WATHI 8 - YÎ NA MAVUKU MA NDIŨTELOKANONI

¹ Kethĩwa we wĩ mwana-a-ia, ũla woongie nondo sya mwaitũ! Ngakomanĩa naku nza, ngũkethya na ngethi ya wendo, na ũyĩthĩa vai mũndũ ũmbũthya.

² Ngũtongoesya ngaũete nyũmba kwa mwaitũ, kasũmbanĩ ka ũla wanzyaie. Ngũnenga ndivai mbulany'e, ngũnenga ndivai ya makũngũmanga makwa.

³ Kw'oko kwake kwa aka kwĩ ungu wa mũtwe wakwa, kw'oko kwake kwa aũme nĩkũngumbatĩlye.

⁴ Inyw'ĩ eĩtu ma Yelũsalemu, nĩngũmũkũlya mwĩvĩte, kana mũiambĩĩsya kana kũamũkya wendo, nginya yĩla ĩvinda yaw'o yĩvika.

Wathi wa Thanthatũ Aka

⁵ Nũũ ũũ wambatĩte kuma weũnĩ, eyaĩĩsye mwendwa wake? Nyie nĩnakũamũkisye ungu wa mũtĩ wa mũevo, vau nĩvo inyia waku wakwaũnyĩie, vau nĩvo ũla wakũsyaie waũnyĩie.

Mũtwawa

⁶ Mbĩkĩe ta mũulĩ ngoonĩ yaku, ĩĩ, ta mũulĩ kw'okonĩ kwaku, nũndũ wendo wĩ vinya ta kĩkw'ũ, nakyo kĩwĩu kyaw'o nĩ kyathe ta mbũa. Wakanaa ta mwaki, wakanaa ta ũlĩlĩnzĩ mũnene.

⁷ Kĩw'ũ kingĩ kĩitonya kũvosya wendo, o na kĩw'ũ kingĩ kĩitonya kũũvw'ĩka. O na mũndũ akanengane syĩndũ syonthe sya nyũmba yake athooe wendo, akwata o kĩvũthya kĩthei.

Ana-a-inyia ma Mũtwawa

⁸ Twĩ na mwĩĩtu-a-ia mũnini, na ndanamba kumya nondo. Tũkeekana na mwĩĩtu-a-ia waitũ ata, mũthenya ũla wĩĩvaw'a?

⁹ Kethĩwa mwĩĩtu-a-ia nĩ ũkũta, tũmwakĩĩa mwako mũtũlu wa silĩva; kethĩwa nĩ mũomo, tũmũsiĩĩa na mbwaũ sya mũkũũ.

Mũtwawa

¹⁰ Nyie naĩ ũkũta, na nondo syakwa syaĩ ta myako mĩtũlu. Kwoou nĩ mbee wake, nailyĩ ta mũndũ ũla ũetae mũuo.

Mũtwaani

¹¹ Solomoni aĩ na mũũnda wa mĩsavivũ waĩ Mbaali-amoni; nĩwakomboethisye aĩmi mũũnda ũsu, kĩla ũmwe aĩvaa mbesa sya silĩva ngili ĩmwe.

¹² Mũũnda wakwa wa mĩsavivũ nĩ wakwa mwene, na nĩ kwondũ wakwa mwene; we Solomoni osa ngili syaku sya silĩva, na kĩla mũsũvĩi wa matunda ayosa maana elĩ make.

¹³ We ũla wĩkalaa mĩũndanĩ, anyanyawa meĩthukĩĩsya wasya waku; eka nĩwĩw'e!

Mũtwawa

¹⁴ Ĩkalaate mwendwa wakwa, ĩthĩwa ũilyĩ ta nthwaia kana ta ndaatai nũme ya mũika, yĩ iĩmanĩ sya mĩtĩ yĩ mũuke mũseo.