ROMA 2 - Na Huratu Matua

Na hukungu welingu lai Ala

¹ Jia ba tuna dimi angu dedi ka nggàra-makauka nu hiu panjala tau hawiangu? Nda nggàra-a maningu-nggau la papamà-nangu wàngu wikimu! Nadu jàkau panjala tau hawiangu, tàka làti wàmu hi wunda bidua-munyai dumu na ma-hamangu, nu rata dumu-nyaka hukungu nduma wiki-mbumu.

² Tapi-manya jàka narata-nja hukungu paraïna i Ala da tau da mawunda-ha da pawunda matungu nu, na pa-deningu-ma duna nu na parata-na i Ala.

³ Tàka nyimi dimi angu dedi iwunda-mbuduhai dimi nu da pa-panjala wàminja da tau hawiangu! Tàka la kanandingu-mi, jia hinggilu-mikaka welingu la hukungu-na i Ala?

⁴ Jàka ndia hi pa-halela bia-minya nu na màja etina i Ala dàngu na muluru etina hamangui na lerangu etina na mabundu làndangu? Tàka làti jiangu-ma bai pinya, keha ka dapanji-lungu welingu la njalada ba wàna duna làti i Ala hi kiri paloha-nanya nu na hàmu etina.

⁵ Tàka hi malihu bia-minyai dàngu hi ndai bihu pa-panjilungu. Jia ba tuna, nyimi wiki-maka dimi ma-pawiti-nya hi na-parukangu pambotu na hukungu-mi la Lodu Hupu Njàpuna, ba na-paloha-nya na hànggana i Ala, ba nawàngu molana ba narata hukungu.

⁶ Nadu ba na-palimba-nya nimbihu-na na tau i Ala nunjuya na pawunda-na.

⁷ Tàka hi nawua-nja luri na ma-palangatàkangu dàngu na mapa-lupangu da tau da ma-torungu pawunda mahàmu la pangala wànya na mangarangu, na tembi dàngu na ma-palupangu.

⁸ Na nyuna da tau da ma-kehangu kangeha wikida dàngu da manda karadaku-nya i Ala, tàka hi tundu ni bia-danyai na ma-akatu, jiaha da tau nuda da pahàngga halawàla-na i Ala.

⁹ Nimbihu-na na tau na mawai ilungu pawunda ma-akatu napa najàra dàngu na-mayila; la mangilu na tau Yahundi, dàngu da banjaru hawiangu-mbu.

¹⁰ Na nyuna mbuu ndàbana na tau na mawai ilungu pawunda mahàmu, napa i Ala nawua-nja mangarangu dàngu tembi pa-kariangu mapeku mahàmu; la mangilu-na na tau Yahundi, hama-manai da tau la banjaru hawiangu.

¹¹ Nadu ba nda ningua duna njinjina na pawu-ndana i Ala la mbuu ndàbana na tauka.

¹² Da tau la banjaru hawiangu dawunda manjala bundu nda pidanya na uku anggama Yahundi. Jia ba tuna pa-hukungu-ha la hambelina nuna na uku. Na nyuna da tau Yahundi dawunda manjala bundu pidanya-padua na uku nuna; jia ba tuna pa-karuhi-maha napa palata-nya nuna na uku.

¹³ Nadu hi da-pahàmungu beli na tau dàngu i Ala, nda jia-aya ba ruku pinanya na uku anggama Yahundi; tàka jiaya ba na-pahàra-nya duna jàka nggàraya daa na maninya la uku.

¹⁴ Da tau la banjaru hawiangu nda datanda-aya na uku anggama Yahundi. Na nyuna jàka dawàngu eti wikida ba da-pahàra-nya na pa-karuhi-na na uku, jiaya na eti wiki-madaka nu na manjadi uku ndumada nyuda, jiapa ka nda da-tanda-yakai na uku anggama Yahundi.

