MATIU 5 - Na Huratu Matua

Na pa-bobarungu la palindi

¹ Ba naita-yaka i Yehu na tau ba nadangu tuna nu, heina-nyaka la hau tandula. Ba na-mandapu-ka, mai-danyaka lai Nyuna da makiku-nya,

² hi na-pakiringu pa-ajaru-ha:

Na pa-ohangu na ma-langatàka

³ “Oha-adaka da tau da ma-pàdangu nda màkada, hi jiaya i Miri-makia-ka na pa-kanderu-da; nyuda jia-haka da nua banjaru-na i Ala!

⁴ Oha-adaka da tau da ma-handuka etida; i Ala napa na ma-pamanda-nja!

⁵ Oha-adaka da tau da ma-karàda etida; i Ala napa na patutu-nya na paràndi-na lai nyuda!

⁶ Oha-adaka da tau da ma-rinjungu pawànya na pambuha-na i Ala; i Ala napa na-pahoda-ha nyuda!

⁷ Oha-adaka da tau da maaï namu anguda; i Ala napa naaï namuha nyuda!

⁸ Oha-adaka da tau da ma-yahangu etida; napa nyuda datanda-ya i Ala!

⁹ Oha-adaka da tau da matàka ngàndiya na papeku la tau pinu tana; napa napeka i Ala ba ana-nanja nyuda!

¹⁰ Oha-adaka da tau da ma-pàdangu mayila ba pajàra-ha ruku lumu-danya na pambuha-na i Ala; nyuda jia-haka da nua banjaru-na i Ala!

¹¹ Oha-amika nyimi jàka ningu ma-paaka-nggai, ma-pamayila-kai, dàngu ma-pulunggai lumunggu Nyungga.

¹² Da wunangu da maluri wunganggai nyimi pa-mayila tudanja numai duda. Hanggela hawola-wa, nadu ba na-bokulu na wundami na pa-payema-nanggai la awangu i Miri ndumami nyimi,” wàna.

Na mehi dàngu na harii

¹³ “Nyimi mehi pinu tanakai. Na mehi jàka nakàba-ka pekuna-ipa la pahilu pambàruya? Nda ningu-apa linguna, jia la wàru-kia-nyaka hi nakali - lijaku-nya tau.

¹⁴ Nyimi hambila pinu tanakai. Na paraingu na maninya la pinu tandula nda peku wini-anya.

¹⁵ Nda ningua tau ma-pakehingu palita tàka hi na-pangguru wànya mbàlu na palita. Jiangu-ma duna ba natuya la tandaina, hi na-hambila ndàbanya na tau na maninya la uma.

¹⁶ Tuna numbu na hambila-mi màta ka na-handaraku la hangga tau, ka peku ita-danya na paraï rukumu na mahàmu, hi dawotu-nya na Amamu la awangu.”

Na lii pa-ajaru rukuna na uku anggama Yahundi

¹⁷ “Àmbi kaka-duya ba mai-nggunya pa-podahu-ha da ukuna i Muha dàngu da lii pa-ajaru-da da wuna - wunangu. Nyungga duku nda mai-nggunya pa-podahu-aha, tàka ka paloha-nya na lii kaloka-mada duda wànggu duku.

¹⁸ Namuya! Ka dàngu ni bia-nyapa na awangu dàngu na tana nda hau hurupu jàka ndia kadutulu makudu halawàla nu la uku, nda pajia podahu-aha, jàka ndedi-madu na-patutungu hàla.

¹⁹ Jia ba tuna, nggamu mapanggaya na haua welingu la pareta - pareta nuda, jiapa ka makudu halawàla-ya, dàngu ka na-ajaru tau hawiangu la patuna numbu, jia-yaka na ma-màrahu halawàla la honga banjaru-na i Ala. Na panjàngungu-na, nggamu ma-padeni-nja da pareta nuda dàngu ka na-ajaru tau hawiangu la patuna numbu, napa jia-yaka na ma-bokulu la honga banjaru-na i Ala.

²⁰ Jia ba tuna, namuya: Nyimi nda napeku-a la patama la banjaru-na i Ala, jàka ndai rihinja da ngguru anggama dàngu da tau Parihi la pa-patutu-nya na pambuha-na i Ala!” wàna.

Na lii panamu hahangu rukuna na mbeni

²¹ “Nyimi pi-maminya na pa-ajaru-da da bokunda la mangilu: Àmbi pameti tau, nggamu na mapameti tau timbanya bàdi ngerana, wàda.

²² Tàka nàhu Nyungga ka kupeka-nggai nggamu mambeni -nya na anguna timbanya badi na ngerana; dàngu jàka nggamu ma-tolangu anguna, timbanya bàdi la Bata Bokulu Anggama. Dàngu nggamu, ‘Katoba,’ na mawàna-nya na anguna ràka pa-wàrungu la epi naraka-ya.

²³ Jia ba tuna, era ningu haàtu la hongami mangàndi maraku lai Ala, tàka hi jia namu bia-nanya ba ninyapa na haàtu na makaraü-nya eti,

²⁴ màta ka na-dunjaku pàkunya na pangàndi-na la hangga ngia pawotu maraku, ka nalua pàku pa-pahàmu dànya na tau nuna. Hàla duna, peku-naka ba nabeli pawotu-ya na tanda maraku-na lai Ala.

