ISAIA 66 - MBIVILIA ŨVOO MŨSEO

Mwĩai Ngai Akasilĩla Nthĩ na Kũathima Saioni

¹ Mwĩai Ngai easya atĩĩ, “Ĩtu nĩ kĩvĩla kyakwa kya kĩ-ũsumbĩ, nayo nthĩ nĩ kĩvĩla kya kũkinyĩthya maũũ makwa. Kwoou nĩ nyũmba myaũ mũtonya kũmbakĩa, kana nĩva nyie ndonya kwĩkala?

² Ninyie noombie syĩndũ ii syonthe, kwoou syonthe nĩ syakwa. Nĩasya ũu nyie Mwĩai Ngai. Ĩndĩ nyie nendeeaw'a nĩ mũndũ ũla mũuu na wĩlilaa, na ũtetemaa nĩ w'ĩa eew'a ndeto yakwa.

³ “Ĩndĩ andũ aa mekaa ũndũ mekwenda, na matanĩaa kwĩka maũndũ ma kũthatya. Ũla ũthembaa ng'ombe, no ũndũ ũmwe na ũla ũthembaa mũndũ. Ũla ũthembaa ĩlondu, no ũndũ ũmwe na ũla ũthembaa ngitĩ. Ũla wumasya nthembo ya mbaa mbeke, no ũndũ ũmwe na ũla wumasya nthembo ya nthakame ya ngũlũe. Ũla wumasya nthembo ya ũvani, no ũndũ ũmwe na ũla ũthaithaa mĩvw'anano.

⁴ Kwoou ngamaetee thĩna, na ngĩtuma makwatwa nĩ kĩla makĩaa, nũndũ yĩla neetanie, vai mũndũ waaĩtĩka, yĩla naneenie, mayaambĩthukĩĩsya, ĩndĩ nĩmeekie maũndũ ala nonaa me mathũku, na manyuva kĩla kĩtambendeeasya.”

⁵ Ĩthukĩĩsyei ndeto ya Mwĩai Ngai, inyw'ĩ ala mũtetemaa nĩ w'ĩa mweew'a ndeto yake: “Andũ menyu ala mamũmenete, ala mamũleaa nũndũ wakwa, maneenete makasya atĩĩ, ‘Mwĩai Ngai nĩakumw'e, nĩ kana twone mũitana.’ Ĩndĩ andũ asu nĩmo makasonokw'a.

⁶ Ĩthukĩĩsyei mwĩw'e andũ mailonzany'a ndũanĩ! Wasya ũkuma Ĩkalũnĩ! Wasya wa Mwĩai Ngai, aiĩvanĩsya amaitha make!

⁷ “Ndũa yakwa nĩ ta mũndũ mũka ũkũsyaa atanamba kwaũnya, ũla ũsyaa kavĩsĩ atanamba kwĩw'a woo wa kũsyaa.

⁸ Nũũ waaĩw'a ũndũ ta ũsu? Nũũ waaona maũndũ ta asu? Nthĩ yonthe nĩtonya kũsyawa mũthenya o ũmwe? Mbaĩ nĩtonya kũsyawa kwa kavinda o kanini? Nĩkwĩthĩwa yĩla Saioni yambĩĩie kwaũnya oou, nĩyasyaie syana syayo.

⁹ Nyie Mwĩai Ngai nĩkũlya, ngaeka andũ makwa mekale ĩvunĩ nginya mavikĩe kũsyawa na ngĩlea kũmasyaa? Nyie Ngai wenyu nĩkũlya, ngaeka andũ makwa mavikĩe ĩvinda ya kũsyawa na mailea kũsyawa?”

¹⁰ Inyw'ĩ ala mwendete Yelũsalemu, tanai vamwe nayo na mũyĩw'a mũyo. Inyw'ĩ ala mũĩaa nũndũ wa Yelũsalemu, tanai vamwe nayo mwĩ na mũyo.

¹¹ O tondũ kĩveti kyongasya kana kakeanĩwa, now'o o nayo Yelũsalemu ĩkamwĩanĩsya na ũthwii wayo mwingĩ.

