SAVULI 147 - YÎ NA MAVUKU MA NDIŨTELOKANONI

Kũtaĩa Ngai Mwene Ũtonyi W'onthe

¹ Mũtaĩei Mwĩai Ngai! Nĩ ũseo kũtaĩa Ngai waitũ, nũndũ nĩ mũseo na wathi wa kũmũtaĩa nĩwaĩlĩte.

² Mwĩai Ngai nĩwakaa Yelũsalemu; nĩwũmbanasya andũ ma Ĩsilaeli ala me ũeninĩ.

³ Nũvoasya ala akw'ũ ngoo, na kwova kũla maũmĩĩtw'e.

⁴ Nũtalaa ndata ũndũ syĩana, nĩwĩtaa kĩla ĩmwe na ĩsyĩtwa ya yo.

⁵ Mwĩai Ngai waitũ nĩ mũnene na e vinya mwingĩ, ũmanyi wake ndũthimĩka.

⁶ Mwĩai Ngai nĩwũkĩlasya ala avinyĩĩe, ĩndĩ nũvalũkasya nthĩ ala athũku.

⁷ Inĩai Mwĩai Ngai mbathi sya kũtũnga mũvea; inĩai Ngai waitũ mbathi mũkũnĩte ngitaa nini!

⁸ Nũvw'ĩkaa yayaya na mathweo, nũeteae nthĩ mbua, nũtumaa nyeki ĩmea iĩmanĩ.

⁹ Nũnengae nyamũ lĩu wasyo, na kũĩthya tũswii twa ngũngũũ yĩla twakaya.

¹⁰ Ndatanaw'a nĩ vinya wa mbalasi, o na ndew'ĩthaw'a mũyo nĩ ũkũmbaũ wa asikalĩ.

¹¹ Ĩndĩ nũtanĩthaw'a nĩ ala me na kĩkĩo kyake, ala mekwatasya wendo wake ũtaolekaa.

¹² We Yelũsalemu taĩa Mwĩai Ngai! We Saioni taĩa Ngai waku!

¹³ Nũndũ nĩwĩkalasya mĩvĩa yaku yĩ mĩlũmu; nũathimaa andũ ala me nthĩnĩ waku.

¹⁴ Nũtumaa mũuo wĩthĩwa mĩvakanĩ yaku; nũkũvũnĩthasya na nganũ ĩla nzeo.

¹⁵ Nũnenganae mwĩao wake ĩũlũ wa nthĩ, na kĩla waweta kĩyĩkwa mĩtũkĩ.

¹⁶ Nũnyaĩĩkasya ĩa ta w'ĩa wa malondu, na kũnyaĩĩkya ĩmwe ta mũu.

¹⁷ Nũetae mbua yake ya mavia ta kĩthangathĩ; vai mũndũ ũtonya kwĩyũmĩĩsya mbevo ĩla ũetae.

¹⁸ Nũneenaa ndeto na ĩa yĩinyaĩĩka; nũetae kĩseve na kĩw'ũ kĩivĩta.

¹⁹ Nũnengae Yakovo ndeto yake, na Ĩsilaeli motw'ĩo na myamũlo yake.

²⁰ Ndaaĩka nthĩ ĩngĩ o na yĩva ũu; nthĩ ingĩ iyĩsĩ myamũlo yake. Mũtaĩei Mwĩai Ngai!