MATIU 9 - Na Huratu Matua

I Yehu ba na-pamàlaru-ya na tau kaliparu

¹ I Yehu nahei la tena, hi napala-ya na tàma hi nabeli la kotaku-na.

² Lai nu dangàndi-nya haàtu tau kaliparu na ma-mahuru la topu. Ba naita-haka paraïna i Yehu ba natika pabokulu tuna nu na pawaida, ka panii-nanyaka na ma-kaliparu, “Pamàndu-nya na etimu ananggu! Da njalamu pa-jàmangu-haka,” wànanya.

³ Da ngguru anggama da maninja pa-pulungu-danyaka la etida, “Na tau yiana hihiku-nanya i Ala!” wàda.

⁴ I Yehu napinya na pa-pangàda-da, hi na-paàra-nja, “Nggikina hi na-akatu tuna nu na pangàdangu-mi?

⁵ Nggiya na marihi muda wàmi, ‘Da njalamu pa-jàmangu-haka, wànggunya’, jàka ndia ‘Hadangu-wa, lakuwa,’ wànggunya?

⁶ Tàka nàhu màta ka ku-paita-nggai tanda la pinu tana yiana na Ana Tau ba na-kuaha la pa-jàmangu njala,” wàna. Hi napanii-nya na ma-kaliparu, “Hadangu dumu, dandanja da topumu kau beli!” wànanya.

⁷ Nuna na ma-kaliparu hadangu-nanyaka hi nabeli la umana.

⁸ Ba daita-yaka tau nuna na matumbu, mangàdatu-danyaka hi dawotu-nya i Ala, nadu i Ala ba nawua-nyaka kuaha bokulu tungu nu la tau.

I Yehu ba napaau-nya i Matiu

⁹ Tunaka nu i Yehu dunjaku-nanyaka lai nu. Nu ba talànga lakuna, ita-nanyaka na tau na ma-pahurungu hilu katiku, na ma-tamungu Matiu, mandapu-na-padua la katuru ngia pakeina hilu katiku. I Yehu napanii-nya, “Mai kau tundungga!” wànanya. Ka hadangu-nanyaka i Matiu hi natundu-nya.

¹⁰ Ba talànga nganguna-ka i Yehu la umana i Matiu, dadangu da tau ma-pahurungu hilu katiku dàngu tau nda hàmu ba wàdanja madangu, angu ndàbada pangangu i Yehu dàngu da makiku-nya.

¹¹ Ninja da tau Parihi da maita-ya na rukuna nuna. Hi da-paàra-nja da tau makiku-nya i Yehu, “Nggikina na nggurumi nyimi hi nanga dànja da ma-pahurungu hilu katiku dàngu da tau nda hàmu?” wàda.

¹² I Yehu narongu-ya na paàrangu-da hi nahema, “Na tau hayandalu nda nggàra na ihi wangua ndotiru, mbulungu mahidu-a duna, wàna.

¹³ Manginjiru-ya nggàraya na pawuku-na na ndalaru na maninya daa la Huratu, ‘Nyungga karuhi-nggunya mila eti, nda kameti maraku banda-a,’ wàna. Nadu ba kumai ka paaunya na tau na mapeka hàmuna nda wànggua, tàka jiaya na pa-pakalana tau duku,” wàna.

Na rukuna na puaha

¹⁴ Tunaka nu da makiku-nya i Yuhani Pa-runungu mai-danyaka lai Yehu. Hi da-paàrangu, “Nggikina nyuma dàngu da tau Parihi hi ma-puaha tàka da makiku-nggau Nyumu hi ndia?” wàda.

¹⁵ Nahema i Yehu, “Màla bai kakaya nyimi, da ariyaa la mbabu pamaü papa peku-naka ba da-hawina dàngu ninya-padua na bidi papa la hongada nyuda? Ndia-a! Na nyuna nàmu-manya duna narehina na bidi papa jàka piti-yaka welingu lai nyuda. Nu hinaka duda hi da-puaha.

¹⁶ Nda ningua tau matambu kalembi ndai dàngu tera bidi. Nadu napa na tera bidi na-yudutu hi nahira-ya na tera memangu, ka lupa kahira nda hàmu-nanyaka duna na kalembi.

¹⁷ Tuna numbu nda ningua tau ma-paihingu angguru bidi la kanaingu ndai manulangu. Nadu napa na-kapoku-du na kanaingu nuna ka kahira-nanyaka, ka mbungu-nanyaka na angguru. Na angguru bidi paihi-nya la kanaingu bidimai bàdi, ka peku daingu hàmu ndàbada,” wàna.