¹² Mwĩai Ngai easya atĩĩ, “Ngaetee Yelũsalemu mũuo ta ũsĩ, na ũthwii wa nthĩ ingĩ ta ũsĩ wusũĩte ũkakĩla. Nenyu mũkeethĩwa mũilyĩ ta kana kekwongw'a nĩ nyinyia akakuĩte e na wendo mwingĩ.

¹³ O tondũ kana kakiakiaw'a nĩ nyinyia, now'o nakwa ngamũkiakisya, mũkakiakiĩw'a Yelũsalemu.

¹⁴ Yĩla mwĩona maũndũ asu meekĩka mũkatana, mũkaaĩla ta nyeki nziũ. Nĩvo ĩndĩ andũ memanya kana nyie Mwĩai Ngai nĩ vamwe na athũkũmi makwa, ĩndĩ nĩnthatĩaa amaitha makwa.”

¹⁵ Mwĩai Ngai akooka e na mwaki, na makasya make ma kaũ mailyĩ ta kĩlingi, eyĩĩvanĩsye e na ũthatu mwingĩ, na kũkany'a andũ aitũmĩa mũĩ sya mwaki.

¹⁶ Mwĩai Ngai akasilĩla andũ na mwaki, na aisilĩla andũ onthe na ũvyũ wake, na akoaa andũ aingĩ.

¹⁷ Mwĩai Ngai easya atĩĩ, “Ala mevathaa na kwĩthesya nĩ kana makathie mĩũndanĩ, maatĩĩe mũthembi ũla wĩ katĩ woo, maiya nyama sya ngũlũe na mbĩa na malĩu angĩ ala mavatanĩtwe, onthe makakw'a vamwe.

¹⁸ Nĩnĩsĩ meko moo na mosũanĩo moo. Nũkĩte kũmbany'a andũ ma mbaĩ syonthe na ithyomo syonthe; onthe makoombana vamwe na mayona ũtheu wakwa mũtisu.

¹⁹ Ngeekĩa wonany'o katĩ woo. Ala metiala ngamatwaa mbaĩnĩ ingĩ; ngamatwaa Talisisi, Limbya na Luti, kwa ala mesĩkĩe kwa kũtũmĩa ũta, Tuvali na Yavani, na nthĩ ila syĩ kũndũ kũasa ũtee wa ũkanga, kwa andũ ala mataaĩw'a nguma syakwa kana makona ũtheu wakwa mũtisu. Makatavany'a ũnene wakwa mbaĩnĩ isu.

²⁰ Makaete ana-a-ĩthe menyu onthe kuma mbaĩnĩ ila ingĩ ta nthembo kũla nĩĩ nyie Mwĩai Ngai. Makamaete kĩĩmanĩ kyakwa kĩtheu malĩsĩte mbalasinĩ, makasyanĩ ma kaũ, makasyanĩ angĩ, nyũmbũnĩ na ngamĩlenĩ. Makamaete ũndũ andũ ma Ĩsilaeli maetae nthembo yoo ya ngetha ya mbaa mbeke, nyũmbanĩ yakwa nyie Mwĩai Ngai yĩkĩĩtwe syĩndũnĩ ntheu.

²¹ O ta ũu nganyuva amwe moo matw'ĩke athembi na Alivai. Nĩasya ũu nyie Mwĩai Ngai.

²² “Nyie Mwĩai Ngai nĩasya kana o tondũ ĩtu yeũ na nthĩ nzaũ ila ngũmba ikekalaa tene na tene, now'o nzyawa syenyu na ĩsyĩtwa yenyu ikekalaa.

²³ Andũ onthe makookaa kũnthaitha kĩla Mboka ya Kũtisa kwa Mwei, na kĩla mũthenya wa Savato. Nĩasya ũu nyie Mwĩai Ngai.

²⁴ “Ĩtina wa ũu makathi kũsisya simba sya andũ ala mang'endeie. Iinyũ ila syĩmaya iikakw'a na mwaki ũla wĩmavĩvya ndũkavow'a na makeethĩwa ũthatyo kwa andũ onthe.”