¹⁵ Na huri lurida nyuda jiaya na ma-paloha-nya, ba pa-tulihu-ya la etida nu na pa-karuhi-na na uku. Na eti daluda jiaya na ma-paloha-nya nuna, nadu nyuda wiki na-panjala-ha talànga handàka-na paraï pa-tandangu wikida tàka talànga handàka-nai na-pamàna-nja.

¹⁶ Tuna nuduka napa na manjadi la lodu pa-kawuku. La lodu nu – hama tuna na Lii Mànangu pa-bobaru-nggu – napa la ngaruna i Karitu na-patanda-nya paraïna i Ala mbuu ndàbana na ma-kawiningu la eti dàngu la kanandingu tauka.

Da tau Yahundi dàngu na uku anggama Yahundi

¹⁷ Tàka nàhu nggiki hama-mika dimi nyimi angu dedi? Nyumu mapeka tau Yahundika ba wàmu. Nyumu uhandera la uku anggama Yahundi dàngu uhamemu wànya na papuingu-mu lai Ala.

¹⁸ Ungalanja da lii kaloka welingu la uku nuna, tàka hiu pinya na pambuha-na i Ala dàngu hiu pingu papindi-ya jàka nggàraya na mahàmu.

¹⁹ Màndungu-mananya la etimu ba ma-kapipi tau mapoki-kau dàngu ba hambila-kau ndumada nyuda da maninja la kapàtangu;

²⁰ nyumu ma-panaungu tau manda hàmu hurina dàngu ngguruda da tau nduba. Màndungu-mananya la etimu ba ni ndàbanya na papingu wàngu dàngu na lii papekangu ma-padeningu daa la uku anggama Yahundi.

²¹ Nyumu ma-papekangu tau hawiangu, ka nggikina duna hi ndau papekangu bia wikimu? Nyumu ma-papekangu tau ka àmbu na-manganga, tàka làti wàmu manganga pàku-amunya nyumu!

²² Nyumu ma-papekangu tau ka àmbu na njuraku, tàka làti wàmu njuraku pàku-amunya nyumu! Nyumu mahuda etinja da marapu, tàka làti wàmu piti pàku-amunya banda la uma marapu.

²³ Nyumu ma-hamemu wa mànunya na Ukuna i Muha, tàka làti wàmu paaka pàku-amunya i Ala ba ndau nunjuya na Ukuna.

²⁴ Daa la Huratu Matua tuna yia na pa-tulihu, “Rukumi nyimi tau Yahundi, pa-tarohaku-yaka na tamuna i Ala la hongada da banjaru hawiangu,” wàna.

²⁵ Jàkau karadaku-nya na uku anggama Yahundi jiaya hi ningu linguna na kàrimu. Na nyuna jàka ndau kàli pa-namatu-nja da pa-karuhi-na na uku, nda kàri-ayapa na kàrimu.

²⁶ Jàka nanunju-ya na uku anggama Yahundi paraïna haàtu tau nda Yahundi na panda kàri, ka nda nareki-aya nyuna paraïna i Ala ba beri tau pambàda kàriya?

²⁷ Dàngu nuda da tau panda kàri napa da-panjala-kau nyumu tau Yahundi, nadu ba ningu uku anggama Yahundi-mu nyumu dàngu ba pakàri-kau nyumu, tàka hi pangga biamu-nyai nuna na uku. Nyuda nda pakàri-aha, tàka hi jiaha nyuda biai da manunju-ya na uku anggama Yahundi.

²⁸ Nadu na tau Yahundi langatàka nda jia-aya na mamili tamungu Yahundi; dàngu na tau pakàri langatàka nda jia-aya na tau pakàri la tàda ihina.

²⁹ Tàka hauya duna na haàtu tau Yahundi langatàka jiaya na tau na ma-paeti Yahundingu duna; tàka na kàri langatàka jiaya na kàri la eti duna paraïna Ngahuna i Ala, nda jia-aya na pandàta la mbuku. Na tau tungu nu na-ngalangu wotungu welingu lai Ala, nda welingu la taua.