YAHAKIALU 1 - Na Huratu Matua

NA NGALANGU-NA KAWUNGA HARII MATA I YAHAKIALU RUKUNA I ALA 1:1–7:27 Na kanjàka pareta-na i Ala

^1-3 La tànggalu lima wulangu patu la ndaungu patailu kambulu wàna, la ndaungu palima wàna welingu ba dundilu-ya i Hanganji Yuyakingu la tanawangu, nyungga Ratu Yahakialu anana i Mbuhi ningga la hingi Luku Kembàru la Mbambilu anguma dàngu da tau tanawangu Yahundi hawiangu. Hi jia tawangga biana na awangu hi ku-ngalangu harii mata rukuna i Ala. Kurongu ba napanii dàngga i MIRI dàngu kupàda-nya na kawaha-na.

⁴ Ku-tangara hi kuita-ya na làpuru ba na-hapuputu weli diangu. He - herina na kabàla welingu la hau kalibuku karumangu ma-kanjupu bokulu, dàngu hi na-pawiti-nya pa-hambila halawàla na awangu la winggiru-na. La kabilaku mare - rerina nuna paita-ya na ma-handaraku ba hama parunggu-ya.

⁵ La padua làpuru nunambu, kuita-ha patuda da patau awangu nu da patau awangu da mahama jiangu tauha,

⁶ tàka na nyuna nimbihu-da patuda da matada dàngu dua mawangu-da da ruu kàpada.

⁷ Da wihida da-kunduhu dàngu da-kalilangu hama tuna parunggu pauda-ha. Da wua wihida dapawuu hapi mbàtingu.

⁸ Hinggilu-na ba patu matada dàngu ba dua mawangu ruu kàpada, nyuda ningu lima tauda la lumbu nimbihu ruu kàpada.

⁹ Da hamawangu ruu kàpa la nimbihu-da nuda da dika da-tawàlahu tàka da hupu - hupuda da-maràngga pa-jonggaru dàngu ruu kàpa dika hawiangu, hi lupa da-pa-okangu kapatu larangu nuda da dika da mapatu-da. Jàka da-nggàduku, handàka nggàduku-mada ba dàngu pa-tarihungu-da la hangga ba dàngu nda pa-mbelingu-da.

¹⁰ Nimbihu-da nuda da dika patuda da matada manda pahama; mata tauya la hangga, mata hingaya la kawana, mata hapi mbàtingu-ya la kalai dàngu mata mbaku tehiku-ya la kajia.

¹¹ Na hamawangu ruu kàpa la nimbihu-da nuda da dika pa-wàlahu hu ditaha hi da-jonggaru-ha da hupu ruu kàpada da dika la lihida, tàka na hili hamawangu ruu kàpada da pa-làpitungu pa-pandàda-nja da ihida.

¹² Nimbihu-da nuda da dika handàka patuma ngia pa-hanggangu-da hi peku lakuda la nggini bia pambuha-da dàngu nda pa-mbelingu-da.

¹³ La padua-da nuda da dika ninya na mahama epi jilungu maroka-iya ba itaya na manda pànjangu pa-nggàduku. Nuna na epi nakare - reriku dàngu na-kapurukungu kabilaku kabàla.

¹⁴ Nuda da dika da-palongga maingu hama kabilaku-ha renggada.

¹⁵ Ba talànga hamata-ngguha nuda mbuu ndàbada ku-itaha patuda da ndutungu la tana, hau ndutungu la lihi nimbihu-da nuda da dika.

¹⁶ Nuda da patu ndutungu hama-mada dàngu da kalilangu hama watu mata tawuru-ha, dàngu nimbihu-da ni - ninguma hili hau ndutungu ma-pandàbarungu la padua-na.

¹⁷ Ba tuna nu pekuda nuda da ndutungu pa-hanggangu la patu ngia pa-hanggangu.

¹⁸ Da kulurungu-da nuda da ndutungu mbinu wua mata-mada.

^19-21 Nuda da dika dalaku la nggini bia na pambuha-da, tàka nuda da ndutungu da-kikungu mànuma, ba da-kawaha-duha paraï da nuda da dika. Handàka nggoda - handàka nggodada nuda da dika, jàka ndia ba dadita hu dita jàka ndia ba da-pànjangu, nuda da ndutungu dakiku mànu-manja nyuda.

²² La dita katiku-da nuda da dika ningu mahama kiri wurungu ma-hanggurungu welingu la kaha ma-kalilangu.

²³ La wawana nuna na ma-hanggurungu nimbihu-da nuda da dika da-wàlahu ruu kàpada hanggangu la dika tubana, tàka na hili hamawangu ruu kàpada da pandàda-nja da ihida.

²⁴ Jàka da-hawurungu, kurongu-ha da kambàraku ruu kàpada, hama tuna kawoku wai la harangi-ha linguda, hama kandukuku pangga pamba bokulu, hama tuna talia liina i Ala Hupu Mambiha. Jàka da-pànjangu pa-hawurungu da-làpitu-ha da ruu kàpada,

²⁵ tàka welingu la pinu ma-hanggurungu la dita katiku-da, parongu-yapa na talia lii.

²⁶ La pinuna nuna na ma-hanggurungu ninya na mahama kanjàka pareta ma-welingu la watu nilamu, tàka la pinuna na-mandapu na mahama tau-iya ba itaya.

²⁷ Ba itaya la pinuna na-handaraku hama parunggu la padua roka epiya. Tàka la wawana na-handaraku-na kanjupu hambila-ya,

²⁸ dàngu na-pabeti - pa-betingu hama kapuri-ya. Nuna jiaya na hambila kalilangu ma-paloha-nya ba ninya i MIRI. Ba kuita-ya nuna kunjoru panggubu la tana. Hi kurongu talia lii