YOILU 3 - Na Huratu Matua

Napa i MIRI na patanda-nja ngera da banjaru

¹ Napanii i MIRI, “Napa la rehi nu ku-pahàmu beliya na luri mbokaru-na na Yeruhali dàngu na Yahunda.

² Mbuu ndàbada da banjaru ku-pauhi-nja hi ku-dundilu-ha la Lolangu Ngia Pa-patandangu Ngera. Hi ku-patanda-nja ngera lai nu rukuna na akatu pawundada la banjaru-nggu ba mbàda paberi-danya na tana Ihirailu tàka na banjaru-nggu da wàrunja la hau tana - hau tana.

³ Datuu undi kapinya jàka nggamu mangala-nja da tau tanawangu. Da-danggangu ana karia dàngu bidi mini ka panjadi-ha ata. Dàngu da àmahu wilida jiaha da palua wàda la kawini pahunda dàngu paunu wàngu angguru.

⁴ Jia nggiki-minggaka dimi ha Tiruhu, Hindungu dàngu nggubulu tana Pilitingu? Keha kakutuu kiringu lai Nyuna? wàmungga. Màla pandema-nyawa na pahimbalungu-nggu na malu tàka.

⁵ Da àmahu rara da àmahu baranggu mbàda ramba-minjaka, dàngu da kanaingu-nggu da ma-pawilingu ingàndiha la uma marapu-mi.

⁶ Da ma-mandapu-nya la Yahunda dàngu la Yeruhali imarau ngàndiha welingu la tanada; hàlaka idangganja la banjaru Yunani.

⁷ Nàhu luhu ngàndi-ngguhaka welingu la ngia padangga-minja, dàngu napa na akatu-mi lai nyuda ku-palimba-nya.

⁸ Da anami mini kawini napa kudangga-nja la ma-mandapu-nya la Yahunda, da mahili dangganja napa la Heimba, na tana madira marauya. Nyungga MIRI-ka mambàda panii.

⁹ Bobaru-ya na lii pa-kadangu yiana la ba - banjaru: Hawaritu-wa pa-pabera dàngu ka pa-udulungu! Pamàtu-ha da mini la ngora dàngu da ma-kaborangu; pauhi-nja da panjuri dàngu ndàharungu-wa!

¹⁰ Tuku-hawa hapanda da luku pa-kabanda wàmi dàngu da kahidi pa-ridihu wàmi kalunga pakoja wàngu. Dàngumbu ka napanii na tau lamanga, ‘Ku-ngalangu-mai duku pambeni hanggangu hama tuna tanatara!’ ka wàna.

¹¹ Màla, mai parenggangu-wa ha dimi banjaru welingu la nggi - nggini! Pauhi-wa la lolangu lai nu,” wàna. Ou MIRI, paràha-nyawa na tanatara-mu, pa-kaluluku-nja nyuda!

¹² Nahili panii i MIRI, “Lupangu-ma da-hawanjiru bàdi da banjaru palaku la Lolangu Ngia Pa-patàndangu Ngera. Lai nu Nyungga na MIRI napa ku-patanda-nja ngera da banjaru malihi-nya na banjaru-nggu.

¹³ Nyuda nu kanjupu akatu-ha, parahu-hawa nyuda hama tuna uhu nggàndumu mambàda ihi la woka. Taro - rohaku-hawa nyuda hama tuna angguru la karaba ngia papohu angguru mambinu lembaru.

¹⁴ Diha rataya na tau na maninya la Lolangu Ngia Pa-patandangu Ngera. Nadu ba lai nu narengga tàka ningu na Loduna i MIRI.

¹⁵ Na mata lodu dàngu na wulangu na kapàtangu, dàngu nda da-handaraku-apa da kandunu,” wàna.

I Ala napa na-pakanyuru-nya na banjaru-na

¹⁶ I MIRI na-kangaüku welingu la Hiungu, na palindi-na; welingu la Yeruhali ndu - nduruna na talia liina. Na-kanggauhaku na awangu hamanai na tana. Tàka i MIRI pa-daingu kahiri-nanya dàngu opa-nanya na Ihirailu na banjaru-na.

¹⁷ “Ha Ihirailu nàhu kai pinya, ba Nyunggama MIRI Alami. Ku-ndàdiku la Hiungu na palindi matua-nggu, na Yeruhali parai matua-mbuyaka, nda jia tama-ana-nyapa tau nàmu.

¹⁸ La rehi nu napa dambinu-nja woka angguru da palindi. Napa da banda mopu daniti rumba la tandula tana mboka. Da luku la Yahunda nda ana mihi-àdapa da waida. Na hau na luku napa na-lulungu welingu la Umana i MIRI, hi nahini-ya na Lolangu Akahia wàngu wai ma-pahayandalu.

¹⁹ Na Mehiru napa nanjadi maràda kàrangu, dàngu na Endumu nabulu, nda nangia-anya tau. Nadu ba mbàda kaluluku-danyaka na tau Yahunda, dàngu da-pameti-ha da ma-mandapu-nya na tana da manda ningu njalangu.

^20-21 Ku-karuhi-ya na himbalu wai riada, napa ku-parahu-ha da ma-pameti-ha. Tàka na Yahunda dàngu na Yeruhali ningu mànuma mangia-nya, dàngu na palindi Hiungu pa-daingu ngia-nggunya napa,” wàna.