MATIU 7 - Na Huratu Matua

Rukuna na pa-tandangu ngera tau hawiangu

¹ “Àmbi patanda-nya ngera na angumi patau, nyimi wiki ka àmbu na-patanda-nggai ngera paraïna i Ala.

² Nadu hama tuna bai patanda-nya ngera na angumi patau, napa tuna numai ba na-patanda-nggai ngera i Ala. Na hukutu na pa-hukutu wàminya na tau hawiangu, tuna numai napa i Ala ba na-hukutu wànggai.

³ Nggikina hi mipanau niya na kanjibi ai la matana na angumi, tàka na patengangu la mata wikimi nyimi hi ndai pàdanyai?

⁴ Nggikina hi mitoru mbeni bia papanii la angumi, ‘Màla ka kuàli-nya na kanjibi ai la matamu,’ hi wàminya tàka la mata wikimi hi ninya-padua na patengangu?

⁵ Ha ma-kapelu! Àli pàkunya bàdi na patengangu la mata wikimi, hinaka duna hi miita hàmuya, hi peku àli-minya na kanjibi ai la mata angumi.

⁶ Àmbi wua-dunja da ma-matua da ahu napa da-pambelingu-du panyàba-kai. Dàngu àmbi ndauha-dunja mutiara da wei, ka àmbu dakali - lijaku-nja nu da mutiara,” wàna.

Karai, himbu, dàngu katòrukungu

⁷ “Karai-wa, napa ingalangu. Himbuwa, napa ihunggungu. Katòrukungu-wa, napa na pindu pa-bunggahu-manggai.

⁸ Nadu na tau na makarai napa na-ngalangu; na tau na mahimbu napa na-hunggungu; dàngu na tau na ma-katòrukungu, napa pa-bunggahu-nya pindu.

⁹ La hongami nyimi ningu nu ama mawua-nya watu na anana jàka na-karai-ya roti?

¹⁰ Jàka ndia ka nawua-nya ularu jàka na-karai-ya iyangu?

¹¹ Jiapa kai akatu-kai, mipingu-mai dimi nyimi pawua-nja mahàmu da anami. Ka narihi-aipa duna na Amami la awangu! Narihi-pa duna napa pawua-nya mahàmu na tau na makarai-ya.

¹² Pa-luangu-wa limami la tau hawiangu hama tuna na parinju-mi ka tuna-nggama nu tau ba da-palua-nggama lima ba wàmi. Ka ba jia-duyaka na ihi mbàngi-na na ukuna i Muha dàngu na lii pa-ajaru-da da wunangu dangu,” wàna.

Na pindu kujuru

¹³ “Tama li ninguwa la pindu ma-kujuru, nadu ba na-bokulu na pindu dàngu ba na-lerangu na ànda na ma-hanggangu la naraka, nadangu na tau na mali ningu lai nu.

¹⁴ Tàka na-kujuru na pindu dàngu naharui na ànda na ma-hanggangu la luri. Dàngu hawutu-ana na tau na mahunggu-ya,” wàna.

Na pingi ai dàngu wuana

¹⁵ “Pa-nanjarungu hangganja da wunangu kabàli. Da matàka-nggai ba da-pahada mbimbingu, tàka na ma-langatàka nyuda da-pabohu ahu rumbangu.

¹⁶ Napa nyimi mitandaha la paraï paruku-da. Da lulu rii paketu nda datua wua angguru dàngu da pingi rii madàka nda datua wua kapilitu.

¹⁷ Welingu la pingi ai kamboka ta-ngalangu wua mahàmu, tàka welingu la pingi ai nda kamboka ta-ngalangu wua manda hàmu.

¹⁸ Da pingi ai kamboka nda datua wua manda hàmu, tàka da pingi ai nda kamboka nda datua wuada mahàmu.

¹⁹ Nimbihu-da da pingi ai da manda tu wuada punggu biaha ka tunuha.

²⁰ Tuda nu da wunangu kabàli. Nyimi napa mitanda-ha la ruku ràmada,” wàna.

Na paruku nda jia-aya na panii

²¹ “Nda mbuu ndàba-ana na mawara-ngga, ‘Miri, Miri,’ na mawàna, na matama la angu banjaru-na i Ala, tàka mbulungu-ana na tau na malaku-nya na pambuha-na na Amanggu la awangu.

²² La Lodu Hupu njàpuna napa nadangu na tau na mapanii lai Nyungga, ‘Miri, Miri, ka nda jiaya na tamumu Nyumua làti ba ma-bobaru wànya na puluna i Ala? Dàngu ka nda jiaya na tamumu Nyumua làti ba mawàngga-ha da wàndi akatu dàngu ba ma-patumbu-ha da tanda pa-hangàtarungu? wàdangga.

²³ Tàka napa Nyungga kuhema-ha, Nda kuwàngu patanda-makai duku. Pa-yilangu-kai weli yiahungu, nyimi tau mawunda akatu’, hi wànggunja,” wàna.

Na mapingu pawulu uma dàngu na manduba pawulu uma

²⁴ “Na, na tau na marongu-ya yiana na paniinggu, ka natundu-nya, hama-naka na tau na mapingu pa-pahadangu umana la pinu watu.

²⁵ Ba napuru-ka na urangu, dàngu ba na-tàkaka na iwa hamanai na ngilu mbangatu na ma-làndahu-nya nuna na uma, nda nanjoru-a, nadu ba pawulu la pinu watuya.

²⁶ Tàka na tau na marongu-ya na paniinggu yiana, tàka nda natundu-nya, hama-naka na tau na manduba na ma-pahadangu umana la pinu wara.

²⁷ Ba napuru-ka na urangu, dàngu ba natàka-ka na iwa hamanai na ngilu mbangatu na ma-làndahu-nya nuna na uma, ka njoru-nanyaka. Kanjupu ruha halawàla-ya,” wàna.

Na kuaha-na i Yehu

²⁸ Ka njàpu-nanyaka na-ajaru-naha i Yehu, na tauka na maninya lai nu hangàtaru nda uku-danya ba darongu-ya na lii pa-ajaru-na.

²⁹ Nadu ba lii pa-ajaru pa-mahumbarungu-ya, nda hama tuda da lii pa-ajaru-da da ngguru anggama-da.