NTHIMO 22 - YÎ NA MAVUKU MA NDIŨTELOKANONI

Motao na Mokany'o

¹ Nĩ kavaa kwĩthĩwa na ĩsyĩtwa ĩseo kwĩ ũthwii mwingĩ, na kũnengwa ndaĩa nĩ kũseo kwĩ silĩva kana thaavu.

² Athwii na ngya makwatanĩe ũndũ ũũ ũmwe: Mwĩai Ngai nĩwe wamombie onthe.

³ Mũndũ wĩ kĩlĩko nĩwonaa ũthũku wũkĩte na ayĩvitha, ĩndĩ ala mate na ũmanyi maendeeaa makesa kũũmĩa.

⁴ Ĩtuvi ya wĩnyivyo na kĩkĩo kya Mwĩai Ngai, nĩ ũthwii, ndaĩa na thayũ.

⁵ Nzĩa sya andũ athũku syĩ mĩw'a na mĩteo, ĩndĩ ũla ũsũvĩaa thayũ wake ekalaa vaasa nasyo.

⁶ Manyĩsya kana ũndũ kaĩlĩte kwĩkala, o na keana kaikolwa nĩ ũndũ ũsu.

⁷ Mũndũ mũthwii nũsumbĩkaa ũla ngya, na ũla ũkovaa nĩ ngombo ya ũla wamũkovethya.

⁸ Ũla ũvandaa ũthũku akaketha thĩna, na ũtonyi wake wa kwĩka naĩ ũkaminwa.

⁹ Mũndũ mũlau akaathimwa, nũndũ nũĩsanĩaa lĩu wake na ngya.

¹⁰ Lũngya mũndũ wĩ kĩvũthya na ngananĩo, na ĩteta na numangano ikathela.

¹¹ Ũla wendete ũtheu wa ngoo na ndeto syake nĩ nzeo, akatw'ĩka mũnyanyae wa mũsumbĩ.

¹² Mwĩai Ngai nũsũvĩaa ũmanyi wa w'o; ĩndĩ nĩwanangaa ndeto sya ala mate na mũĩkĩĩo.

¹³ Mũndũ mũtulu aasya, “Nditonya kumaala, ve mũnyambũ nza na nũũmbũaa!”

¹⁴ Kanyw'a wa mũndũ mũka kĩlaalai nĩ ĩima ĩliku; mũndũ ũla ũthatĩwe nĩ Mwĩai Ngai akalika nthĩnĩ.

¹⁵ Ũtumanu wusũĩte ngoonĩ ya syana, ĩndĩ syakanw'a na mũnzyũ ũtumanu ũsu ũkavetwa.

¹⁶ Mũndũ ũla ũthĩnasya ngya nĩ kana ongeleele ũthwii wake mwene, kana anenge athwii mĩthĩnzĩo, o nake akatw'ĩka ngya.

Ndeto Mĩongo Ĩtatũ sya Ũĩ

¹⁷ Tea kũtũ wĩw'e ndeto sya ala oĩ, na ũyĩkĩa ngoonĩ yaku kĩla ngũũmanyĩsya,

¹⁸ nũndũ nĩ ũseo kũsyĩkalya thayũnĩ waku, na kũineenaa kĩla ĩvinda.

¹⁹ Nĩ kana wĩkwatyo waku wĩthĩwe nthĩnĩ wa Mwĩai Ngai; kĩu nĩkyo kĩtumi ngũũtavya ndeto isu ũmũnthĩ.

²⁰ Ngũandĩkĩe maũndũ manene mĩongo ĩtatũ ma ũĩ, ma ũkũtaa na ũkũmanyĩsya,

²¹ ngũmanyĩsye ũla ũlũngalu na wa w'o, nĩ kana ũnenge ala makũtũmĩte ũsũngĩo waw'o.

-1-

²² Ndũkoyĩe mũndũ ngya nũndũ nĩ ngya, kana kũlea kũnenga athĩni sila wa katĩ me kĩsilĩlonĩ,

²³ nũndũ Mwĩai Ngai akamatetea, na akamina ala mamathĩnasya.

-2-

²⁴ Ndũkatume ndũũ na mũndũ ũthataa mĩtũkĩ, ndũkekwatany'e na mũndũ ũthilĩkaa,

²⁵ ndũkese kwĩmanyĩsya mĩendele yake, na ũikwatw'a nĩ mũteo.

-3-

²⁶ Ndũkethĩwe wĩ ũmwe wa andũ ala mathanaa kana makaĩva thiĩ mũndũ ũla ũkovete aema kũĩva.

²⁷ Waemwa nĩ kũĩva, ũkomo waku mwene ũkooswa.

-4-

²⁸ Ndũkaakũĩĩsye ĩkonge ya mũvaka wa tene, yĩla aaũmae maku mavandie.

-5-

²⁹ Waaona mũndũ ũtethasya wĩa wake nesa? Ũsu akathũkũma asumbĩ, ndakathũkũma andũ mate ndaĩa.