Na anana na ama bokulu la uma bungguru Na kawini na ma-jonggaru-ya i Miri Yehu

¹⁸ Ba talànga panii dànanja da makiku-nya i Yuhani Pa-runungu i Yehu, tàka nanyaka na haàtu na ama bokulu la uma bungguru. Na-patika la hanggana i Yehu hi napanii, “Na ananggu kawini bidi meti-ma-ana. Tàka, mila àru etimu pali la umanggu, kau dàma àruya ka peku luri beli àruna,” wàna.

¹⁹ Ka hadangu-nanyaka i Yehu hamanai da makiku-nya hi da-kariangu dàngu nuna na tau.

^20-21 La padua ànda na haàtu na kawini na mambàda hakambulu dàmbu ndau-naka la pahidu mbungu ria na ma-panuangu la hauna katàri, nalua palihi-nya i Yehu welingu la kajia. Na pa-pangàda-na, “Mili ku-jonggaru-ya na hupu kalembi-ana ku-màlaru-ma duku,” wàna. Ka jonggaru-nanyaka na hupu kalembi-na i Yehu.

²² La rehi nu pa-mbelingu-nanyaka i Yehu hi naita-ya na kawini nuna, “Pamàndu-nya na etimu, ananggu! Nadu nyumu, bau wai-duka, màlaru-munyaka!” wànanya. La rehi nu-madua-ka ba na-màlaru nuna na kawini.

²³ Tunaka nu tàka-nanyaka i Yehu la umana na ama bokulu uma bungguru. Nu ba naita-haka da ma-palingu-ha da malingu la lii hawina dàngu ba nadangu na tau ma-kanyaüru,

²⁴ ka panii-nanjaka, “Luhu ndàbakai! Na anakeda yiana nda meti-ananya, mahuru-ananya duna,” wàna. Nyuda mbuu ndàbada dariki-nya i Yehu.

²⁵ Ba daluhu-ka da tau, tama-nanyaka i Yehu la kurungu-na na anakeda hi nayàpa-ya na limana. Ka hadangu-nanyaka nuna na anakeda.

²⁶ Na lii nuna nakada hàlanya tau la ngabana lai nu.

I Miri Yehu ba na pahàmu-ha da mapoki tau madua

²⁷ Ba nalaku-ka welingu lai nu i Yehu la padua ànda ninja da mapoki ba tau madua-ha da matundu-nya dàngu warada, “Anana i Ndautu, mila àru-nggama eti,” wàda.

²⁸ Ba natama-ka i Yehu la uma, mai-danyaka nuda da tau madua lai Nyuna. I Yehu na-paàra-nja, “Màla miwaika nu ba kumàka pa-pamàlaru-kai?” wànanja. Dahema nyuda, “Mawaikau,” hi wàda.

²⁹ Tàka i Yehu hi nadàma-ha da matada, “Ruku pawaimi, na-padeningu-wa na pamonumi,” wànanja.

³⁰ Ka peku ita-madua-daka. I Yehu na-pajàritu-manja ka àmbu dapanii-ya na rukuna nuna lai ngga - nggamu.

³¹ Ba tuna nàhu ba dalaku bobaru-madanya na rukuna i Yehu la nggubulu ngabana lai nu.

I Yehu ba na-pahàmu-ya na makambiu

³² Ba dalaku-ka nuda da tau madua, ninya na haàtu na tau kambiu na pa-huruku wàndi akatu na pangàndi lai Yehu.

³³ I Yehu nawàngga-ya na wàndi akatu ka jia mema-madua-yaka na tau nuna ba napingu beli pa-kareuku. Na tau dangu hangàtaru-nanyaka, “Ndedi ta-handàkangu pa-itangu matungu nu la Ihirailu,” wàda.

³⁴ Tàka da tau Parihi dapanii, “Na kapala wàndi akatu dumu na mawua-nya kuaha hi namàka la pawàngga wàndi akatu,” wàda.

I Yehu ba namila-nya eti na tau dangu

³⁵ Tuna nu i Yehu ba nalaku winggiru-nya lai nu, welingu la hau paraingu laku la hau paraingu, welingu la hau kotaku laku la hau kotaku. Na-ajaru-ya na tau la uma bunggu - uma bungguru, ba na-pakada-nya na Lii Mànangu rukuna jàka nggiki hama pareta-na i Ala ba Hanganji-ya. Nyuna na-pamàlaru tau maningu hidu hangia - hangia hamanai na maningu nyurangu la tàda ihina.

³⁶ Ba naita-yaka i Yehu na tau dangu, mila-nanyaka eti, nadu nyuda ba hondaru-danyaka dàngu nda nggàra wàda, hama tuna na mbimbi na manda ningu mapawa-nja.

³⁷ I Yehu hi napanii-nja da makiku - makiku-nya, “Nadangu na pamuti, tàka da mamuti ana hawutu-ada.

³⁸ Jia ba tuna karai-yawa na mangu wokangu ka na-paràhangu-ki tau mamuti-ya na pamuti-na,” wàna.