĩai Ngai! Mwĩai Ngai akaendeea kũkita na Aamaleki tene na tene!”