NTHIMO 23 - YÎ NA MAVUKU MA NDIŨTELOKANONI

-6-

¹ Wekala nthĩ ũĩsanĩe na mũsumbĩ, sũanĩa mũno ũla wĩ mbee waku nũũ.

² Ndũkaye mũno, ethĩwa wĩ ĩtomo ya lĩu.

³ Ndũkendeew'e nĩ lĩu wake mũseo, nũndũ nũtonya kwĩthĩwa wĩ lĩu wa ũkũkenga.

-7-

⁴ Ndũkenosye mũno ũtw'ĩke mũthwii, ĩthĩwa na ũĩ wa kwĩsũvĩana na ũndũ ũsu.

⁵ Kũveny'a na kũsalukya ũthwii ũsu nũthelaa, o mĩtũkĩ nũmeasya nthwau, na kũũlũka welekele matunĩ ta ndiũ.

-8-

⁶ Ndũkaye lĩu wa mũndũ mũtoonu, ndũkendeew'e nĩ lĩu wake mũseo.

⁷ Nĩkwĩthĩwa ngoonĩ yake ethĩawa aitala thooa wa kĩla ũũya. Aneenaa akakwĩa, “Ya na ũinyw'a,” ĩndĩ ngoo yake ndĩthĩawa vamwe naku.

⁸ Ũkatavĩka lĩu w'onthe ũla ũĩte, na kũtũnga mũvea kwaku kũyĩthĩwa kwa mana.

-9-

⁹ Ndũkatavye ndia ũndũ, nũndũ ĩkavũthya ũĩ wa ndeto syaku.

-10-

¹⁰ Ndũkakũĩĩsye ĩkonge ya mũvaka wa tene, o na ndũkalike ithekanĩ sya syana ndiwa,

¹¹ nũndũ mwovosya woo e vinya na akamatetea.

-11-

¹² Tũmĩa kĩlĩko kyaku kũatĩĩa momanyĩsyo, na ũitũmĩa matũ maku kwĩthukĩĩsya ndeto sya ũmanyi.

-12-

¹³ Ndũkaeke kũkany'a kana; wakakũna na mũnzyũ kaikw'a.

¹⁴ Wakakũna na mũnzyũ, ũkatangĩĩa thayũ wako ndũkalike vala maveva ma ala akw'ũ mekalaa.

-13-

¹⁵ Mwana wakwa, weethĩwa na ngoo yĩna ũĩ, ngoo yakwa o nayo ĩkatana.

¹⁶ Thayũ wakwa ũkatana, yĩla wĩneena ndeto sya w'o.

-14-

¹⁷ Ngoo yaku ndĩkew'ĩe eki ma naĩ kĩwĩu, ĩndĩ mũkĩae Mwĩai Ngai kĩla ĩvinda.

¹⁸ Kwa w'o ve wĩkwatyo ĩvindanĩ yũkĩte, na wĩkwatyo waku ndũkethĩwa wĩ wa mana.

-15-

¹⁹ Mwana wakwa, ĩthukĩĩsye na ĩthĩwa na ũĩ, na ũyĩkalya ngoo yaku nzĩanĩ ya w'o.

²⁰ Ndũkekwatany'e na athengi, kana ala maĩsaa nyama na ĩtomo,

²¹ nũndũ mũnywi na mũyi matw'ĩkaa ngya, na kwombosya kũtumaa mũndũ ekĩa matani.

-16-

²² Ĩthukĩĩsye ĩthe waku ũla wakũsyaie, na ndũkavũthye inyia waku akũa.

²³ Thooa ũw'o na ndũkaaũthoosye, thooa ũĩ, ũmanyĩsyo na ũmanyi.

²⁴ Ĩthe wa mwana mũlũngalu nũtanaa mũno, ũla ũsyaa kana koĩ nũtanaw'a nĩko.

²⁵ Ĩthe waku na inyia waku mew'e mũyo, na inyia waku ũla wakũsyaie nĩatane.

-17-

²⁶ Mwana wakwa, mbĩthukĩĩsye nesa, na ũiatĩĩa mũendele wa thayũ wakwa.

²⁷ Nũndũ ĩlwaya nĩ ta ĩima ĩliku, na kĩveti kĩte kyaku nĩ ta kĩthima kĩtheke.

²⁸ Kyoveeasya mũndũ ta kĩng'ei, na kũtuma aũme aingĩ methĩwa mate aĩkĩĩku.

-18-

²⁹ Nũũ wĩ na kyeva? Nũũ wĩ na kĩmako? Nũũ wĩ na ngananĩo? Nũũ wĩ na mũnyungunyĩsyo? Nũũ wĩ na kũndũ kũũmĩu vate kĩtumi? Nũũ wĩ na metho matune?

³⁰ Nĩ ala manyusaa mũno, ala maendaa kũnyw'a mĩthemba mingĩ ya ũkĩ.

³¹ Ndũkew'ĩe ndivai ĩtomo nũndũ wa ũtune wayo, yĩla ĩkũtisatisa yĩ kĩkombenĩ, yĩla ĩkũmeleka nesa!

³² Mũminũkĩlyonĩ yĩsaa kũũmana ta nzoka, na kũtonyana ta kĩmbuva.

³³ Metho maku makoona syĩndũ ngeni, na ngoo yaku ĩkaneena maũndũ ma ngũlũ.

³⁴ Ĩĩ, ũkeethĩwa ũilyĩ ta mũndũ ũla ũkomaa ũkanganĩ katĩ, kana ta mũndũ ũla ũkomaa mũthyanĩ wa mũtĩ wa kũtwaa meli.

³⁵ Ũkaneena wasye atĩĩ, “Nĩmangũnie ĩndĩ ndyaaũmĩa; nĩmangũnie ĩndĩ ndyaaĩw'a ũndũ. Ngaamũka ĩndĩĩ nĩ kana nĩmanthe ũkĩ ĩngĩ?”