NTHIMO 7 - YÎ NA MAVUKU MA NDIŨTELOKANONI

Ũseleke wa Mũndũ Mũka Ĩlwaya

¹ Mwana wakwa, kwata ndeto syakwa, na kwiaa mĩao yakwa nthĩnĩ waku.

² Kwata mĩao yakwa naku ũkekala thayũ, sũvĩa momanyĩsyo makwa ũndũ ũsũvĩaa kyũma kya itho yaku.

³ Myovee syaanĩ syaku; mĩandĩke ngoonĩ yaku.

⁴ Tavya ũĩ atĩĩ, “Nue mwĩĩtu-a-ia wakwa.” Ĩta ũmanyi mũnyanyau ũla wa vakuvĩ vyũ.

⁵ Ikakũsũvĩa kuma kwa mũndũ mũka kĩlaalai, kuma kwa kĩveti kĩte kyaku kĩla kĩneenaa ndeto syĩ mũyo.

⁶ Nĩnasyaĩlilye ndĩlĩsyanĩ ya nyũmba yakwa, nasyaĩlya maimanĩ ma ndĩlĩsya ĩsu,

⁷ na noona anake aingĩ mate na ũmanyi, ĩndĩ katĩ woo noona mwanake ũmwe mũtumanu.

⁸ Mwanake ũsu esĩlĩte nzĩanĩ konanĩ vakuvĩ na vala mũndũ mũka ũsu watwĩe. Nĩvo ĩndĩ waendie na nzĩa ĩla ĩendete nyũmba kwa mũndũ mũka ũsu.

⁹ Kwaĩ ĩa mawĩoo, na kwaĩ kũnambĩĩa kũtuka, na kĩvindu kĩkambĩĩa kũka.

¹⁰ Nĩvo ĩndĩ mwanake ũsu wakomanie na mũndũ mũka ũsu, ũla weekĩĩte ngũa ta ĩlwaya, e na ũseleke ngoonĩ.

¹¹ Aĩ mũndũ mũka wĩ kĩlonzo kingĩ, na mũng'endu, atindĩaa kũthi, ndekalaa nyũmba kwake.

¹² Mavinda amwe eethĩawa nzĩanĩ, mavinda angĩ e ndũnyũ, na angĩ e konanĩ sya nzĩa oveesye.

¹³ Mũndũ mũka ũsu nĩwakumbatĩlilye mwanake ũsu na amũkethya na ngethi ya wendo, na amũsisya ate na nthoni amwĩa atĩĩ:

¹⁴ “Ũmũnthĩ nĩnĩthembie nthembo; nĩnĩanĩisye mawĩvĩto makwa.

¹⁵ Kwoou yu naumaala ngomane naku, ngũmanthe na kĩthing'ĩĩsyo, nayu nĩnakwona.

¹⁶ Nĩnalanĩtye ũkomo wakwa nesa, na suka sya langi mbanake kuma Misili.

¹⁷ Nĩnĩnyungĩthĩtye ũkomo wakwa nesa na mauta me mũuke mũseo metawa manemane, uuti, na angĩ metawa sinamoni.

¹⁸ Ũka tũthi tũkethĩwe na ĩvinda ya kũtanĩa wendo nginya kĩoko, ũka tũketanĩthye na wendo!

¹⁹ Nĩkwĩthĩwa mũũme wakwa nde mũsyĩ, nũnaendie kyalo kĩasa.

²⁰ Anakuie mbesa mbingĩ, na ndesyoka nginya syumwa ilĩ ithele.”

²¹ Kwoou mũndũ mũka ũsu nĩweesũvie mwanake ũsu na ndeto syake syĩ mũyo, na amũkusya na ndeto syake sya kwendeesya.

²² Mwanake ũsu nĩwamũatĩĩie mĩtũkĩ, aendete ta nzaũ ĩendete kĩthĩnzĩonĩ, na ta kĩlong'a kĩendete kũlika kĩteinĩ,

²³ nginya kĩkesa kũtonywa ĩtema nĩ ĩangi. O tondũ nyũnyi yĩkalaataa ĩkalike kĩteinĩ, ndamanyaa kana nũkwasya thayũ wake.

²⁴ Yu ĩndĩ ana makwa, mbĩthukĩĩsyei; ĩthukĩĩsyei ndeto ila ngũneena.

²⁵ Thayũ wenyu ndũkaatĩĩe mĩendele ya mũndũ mũka ũsu, kana mwae kwa kwĩsĩla nzĩanĩ syake;

²⁶ nĩkwĩthĩwa nũvalũkĩtye aingĩ, na nĩwũaĩte andũ aingĩ matatalĩka.

²⁷ Nyũmba yake nĩ nzĩa ya kũthi vala maveva ma ala akw'ũ mekalaa, ĩendete kũlika tũsũmbanĩ twa kĩkw'ũ.