Osea 4 - YÎ NA MAVUKU MA NDIŨTELOKANONI

Mwĩai Ngai Aitũla Andũ ma Ĩsilaeli Mũtĩ

¹ Inyw'ĩ andũ ma Ĩsilaeli ĩthukĩĩsyei ndeto sya Mwĩai Ngai: Mwĩai Ngai e na ĩteta na andũ ma nthĩ ĩno; nthĩ ĩno ndĩ na ũĩkĩĩku kana wendo kana kũmũmanya Ngai.

² Vai ũndũ ũngĩ ate o kwĩvĩta mana na ĩsyĩtwa ya Ngai, kũkengana, kũaana, kũya na kũlaalaa. Maũndũ mathũku nĩmongelekaa, wũaani ũatĩanĩaa kĩla ĩvinda.

³ Nũndũ wa ũu nthĩ ĩkeethĩwa na kĩĩo, na onthe ala matũaa ĩũlũ wa nthĩ maithela vamwe na nyamũ sya kĩtheka, nyũnyi sya yayaya, o na makũyũ ma ũkanganĩ nĩmeũkw'a.

Mwĩai Ngai Aitũla Athembi Mũtĩ

⁴ Ĩndĩ vaikatate kwĩthĩwa mũndũ ũsikatwa, kana ũtũlwa mũtĩ, nũndũ nue ngũsikata we mũthembi wakwa.

⁵ Ũkaluluutĩkaa mũthenya, na ũkaluluutĩkaa wĩ na mwathani ũtukũ, na ngamina inyia waku.

⁶ Andũ makwa nĩmanangawa nũndũ mai na ũmanyi; nũndũ nũleete ũmanyi, nakwa nĩngũũlea ndũkethĩwe mũthembi wakwa. Nũndũ nĩwũlĩtwe nĩ Mwĩao wa Ngai waku, o nakwa ngoolwa nĩ syana syaku.

⁷ O ũndũ athembi maendeeie kwongeleka, now'o maendeeie kũmbĩtĩsya; ngatw'ĩkĩthya nguma syoo nthoni.

⁸ Makwataa ũthwii kumana na naĩ sya andũ makwa, na kwoou meenda andũ maendee kwĩka naĩ.

⁹ Na kũkeethĩwa kana o ũndũ andũ mailyĩ, now'o athembi mailyĩ, nakwa ngamakany'a nũndũ wa mĩendele yoo, na ngĩmaĩvanĩsya nũndũ wa meko moo.

¹⁰ Makaya, na maikavũna; makeekaa ũmalwaya, na maikongeleka, nũndũ nĩmandekete nyie Mwĩai Ngai, nĩ kana matanĩe kwĩka ũmalwaya.

¹¹ Ndivai na ndivai nzaũ, itumaa mũndũ asya ũmanyi.

Ngai Ailea Ũthaithi wa Mĩvw'anano.

¹² Andũ makwa makũlasya ũtao kuma kwa ngai ya mũvw'anano ya mũtĩ, na ndata ĩla me nayo nĩmavuanĩasya. Veva wa ũmalwaya nũtumĩte maa, na nĩmaekete Ngai woo meke ũmalwaya.

¹³ Mathembeaa iĩmanĩ ĩũlũ, na kumĩsya nthembo tũlĩmanĩ, ungu wa mĩtĩ ya myalonĩ na mĩlivina, na mĩtĩ ya mĩelo nũndũ muunyĩ wayo nĩ mũseo. Kwoou eĩtu menyu nĩmatw'ĩkaa malwaya, na iveti sya ana menyu kũtw'ĩka ilaalai.

¹⁴ Ndikakany'a eĩtu menyu meeka ũmalwaya, kana iveti sya ana menyu syatw'ĩka ilaalai, nũndũ aũme nĩmosaa aka malwaya, na kũthemba me vamwe na malwaya ma kĩ-ũthaithi. Andũ matekũsũanĩa makaanangwa.

¹⁵ O na vala we Ĩsilaeli nĩwĩkaa ũlaalai, ndũkatume Yuta avĩtya. Ndũkalike Ngilikali, kana ũthi Mbethi-aveni, na ndũkatate kwĩvĩta wasye, “O tondũ Mwĩai Ngai wĩ thayũ.”

¹⁶ Andũ ma Ĩsilaeli nĩ ang'endu ta moi ng'endu, yu ĩndĩ Mwĩai Ngai atonya ata kũmaĩthya ta malondu kĩsesinĩ kĩthanthau?

¹⁷ Ĩsilaeli nũlikanĩte na ngai sya mĩvw'anano, ekana nake e weka.

¹⁸ Mamina kũnyw'a, mekaa ũmalwaya ĩvinda yonthe, mendete maũndũ me nthoni kwĩ kũnengwa ndaĩa.

¹⁹ Makakuwa nĩ kĩlingi, na makasonokw'a nĩ nthembo syoo.