WATHI 3 - YÎ NA MAVUKU MA NDIŨTELOKANONI

¹ Ũtukũ nĩ ũkomonĩ wakwa, nĩnaotie ngĩmantha ũla ngoo yakwa yendete; nĩnamũmanthie ĩndĩ ndyaamwona.

² Nĩnaisye atĩĩ, “Nĩngũamũka yu na ngĩthi ngangange ndũanĩ, nzĩanĩ syayo, o na tũsĩlanĩ twayo, nĩmũmanthe ũla ngoo yakwa yendete.” Nĩnamũmanthie ĩndĩ ndyaamwona.

³ Asyaĩĩsya nĩmambonie, maendee kwanganga maisyaĩĩsya ndũa. Nĩnamakũlilye atĩĩ, “Mũũmbonea ũla ngoo yakwa yendete?”

⁴ Nataanĩsya namo oou, nĩnoonie ũla ngoo yakwa yendete. Nĩnamũkwatie, na ndyaĩ nĩmũeka athi, nginya yĩla namũtwaie nyũmba kwa mwaitũ, nginya kasũmbanĩ ka ũla wanzyaie.

⁵ Inyw'ĩ eĩtu ma Yelũsalemu, ĩvĩtei na nthwaia kana na ndaatai, kana mũiambĩĩsya kana kũamũkya wendo, nginya yĩla ĩvinda yaw'o yĩvika.

Wathi wa Katatũ Mũtwawa

⁶ Nũũ ũya wũkĩte kuma weũnĩ ailyĩ ta kĩlingi, anyungĩthĩtw'e nesa na mauta ma manemane kana ũvani wa thooa mũnene wĩtawa ũvumba, na mauta onthe me mũuke mũseo ma mũthoosya?

⁷ Kaĩ nĩ kĩvĩla kĩla Solomoni ũkuawa nakyo, kĩthyũlũlũkĩtwe nĩ ngũmbaũ mĩongo thanthatũ, katĩ wa ngũmbaũ sya Ĩsilaeli.

⁸ Kĩla ũmwe akwete ũvyũ, na nĩwĩsĩ kũkita nesa, kĩla ũmwe ovee ũvyũ wake kĩnyunyunĩ, eyũmbanĩsye mĩisyo ya ũtukũ.

⁹ Mũsumbĩ Solomoni nĩweeseũvĩisye kĩvĩla kya kũmũkuaa, akĩseũvisye na mbwaũ kuma Levanoni.

¹⁰ Ituĩ syakyo aiseũvisye na silĩva, vandũ va kwaĩĩa avaseũvisye na thaavu; vala kĩkalĩlawa avaseũvya na itambaa sya langi wa langi wa nzambalaũ, itumĩtwe na wendo nĩ eĩtu ma Yelũsalemu.

¹¹ Umaalai inyw'ĩ eĩtu ma Saioni, na mũyona mũsumbĩ Solomoni; ekĩĩte ngovia ya mũtwaani ĩla weekĩiwe nĩ inyia wake mũthenya ũla watwaanaa, ĩĩ, mũthenya ũla ngoo yake yaĩ na ũtanu.