NTHIMO 17 - YÎ NA MAVUKU MA NDIŨTELOKANONI

¹ Nĩ kavaa kũya kalungu komũ ka mũkate mũndũ e na mũuo, kwĩ kũĩĩa mboka nyũmbanĩ yĩ ĩteta.

² Mũthũkũmi ũla wĩkaa maũndũ na ũĩ akasumbĩka mwana ũla ũsonokasya, na akaaĩwa ũtiĩwa ta ũmwe wa ana ma mũsyĩ.

³ Ũseo wa thaavu na silĩva ũmanyĩkaa syavĩvw'a na mwaki, ĩndĩ Mwĩai Ngai nĩwe ũthimaa ngoo sya andũ.

⁴ Mwĩki wa naĩ nĩwĩthukĩĩasya ndeto nthũku, mũkengani nũteaa kũtũ ew'e mũndũ wĩ ũvũngũ aineena.

⁵ Ũla ũthĩnasya ngya aumaa Mũmbi wayo; ũla ũtanĩaa wanangĩko mũnene ndakalea kũkanw'a.

⁶ Andũ akũũ nĩmatanaw'a nĩ esũkũũe, syana nitanaw'a nĩ asyai masyo.

⁷ Ti mũno ndia kũneena nesa; mũtongoi ndaneenaa ũvũngũ.

⁸ Andũ amwe masũanĩaa ĩtuvi ya wendeesyo yĩthũkũmaa ta kyama, masũanĩaa ĩtuvi yĩu nĩyĩtonya kwĩka ũndũ ona wĩva.

⁹ Mũndũ ũla ũekeaa nĩwendawa, ĩndĩ ũla ũtindĩaa kũlilikana ĩvĩtyo nĩwaasya anyanyae.

¹⁰ Mũndũ mũĩ nũtethaw'a nĩ ũkany'o, mbee wa ndia ĩkũnĩtwe makũnwa ĩana.

¹¹ Mũndũ mũthũku amanthaa ũng'endu w'oka, na akatũmĩwa mũtũmwa ũte tei.

¹² Nĩ kavaa kũkomana na nyamũ mbai yĩtawa nduva ĩvenetwe maswii mayo, kwĩ kũkomana na ndia yĩna ũtumanu wayo.

¹³ Ũla ũĩvanĩasya ũseo kwa ũthũku, ũthũku ndũkauma nyũmba kwake.

¹⁴ Kwambĩĩa ĩteta nĩ ta kũvũthũa silanga, ekana na ĩteta yĩtanaingĩva.

¹⁵ Ũla ũtalĩlaa andũ athũku kwĩthĩwa me alũngalu, na ũla ũtalĩlaa ala alũngalu kwĩthĩwa me avĩtany'a, asu elĩ nĩmathatasya Mwĩai Ngai.

¹⁶ Ve vata mwaũ wa ndia kwĩthĩwa na mbesa sya kũthooa ũĩ, na ndia ĩsu ndĩ na kĩlĩko?

¹⁷ Mũnyanyae wa mũndũ amwendaa mavinda onthe; mwana-a-ĩthe wa mũndũ asyaawa atethye ĩvinda ya thĩna.

¹⁸ Mũndũ ũte na kĩlĩko nĩwĩtĩkĩlaa kwathana, na kwia ũĩkĩĩthyo kwondũ wa mũtũi wake.

¹⁹ Ũla wendaa ĩteta endaa naĩ, na ũla wĩkathĩĩaa amanthaa wanangĩko.

²⁰ Mũndũ wĩ ngoo nthũku ndonaa ũseo, na mũkengani nĩwonaa naĩ.

²¹ Mwana mũtumanu nĩ kyeva kwa ĩthe wake, na ĩthe wa mwana mũtumanu ndatanaa.

²² Ngoo ndanu nĩ ndawa, ĩndĩ ngoo yĩna ũthatu nĩetae kĩmosa.

²³ Mũndũ mũthũku nĩwĩtĩkĩlaa ĩtuvi ya wendeesyo kwa kĩmbithĩ, nĩ kana atume sila wa katĩ ũtaatĩĩwa.

²⁴ Kĩeleelo kya mũndũ wĩ na ũmanyi nĩ kũmantha ũĩ, ĩndĩ ndia ndĩthĩawa na kĩeleelo.

²⁵ Mwana mũtumanu nĩ kyeva kwa ĩthe wake, na woo kwa inyia ũla ũmũsyaĩte.

²⁶ Ti ũseo kũsilĩla mũndũ mũlũngalu, kana kũkũna mũndũ wa ndaĩa.

²⁷ Mũndũ mũĩ ndaneenaa ndeto mbingĩ, na mũndũ wĩ na ũmanyi nĩ mũuu.

²⁸ O na ndia ĩvindĩtye yonekaa ta mbũĩ, yĩla ĩkilĩtye yonekaa ta yĩna kĩlĩko.