NAHUMU 1 - Na Huratu Matua

¹ Yiana-ya na lii languna i Ala rukuna na Naniwa. Nuna na lii langu pa-palohangu wàngu harii mataya na pa-wuangu lai Nahumu, haàtu wunangu welingu Elikòhu.

Na hànggana i MIRI la Naniwa

² Nda na-mbuhangu-a i MIRI ka ningu angu pa-hihingu-na, na tau na mandubaku-ya, jianguma nahuku-nya. Wàngu mbumbaru-na na hànggana, na-palimba-nja da pawunda-da.

³ I MIRI nda narengga mbenia; tàka na nyuna kanjupu ma-kawaha-mbuya hi lupa jàka nggamu mawunda manjala nda jia pamara-ananya welingu la huku-nanya. La nggiya nalaku ningu i MIRI lai nu natungu na làpuru; la ngia padili wihina, hama karumangu-ya na kumburu tana lai nu.

⁴ Na-pangàdu-nya na tehiku hi na pamihi-ya, mbuu ndàbada da luku, na-panjàpu-ha da waida. Na Palindi Kàramilu dàngu da maràda rumba la Mbahàngu da-katukuru dàngu da-malaï ndàba da wàla ai la Limbanongu.

⁵ Da-kandàndaku da palindi la hanggana Nyuna; dàngu dalui ndàba da tandula. Wudaku jàka wànaka i MIRI, na-kanggauhaku na pinu tana, na pinu tana dàngu na mangia-nya da-kandàndaku.

⁶ Jàka nahàngga i MIRI nggamu ma-torungu? Nda ningu mapeku hinggilu-nya na mbenina? Na-hanubuku-nya na hàngga-na na ma-kandulangu da-karunggutu da watu hi kumburu tanaha la hanggana.

⁷ Nahàmu etina i MIRI, na-opangu banjaru-na jàka da-handuka, na-manggangu tau ma-handera lai Nyuna.

⁸ Hama tuna iwa obungu ma-pakauta, na-pakabu-ha da muhuna. Da matoru mbeni pa-ndubaku-ya na-nàhaku wànja meti hi dambuta.

⁹ Nggàra biaya na pawuku-mu ka ndubaku-ya i MIRI jàka wàmu, jiangu-ma ba kaba watuya na pahangga-mu. Nda jia pa-nduangu-ana pa-himbalu kiringu-na hanggangu la muhu - muhuna.

¹⁰ Napa pahulu-kau hama tuna rembi màdu hama tuna rii madàka pa-kalutungu.

¹¹ Welingu lai nyumu, ha dumu Naniwa, mbàda ngonjaru-naka na haàtu mambinu wàngu pawuku akatu-na. Nawuku-ya la pa-ndubaku-ya i MIRI.

¹² Ka panii-nanyaka i MIRI la tau Ihirailu, banjaru-na, “Jiapa-kai ka da-kapingatu da tau Ahuru dàngu nadangu na dihada, ba tuna pa-pakabu-ha napa hi da-molungu. Ha dimi banjaru-nggu, mbàda pa-mayila-nggunggaika, tàka nda jia hili wunda-anggu-nyapa nuna.

¹³ Nàhu pahupu-nggunyaka na kawaha-na na Ahuru lai nyimi, dàngu kubota-ya na nggili bàhi mahondu-kai,” wàna.

¹⁴ Yiana-yaka na botangu-na i MIRI rukuna na-banjaru Ahuru, “Nda ningua napa ana umbuku-da ka da-kahanga ma-pahilungu la banjaru-da. Da kahala hada marapu da maninja la uma marapu-da ku-pa-karunggutu-ha napa. Paloku haha-nggunya na pangia reti nduma tau Ahuru, ba nda ràka-ada paluri!” wàna.

¹⁵ Tàngaru-ya ba nàmunya nalii ningu la palindi - palindi na haàtu papalewa, mangàndi lii hàmu dàngu lii mànangu. Ha dimi banjaru Yahunda, mbabu-nyawa na lodu bokulu-mi dàngu wotu hawa da papeka-mi lai Ala. Nda jia hili pareta-ana-nyapa tau akatu na tanami. Pa-pakabu ndàba-haka nyuda.