RUTU 2 - Na Huratu Matua

Na ràmana i Rutu la wokana i Mbowàhu

¹ Ninya haàtuna na kalembi-na i Naomi, welingu la kabihu leina, i Elimeliku. Na tau nuna na wulu dàngu pa-mahumbarungu-ya. Mbowàhu-ya na tamuna.

² La hau na lodu napanii i Rutu lai Naomi, “Ina, pulingga làti ka kulua la woka pa-kanembu uhu nggàndumu papuha tau maràma. Kupii-hàmu-manyaka duku ba ningu tau ma-pahia-ngga pawunda matungu nu,” wàna. “Hàmu du dou na ananggu duku!” wàna ba nahema i Naomi, “lua bia duna!” wànanya.

³ Ka laku-nanyaka i Rutu pa-kanembu uhu nggàndumu papuha tau maràma la woka. Talànga jia pakuyai na wokana-na i Mbowàhu nangia palua-na.

⁴ Ndedi nggi tuna mandaina tàka-nanyaka i Mbowàhu welingu la Mbetulehimu. “Màla àruki ka nandutu-kai MIRI,” wàna ba napulu danya da maràma-ka. Da hema da maràma, “Màla àruki i MIRI ka na-pakanyuru-nggau nyumu, umbu,” wàdanya.

⁵ Ka paàra-nanyaka na manduru-na i Mbowàhu, “Nggamuya nina na kawini?” wàna.

⁶ Nahema na manduru, “Kawini Muapuya mabeli karia-nya i Naomi welingu la Muapu, wàna.

⁷ Mbàda karai-naka lai nyungga ka pahia-nya pandàki-ha da maràma pa-kanembu uhu nggàndumu ma-kawàraku. Weli mbarungu-maka ba na-pakiringu paràma, tàka nàhu hinama-a na-pànjangu, pa-ana hangahu-ki la maü,” wàna.

^8-9 Ka panii-naka i Mbowàhu lai Rutu, “Màla urongu hena. Àmbu luadu pa-kanembu uhu nggàndumu la tau hawiangu. Kanembu ningu bia lai yiahu angunja da kawini maràma lai nyungga. Hamata-maha jàka nggiha damuti ningu nyuda, ndàki maha nyuda dàngu àmbu maraudu. Jàkau madua piti bia wai welingu la mbàlu - mbàlu pambàda paihi-da da tau mini maràma. Mbàda pareta-manggu-haka ka àmbu dangguma-nggau,” wànanya.

¹⁰ Ba narongu-yaka nuna, marubuku-nanyaka i Rutu la hanggana i Mbowàhu, hi napanii, “Ama, nda ràka-anggu duku pangala-nya na kanjupu hàmu-mungga nyungga. Nyungga duku tau hangàdangu-aka dàngu nda pangia-ana làti nainga-mungga Ama!” wàna.

¹¹ Nahema i Mbowàhu, “Mbàda rongu-nggunyaka mbuu ndàbana na pawunda-mu hanggangu la ina yenumu piti welingu ba nameti na mini leimu. Kupi-manyaka ba mbàda dunjakungu-muka ina amamu dàngu tana ngia padedi-mu la pamai pa-ndàdiku yiahu dàngu tau pandedi tandamu la mangilu-na.

¹² Màla àruki i MIRI ka na-palimba-nya mbuu ndàbana na hàmumu. Màla àruki kau ngalangu paràka pawua-nanggau i MIRI, na Ala Ihirailu, rukuna ba mbàda maimuka pa-handera lai Nyuna,” wànanya.

¹³ Nahema i Rutu, “Kanjupu hàmukau Ama hanggangu lai nyungga, ka jiapa nda kuhama-njakai da maràma lai nyumu, ama. Na-kamàhaku-mungga Ama, na-halembiru wàmanya na etinggu,” wàna.

¹⁴ La rehi ngangu la tidu lodu, napanii-nya i Rutu i Mbowàhu, “Mai tangangu roti. Yiana na pangaa wàngu,” wànanya. Ka mandapu-nanyaka i Rutu pangangu dàngu da maràma. Na wua-mbunya uhu nggàndumu pa-handarangu paraïna i Mbowàhu ka ngangu lundu mbihu-nanyaka i Rutu. Ba hàla pangangu ningu-mbuipa marihi.

^15-16 Tunaka nu hili lua-nanyaka pa-kanembu uhu nggàndumu i Rutu. Ba taliu-naka panii-nanjaka da maràma i Mbowàhu, “Jàka na kanembu uhu nggàndumu la pambàda paingu, màta bianya. Àmbi tunya pa-makia wàna dàngu àmbi mbeni-dunya. Nahàmu-kipa kai harawuku, pa-butuhu hakudu - hakudu welingu la pambàda paingu, kai panabu-nya ka na-kanembu-ha,” wànanja.

¹⁷ Ba tuna pa-dàingu-nanyaka pa-kanembu uhu nggàndumu la woka i Rutu lundu rudungu-na. Ba nahàla-ka papa - pàmbalu-nja da pola uhu nggàndumu, ka da-àlingu da karohu-da welingu la polada, lohangu-nanyaka ba ràkangu hakambulu kilu uhu nggàndumu pa-kangutu-na.

¹⁸ Tunaka nu beli-nanyaka la paraingu dàngu da pangala-na ba na-kanembu hi na-paita-nya na ina yenuna nggi tuna danguda da pa-kanembu-na. Dàngu nawua-mbunya na ina yenuna da pangangu da pambàda kawàri-nanya ba nangangu ba nda nahàla-ha.

¹⁹ Ka panii-nanyaka i Naomi lai nyuna, “Nggini ungala ndàbanja jiada? Ngga woka-nanya na ngia paràmamu la lodu nàhu? Màla àruki i Ala ka na-pakanyuru-nya nuna na tau na-mahàmu-nggau eti!” wànanya. Ka panii-nanyaka i Naomi paraïna i Rutu ba wokana na haàtu mini ma-tamungu Mbowàhu-ya na ngia pa-kanembu-na uhu nggàndumu.

²⁰ “Dou na ananggu, na tau nuna hi kalembi wiki-ndanya ni,” wàna i Naomi. “Nyuna màka na mangaba-nda nyuta,” wàna. Màla àruki i MIRI ka na-pakanyuru-ya nyuna. Naingu-mana duna i MIRI ba na-pahàra-nya na panjanji-na, ka la tau na maluri-ipa, hamanai lai nyuda da mambàda metikai,” wàna.

²¹ Tunaka nu nahili panii i Rutu, “Ina, napanii-mbu na tau nuna ba lupangu-ma nyungga ku-kanembu pa-ngalangu uhu nggàndumu dàngu da tau maràma lai nyuna lundu hàla pamuti-ha da ihi wokana,” wàna.

²² “Dou na ananggu duku,” wàna ba nahema-ya i Rutu i Naomi, “deningu-mana ba narihi-hàmu-mapa bau ràma dànja da kawini la wokana i Mbowàhu. Nadu jàkau lua la woka tau hawiangu, peku ngguma-nanggau tau lai nu!” wànanya.

²³ Tuna nuduka hi pa-daingu pakiri-na i Rutu la kawini maràma la wokana i Mbowàhu. Na-kanembu uhu nggàndumu lai nu lundu hàla pamuti ndàbaha da uhu nggàndumu – ka la kawunga muti hamanai la pamuti malamiri. Dàngu nu la rehi nuna la ina yenu-mananya na-ndàdiku ningu i Rutu.