NTHIMO 9 - YÎ NA MAVUKU MA NDIŨTELOKANONI

Ũĩ na Ũtumanu

¹ Ũĩ nĩwakĩte nyũmba yaw'o, nyũmba yĩna ituĩ mũonza.

² Nũthĩnzĩte nyamũ syaw'o kwondũ wa mboka, na ũkaseũvya ndivai yaw'o, na o ta ũu nĩwalanĩtye mesa yaw'o.

³ Nũtũmĩte athũkũmi maw'o eĩtu, maketanĩe kũndũ kũtũlu ndũanĩ mayasya,

⁴ “Ũla ũte na ũĩ, nĩathũkĩle vaa!” Na ũla ũte na ũmanyi, ũĩ wĩmwĩa atĩĩ,

⁵ “Ũka ũye lĩu wakwa, na ũinyw'a ndivai ĩla nĩseũvĩtye.

⁶ Eka kwĩthĩwa wĩ mũtumanu, na ũkekala thayũ; endaa ũtongoew'e nĩ ũmanyi.”

⁷ Ũla wonasya mũndũ wĩ kĩvũthya mavĩtyo nũumangawa, na ũla ũkanasya mũndũ mũthũku nũũmĩaa.

⁸ Ndũkakany'e mũndũ wĩ kĩvũthya ndakese ũkũmena. Kany'a mũndũ mũĩ, nake akakwenda.

⁹ Manyĩsya mũndũ mũĩ, nake akaendeea kũĩva; manyĩsya mũndũ mũlũngalu, nake akaendeea kwongela ũmanyi.

¹⁰ Kũmũkĩa Mwĩai Ngai nĩw'o wambĩlĩĩlyo wa ũĩ, na kũmũmanya Ũla Mũtheu nĩkw'o kwĩthĩwa na ũmanyi.

¹¹ Nĩkwĩthĩwa kwa ũtethyo wakwa nyie ũĩ, mĩthenya ya thayũ waku ĩkaingĩvw'a, ũkongeleelwa myaka thayũnĩ waku.

¹² Ethĩwa wĩ mũĩ, ũĩ waku nue ũkatethya, ethĩwa wĩ kĩvũthya, nue wĩthĩna wĩ weka.

¹³ Mũndũ mũka mũtumanu e kĩlonzo kingĩ, ndethĩawa na ũmanyi na nde nthoni.

¹⁴ Ekalaa mũomonĩ wa nyũmba yake, ekalaa kĩvĩlanĩ kĩ vandũ vatũlu ndũanĩ.

¹⁵ Nĩwĩtaa ala mavĩtĩte, ala maendete kwĩka maũndũ moo na kũmea atĩĩ,

¹⁶ “Ũla ũte na ũĩ, nĩathũkĩle vaa!” O ta ũu nĩwĩaa ũla ũte na ũmanyi atĩĩ,

¹⁷ “Kĩw'ũ kyũyĩtwe kĩ mũyo, na lĩu ũla mũndũ ũĩsaa evithĩte nĩ wa kwendeesya.”

¹⁸ Ĩndĩ mũndũ ũsu ũte na ũĩ ndamanyaa kana andũ ala makwie me vau, aeni ma mũndũ mũka ũsu me kũndũ kũliku vala maveva ma ala akw'ũ mekalaa.