NTHIMO 25 - YÎ NA MAVUKU MA NDIŨTELOKANONI

Nthimo ingĩ sya Solomoni

¹ Ii o nasyo nĩ nthimo ingĩ sya Solomoni ila syaumĩĩiw'e nĩ aandĩki ma Esekia mũsumbĩ wa Yuta:

² Tũnengae Ngai ndaĩa nũndũ wa kĩla ũvithĩte, ĩndĩ tũnengae asumbĩ ndaĩa nũndũ wa kĩla mavuanasya.

³ O tondũ matu me ĩũlũ mũno, na nthĩ yĩ ũliku mũnene, now'o mosũanĩo ma mũsumbĩ matekuũĩka.

⁴ Umya ĩko nthĩnĩ wa silĩva, na ũla ũseũvasya syĩndũ naw'o akaseũvya kĩndũ kĩseo.

⁵ Umya mũndũ mũthũku vala ve mũsumbĩ, na ũsumbĩ wake ũkalũlũmĩĩlw'a na ũlũngalu.

⁶ Ndũkekathĩĩe wĩ mbee wa mũsumbĩ, kana kwĩkala vala anene maĩlĩte kwĩkala,

⁷ nũndũ nĩ kavaa kwĩwa, “Ũka vaa mbee,” kũte kwĩwa wũkĩlĩle mũndũ ũngĩ mũnene mbee waku kĩvĩla. Kĩla weeyonea na metho maku,

⁸ ndũkakĩtwae kotinĩ na mĩtũkĩ, ndũkaĩwe nĩ ũndũ ũkwĩka ĩtina, mũtũi waku akwĩkĩĩthya nthoni.

⁹ Ethĩwa ndũkũeleanwa na mũtũi waku, ĩw'anai mwĩ elĩ; ndũkavuany'e kĩmbithĩ kya mũndũ ũngĩ;

¹⁰ walea kwĩka ũu, ũla wĩĩw'a akakwĩkĩĩthya nthoni, na ndũkaeka kũvũthw'a nĩ andũ.

¹¹ Ndeto ĩneenetwe ĩvinda yĩla yaĩlĩte, nĩ ta thaavu wũmbĩĩwe kĩndũnĩ kĩseũvĩtw'e na silĩva.

¹² Ũtao wa ũĩ ũnengetwe mũndũ wĩthukĩĩsye nesa, nĩ ta mbete ya thaavu kana wanake wa thaavu mũseo.

¹³ O tondũ mbevo ya ĩa yĩthĩawa ĩilyĩ ĩvinda ya ngetha, mũtũmwa mũĩkĩĩku ailyĩ ũu kwa ala mamũtũmaa, nũvuũkasya ngoo sya anene make.

¹⁴ Mũndũ ũla wĩkathĩĩaa kana nũkũnengane mũthĩnzĩo na ailea kwĩka ũu, ailyĩ ta matu na kĩseve ila itesaa kũete mbua.

¹⁵ Wũmĩĩsyo mwingĩ nũtumaa mũtongoi etĩkĩla ũndũ, ũĩmĩ mwololo nũtũlaa ĩvĩndĩ.

¹⁶ Weethĩa ũkĩ wa nzũkĩ vandũ, ya o ũla ũkwĩanĩe, waya mwingĩ nũũtavĩka.

¹⁷ Ndũkatindĩae kũthi kwa mũtũi waku kĩla ĩvinda, ndakese kũnow'a nue na aikũmena.

¹⁸ Mũndũ ũla ũkũsĩĩaa mũtũi wake ũvũngũ, ailyĩ ta nzũma, ũvyũ kana ĩangi yũĩ.

¹⁹ Kwĩkwatya mũndũ ũte mũĩkĩĩku ĩvindanĩ ya mathĩna, nĩ ũndũ ũmwe na ĩeo ĩthũku kana kũũ kũtĩsu.

²⁰ Ũla winĩaa mbathi mũndũ ũthatĩte, ailyĩ ta ũla wumasya ngũa ĩvinda ya mbevo, kana ũla wĩkĩaa ndivai ngaatu kĩtaunĩ.

²¹ Ethĩwa mũmaitha waku e na nzaa, mũathĩsye, na ethĩwa e na waũni mwĩkĩe kĩw'ũ anyw'e.

²² Weeka ũu ũkatuma akwatwa nĩ nthoni mbingĩ, nake Mwĩai Ngai akaũtuva.

²³ Kĩseve kuma ngalĩko ya ĩũlũ kĩetae mbua, nasyo nzukũ o ta ũu ietae kĩmena.

²⁴ Nĩ kavaa kwĩkala vandũ konanĩ nyũmbanĩ ĩũlũ, kũte kwĩkala nyũmba nthĩnĩ na mũndũ mũka wĩ ĩteta.

²⁵ Kwĩw'a ũvoo mũseo kuma nthĩ ya kũasa, nĩ ũndũ ũmwe na kũnenga mũndũ wĩ na waũni kĩw'ũ kĩthithu.

²⁶ Mũndũ mũlũngalu ũla wĩtĩkĩlaa kũatĩĩa maũndũ ma mũndũ mũthũku, ailyĩ nthongo nthokoany'e kana kĩthima kĩkinyange.

²⁷ Ti ũseo kũya ũkĩ mwingĩ wa nzũkĩ, o na ti ũseo mũndũ kwĩmanthĩa ndaĩa.

²⁸ Mũndũ wĩ ngoo ailyĩ ndũa mbithũkĩe, na ĩkaomboangwa ngũta syayo.