²⁵ Ngera hama tuna ka ningu tau makàla-kai la batangu, papeku pàku dàngu nyuna ba ningupa pekuna ba ndedi natàka la batangu. Jàka ndia, pajàma-nanggaika na tau nuna la hakimu, tàka nyuna hi na-pajàma-nggai la palihi. Hàla napa na palihi patama-nanggaika la uma kapàtangu.

²⁶ Dàngu namuya: Napa nda peku luhu-amipa welingu la uma kapàtangu, jàka ndedi-madu ikanjupu hàlaha da palohu-mi,” wàna.

Rukuna na njuraku

²⁷ “Nyimi mipi-manyaka yiana na lii pa-ajaru: Àmbu njuraku, ba wàna.

²⁸ Tàka nàhu kupeka-nggai: nggamu ma-panau-ya na haàtu na kawini ba dàngu kabàliku-nanya ba miniya, mbàda njuraku dàmana-nyaka nuna na kawini daa la etina.

²⁹ Jàka na mata kawana-mu na ma-titiru-kau la panjala, rukiya kau wàrunya na mata nuna! Nahàmu-pa ba na-mbulangu na hangia na nua ihimu welingu ba dàngu mbulungu-na na ihimu ba wàrunggau la naraka.

³⁰ Jàka na lima kawana-mu na ma-titiru-kau la panjala, kadipu-ya wàrunya nu na limamu! Nahàmu-pa ba na-mbulangu na hapungu na limamu welingu ba dàngu mbulungu-na na ihimu bau tama la naraka.

Rukuna na pahewa

³¹ “Nimbunyai na lii pa-ajaru: nimbihu-na na tau na ma-pahewa dàngu papaha-na, nawua-nya bàdi huratu pahewa, wàna.

³² Tàka nàhu Nyungga ka kupeka-nggai: nggamu na ma-pahewa dànya na papaha-na, dàngu nda hanjàliru-na nuna na tau kawini, pakiri njuraku wàngu-dunaka na papaha-na, jàka nahili mangoma nuna na papaha-na. Dàngu jàka nggamu na ma-kanoma-ya nuna na kawini pa-pahewangu, njuraku-mbunanya.”

Rukuna na harangu

³³ “Nyimi mipi-manyaka la boku la mangilu-nda ba ninya na lii pa-ajaru-da: Àmbu hinggilu-nya na paràndi-mu. Nggàraya na pambàda ràndi wàmu harangu la hanggana i Ala, patutu-manya bàdi,” ba wàda.

³⁴ Tàka Nyungga nàhu ka kupeka-nggai: Àmbi harangu ndokudu, àmbi hara wànya na awangu, ba kanjàka-na i Alaya,

³⁵ hamangui wànya na tanambu, ba lata wihi-nanya; jàka ndia wànya la Yeruhali, ba parai Hanganji bokulu-ya.

³⁶ Màtangu-mbu pahara wànya na katiku-mu, nadu nyumu wiki ba ndau ngalangu-a pa-pabara-ya jàka ndia pa-pamiti-nya na hawàla na ruu lunggimu.

³⁷ ‘A-a,’ wàmu bia, jàka ndia, ‘ndia-a,’ wàmu bia. Na marihi-nya nuna ma-pawelingu lai ma-akatu-ya.”

Rukuna la patungu hilu kiringu

³⁸ “Nyimi mipinya ba nimbunya na lii pa-ajaru: Mata hilu mata, ngàndu hilu ngàndu, na mawàna.

³⁹ Tàka nàhu Nyungga ka kupeka-nggai: àmbi tungudu hilu kiringu la matunggai ma-akatu. Tàka na pa-njàngangu-na jàka natàba-ya na papu kawana-mu, màta kau pajàma-mbunya na papu kalaimu.

⁴⁰ Dàngu jàka nakàla-kai tau la hakimu, ka na-karuhi-ya na kalembi-mu, wua-mbunya na kalembi bokulu-mu.

⁴¹ Jàka ningu mangia dita ma-pambana-kau paduku-ha da ngàndina ràka pa-lakungu hau kilu, duku pangala-manja lundu dua kilu.

⁴² Jàka ningu makarai-kau ngga - nggàra, wua-manya. Dàngu àmbu tipa-duya na tau na makarai pinjangu ngga - nggàra lai nyumu.”

Aï namuya na papa

⁴³ “Nyimi mipi-manya ba ningumbu lii pa-ajaru: namuha da angumu dàngu karaü-nja eti da papamu, ba wàna.

⁴⁴ Tàka nàhu Nyungga ka kupeka-nggai: namuha da papami, dàngu hamaya-nja ndumada da tau da ma-pamayila-kai,

⁴⁵ ka pekuna ba naana-nggai na Amami la awangu. Nadu i Ala ba na-pahunga-nya mata lodu ndumana na tau hàmu dàngu na tau akatu-mbu. Nyuna na-papuru-nya urangu na tau na mawunda ma-padeningu dàngu na mawunda ma-akatu-mbu.

⁴⁶ Nadu jàka jiaya na tau na manamu-akai na panamu-mi, nggàra linguna-ipa i Ala hi na-papapa-ya na paraï rukumu? Ka nda tuda numbu wàmi da ma-pahurungu hilu katiku?

⁴⁷ Dàngu nyimi jàka mi-kamàhaku dànja da angu-ami, nggàra-yaka na ngia parihi-mi? Da tau da manda tandaya i Ala tuda numbu.

⁴⁸ Na Amami la awangu nda ningua nyurana nahàmu-nanya mbuu ndàbana na tauka. Nyimi dimi ka timi numbu,” wàna.