Osea 9 - YÎ NA MAVUKU MA NDIŨTELOKANONI

Osea Aitavany'a Ũkany'o wa Andũ ma Ĩsilaeli

¹ Inyw'ĩ andũ ma Ĩsilaeli mũikatane! Mũikatane ta mbaĩ ila ingĩ, nũndũ mwĩthĩĩtwe mũte aĩkĩĩku mũkamũtia Ngai wenyu, mwĩthooetye ta malwaya na kũthembea ngai ingĩ nthembo mwĩ ivũĩonĩ.

² Ivũĩonĩ na kũla ndivai yiawa kũikethĩwa kĩndũ, na mũkanyivĩwa nĩ ndivai nzaũ.

³ Andũ ma Ĩsilaeli maikaendeea kwĩkala nthĩ ya Mwĩai Ngai, ĩndĩ makasyoka Misili na maiya lĩu mũvuku me Asuli.

⁴ Maikathembea Mwĩai Ngai nthembo ya ndivai, o na nthembo syoo iikamwendeesya. Lĩu woo ũkeethĩwa ta lĩu ũla ũĩsawa mathikonĩ; onthe ala meya lĩu ũsu makeethĩwa me avuku. Lĩu ũsu ũkeethĩwa wĩ woo me oka, ndũkathembewa Mwĩai Ngai Ĩkalũnĩ yake.

⁵ Mũkeeka ata yĩla ĩvinda ya mboka ila itw'ĩtwe yĩvika? Mĩthenya ya mboka sya Mwĩai Ngai.

⁶ O na kau mũkasemba mũkĩĩte mũikaminwe, Misili ĩkamũmbany'a na mũithikwa Memivisi. Syĩndũ syenyu sya vata sya silĩva ĩkavw'ĩkwa nĩ syĩnyeelya, na maeemanĩ menyu vakamea mĩw'a.

⁷ Ĩvinda ya ũkany'o nĩ ĩviku, ĩvinda ya kũtuvwa nĩ ĩviku; andũ ma Ĩsilaeli mamanye ũu. Naĩ syenyu nĩ mbingĩ mũno, na kĩmena kyenyu nĩ kingĩ; mwathani atalawa ta mũndũ mũtumanu, mũndũ ũsu mũvevee atalawa ta wĩ na ndũũka.

⁸ Mwathani nĩwe mũsyaĩĩsya wa Evalaimu andũ ma Ngai wakwa, ĩndĩ ũu wĩ o vo ateetwe nzĩanĩ syonthe, na ve kĩmena nyũmbanĩ ya Ngai wake.

⁹ Meyanangĩte mũno, ta ĩvinda ya Ngivea; Ngai akalilikana ĩvĩtyo yoo, na kũmakany'a nũndũ wa naĩ yoo.

Naĩ ya Andũ ma Ĩsilaeli na Ũsyao Wayo

¹⁰ Mwĩai Ngai easya atĩĩ, “Yĩla neethĩie Ĩsilaeli, kũu kwailyĩ ta kwĩthĩa nzavivũ weũnĩ. Yĩla noonie aaũmae menyu mbee, kũu kwailyĩ ta kwona ĩtunda ya mbee ya mũkũyũ. Ĩndĩ yĩla mookie Mbaali-veoli, nĩmeenenganie kũthaitha Mbaali mũvw'anano wa kũthatya, na matw'ĩka andũ ma kũthatya ta mũvw'anano ũsu mendie.

¹¹ Nguma sya Evalaimu ikaũlũka ta nyũnyi, vaikethĩwa mũndũ ũsyaa, mũito kana ũitava!

¹² O na maea syana ngasyosa, na vai kamwe ngatia ke thayũ; kyeva nĩ kwoo yĩla ngamatia!”

¹³ Ũndũ ngwona, ana ma Evalaimu nĩmeũsyĩmwa; Evalaimu no nginya atongoesye ana make makoawe.

¹⁴ Manenge ame Mwĩai Ngai; wĩmanenga kyaũ? Manenge mavu metĩkaa na nondo ite ĩia.

Ũsilĩlo wa Mwĩai Ngai kwa Andũ ma Ĩsilaeli

¹⁵ Mwĩai Ngai easya atĩĩ, “Meko mathũku ma Ĩsilaeli mambĩĩie Ngilikali; vau nĩvo nambĩĩe kũmamenea. Nũndũ wa ũthũku wa meko moo, ngamalũngya maume nthĩ yakwa. Ndikamenda ĩngĩ; atongoi moo nĩmaleanĩte nakwa.

¹⁶ Andũ ma Evalaimu nĩ akũne, mailyĩ ta mwĩi mũmũ, maikasyaa ĩtunda o na yĩmwe. O na masyaa, ngooaa syana syoo ila mendete.”

Mwathani Aineena ĩũlũ wa Ĩsilaeli

¹⁷ Ngai wakwa akalea andũ ma Ĩsilaeli, nũndũ nĩmaleile kũmwĩthukĩĩsya. Makangangaa katĩ wa mbaĩ ila ingĩ.