WATHI 2 - YÎ NA MAVUKU MA NDIŨTELOKANONI

¹ Nyie nĩ ĩlaa ya losi kuma Saloni, ĩlaa ya lili ya myandanĩ.

Mũtwaani

² Ta ĩlaa ya lili katĩ wa mĩw'a, now'o mwendwa wakwa ũilyĩ katĩ wa eĩtu.

Mũtwawa

³ O tondũ mũtĩ wa mũevo ũilyĩ wĩ katĩ wa mĩtĩ ya kĩthekanĩ, now'o mwendwa wakwa ũilyĩ e katĩ wa aũme ma mũika. Nĩnekalile ungu wa muunyĩ wa mũtĩ ũsu nĩ na ũtanu mwingĩ, na ĩtunda yaw'o yaĩ mũyo kwakwa.

⁴ Nĩwandwaie nyũmbanĩ ya mboka, na kĩvevelo kyake ĩũlũ wakwa kyaĩ wendo.

⁵ Mbĩkĩai vinya na nzavivũ mbovu, mbuũkyei na matunda ma mũevo, nũndũ nĩnĩwaĩtw'e nĩ wendo!

⁶ Kw'oko kwake kwa aka kwĩ ungu wa mũtwe wakwa, kw'oko kwake kwa aũme nĩkũngumbatĩlye.

⁷ Inyw'ĩ eĩtu ma Yelũsalemu, ĩvĩtei na nthwaia kana na ndaatai sya kĩthekanĩ, kana mũiambĩĩsya kana kũamũkya wendo, nginya yĩla ĩvinda yaw'o yĩvika.

Wathi wa Kelĩ Mũtwawa

⁸ Ĩw'a! Wasya wa mwendwa wakwa! Nũũya okĩte; atũlĩlangĩle iĩmanĩ, athaanyũkangĩle tũlĩmanĩ.

⁹ Mwendwa wakwa ailyĩ nthwaia, kana ndaatai nũme ya mũika. Nũũya aũngamĩte ĩtina wa ũkũta witũ, aikunĩkĩla nthĩnĩ kwĩsĩla ndĩlĩsyanĩ, na kũsisya kwĩsĩla syũmanĩ sya ndĩlĩsya.

¹⁰ Mwendwa wakwa nĩwaneenie nakwa ambĩa atĩĩ, “Ũkĩla mwendwa wakwa, ũla ũmbendeeasya, ũka twĩyĩendee,

¹¹ nũndũ nĩw'o mbua nĩ nthelu, na ĩvinda ya mbevo nĩ ĩthelu na ĩkathi.

¹² Malaa nĩmalaũku kĩla vandũ, na ĩvinda ya kwina nĩ ĩviku, na wasya wa ĩvũĩ nũkwĩw'ĩka kũũ nthĩ yaitũ.

¹³ Mĩkũyũ nĩyambĩĩe kumya mosyao, na mĩsavivũ nĩ mĩlaũku, yĩumya mũuke mũseo. Ũkĩla mwendwa wakwa ũla ũmbendeeasya, ũka twĩyĩendee.”

¹⁴ We ĩvũĩ yakwa, wĩ mũvatĩnĩ wa ĩvia, ũvithĩtwe nĩ ũvai, kwaeka none ũthyũ waku, kwaeka nĩw'e wasya waku, nũndũ wasya waku nĩ wa kwendeesya, na ũthyũ waku nĩ mwanake.

¹⁵ Tũkwatĩei mbĩwa, mbĩwa ila nini, ila syanangaa mĩũnda ya mĩsavivũ, nũndũ mĩũnda yaitũ ya mĩsavivũ nĩ mĩlaũku.

¹⁶ Mwendwa wakwa nĩ wakwa, nakwa nĩ wake, aĩthasya ndĩthya yake ya mbũi na malondu malaanĩ ma lili,

¹⁷ kũvika syũa yausya, na myuunyĩ ĩithela. Mwendwa wakwa, syoka ũsembete ta nthwaia, kana ta ndaatai nũme ya mũika iĩmanĩ sya Mbethi-eli.