Kuma 11 - MBIVILIA ŨVOO MŨSEO

Kũawa kwa Makithathi Onthe ma Nthĩ ya Misili

¹ Mwĩai Ngai nĩweeie Mwose atĩĩ, “Nĩngũete ũkany'o ũngĩ ũmwe kũla kwĩ mũsumbĩ wa Misili na andũ onthe na nthĩ yake. Ĩtina wa ũu nũkũmũlekya mume kũu mũthi. Amũlekya mũthi nũkũmũlũngya vyũ.

² Tavya andũ ma Ĩsilaeli, aũme na aka metye atũi moo syĩndũ sya wanake sya silĩva na sya thaavu.”

³ Mwĩai Ngai nĩwatumie andũ ma Misili manenga andũ ma Ĩsilaeli ndaĩa. O ta ũu o nake Mwose nĩwanengetwe ndaĩa nĩ andũ onthe ma Misili na anini ma mũsumbĩ.

⁴ Mwose nĩweeie mũsumbĩ atĩĩ, “Ũũ nĩw'o Mwĩai Ngai ũkwasya, ‘Ta ũtukũ katĩ nĩngwĩsĩla kĩla vandũ nthĩ ya Misili;

⁵ mũndũ-ũme ũla wa mbee kũsyawa mĩsyĩnĩ ya andũ ma Misili nũkũkw'a, kwambĩĩa na mwana wa mũsumbĩ ũla waĩlĩte kũtiĩwa ũsumbĩ, kũvikĩa mwana wa mũndũ ũla wovetwe yela. O ta ũu kĩla nyamũ nũme ya indo ĩla yasyaiwe mbee o nayo nĩkũkw'a.

⁶ Kwĩĩthĩwa kĩĩo kĩnene nthĩ yonthe ya Misili kĩla kĩtaaĩthĩwa na kĩtakethĩwa ĩngĩ.

⁷ Ĩndĩ kũiĩthĩwa mũisyo o na ũmwe kwa andũ ma Ĩsilaeli kana kwa indo syoo, o na ngitĩ ndĩkamakũmĩa. Kĩu nĩkĩũtuma mũmanya kana Mwĩai Ngai nũvathũkanasya andũ ma Misili na ala ma Ĩsilaeli.’ ”

⁸ Mwose nĩwaminũkĩlĩĩlye na kwasya atĩĩ, “Anini maku onthe nĩmekũka na kwĩnyivya mbee wakwa kwa kũtulya ndu na kũmbĩsũva nose andũ ma mbaĩ yakwa tũthi.” Mwose nĩwaumie vala ve mũsumbĩ athatĩte mũno.

⁹ Nĩvo ĩndĩ Mwĩai Ngai weeie Mwose atĩĩ, “Mũsumbĩ ndekwĩthukĩĩsya nĩ kana nĩke maũndũ angĩ ma kũseng'ya nthĩ ya Misili.”

¹⁰ Mwose na Alũni nĩmeekie maũndũ asu onthe ma kũseng'ya mbee wa mũsumbĩ; ĩndĩ Mwĩai Ngai atuma mũsumbĩ omya ngoo na kwoou alea kũlekya andũ ma Ĩsilaeli mathi maume nthĩ ĩsu yake.