MATIU 4 - Na Huratu Matua

I Miri Yehu ba kamanya

¹ Tunaka nu i Yehu iru ngàndi-nanyaka Ngahuna i Ala la maràda telangu ka nakama-nya paraïna i Kambàliku.

² Patu kambulu lodu patu kambulu ruduna i Yehu ba nda nangangu. Ka manjuu-nanyaka.

³ Mai-nanyaka i Kambàliku hi napanii, “Nyumu Ana Alakau wàngguka? Paràha-nja yia da watu ka dadedi roti”, wànanya.

⁴ Napaya i Yehu, “La Huratu Matua ninya na pa-tulihu: Na tau nda roti pàku paluri wàna, tàka jia-mbuya welingu la nimbihu-na na pulungu na patiki-na i Ala,” wànanya.

⁵ Hàlaka nu i Kambàliku nangàndi-ya i Yehu la Yeruhali, na parai matua, hi nabànjalu-ya dita la kawuku Umana i Miri.

⁶ Hàla i Kambàliku hi napanii dànya, “Nyumu Ana Alakau, wàngguka? Jàka tuna nu kamburu mbehangu-wa hu waa; nadu daa la Huratu Matua ninya na pa-tulihu, ‘I Ala napa na-paràha-nja da papalewa-na la pamangga-nggau Nyumu, nyuda napa danggepi-kau la limada, hi nda peku tunjuru-da da wihimu la watu’, wàna,” hi wànanya.

⁷ Nanapa-ya i Yehu, “Tàka nimbunyai daa la Huratu Matua na pa-tulihu: Àmbu kama-dunya na Miri Alamu, ba wàna,” hi wànanya.

⁸ Tunaka nu i Kambàliku hi nahili ngàndiya i Yehu la palindi ma-kanjupu jangga hi na-paita hàlanja da pa-hanganji la pinu tana dàngu mbuu ndàbada da pawulu-naka.

⁹ Hàla panii-nanyaka i Kambàliku, “Yiada-ka mbuu ndàbada ku-wuanggau-nja Nyumu, mili kau patika bau maraku-ngga,” wànanya.

¹⁰ Nanapa-ya i Yehu, “Pahilangu hiana-kau, ha Ma-pakamangu! Daa la Huratu Matua ninya na pa-tulihu: Maraku-nya i Miri, Alamu, dàngu lumunya nyuna-a, wàna”, hi wànanya.

¹¹ La malamiri i Kambàliku dunjaku-nanyaka i Yehu, ka tàka-danyaka da papalewa la palumu-nya Nyuna.

I Miri Yehu ba kawunga ràmana la Nggalilia

¹² Ba narongu-yaka ba patama-nya la uma kapàtangu i Yuhani, hinggilu-nanyaka i Yehu la Nggalilia.

¹³ Na-dunjaku-nya la Naharitu, hi na-paengangu la Kapinaumu la halinggi Tàma Nggalilia la ngaba Hembulungu dàngu Nàputali.

¹⁴ Ba nalaku-nyaka na matuna nu Nyuna i Yehu, pa-deningu-nanyaka na paniina i Wunangu Yahaya:

¹⁵ “Na tana Hembulungu dàngu tana Nàputali, la ngarangia hanggangu la tàma, la hapapa Luku Yorundangu, la tana Nggalilia pangia tau nda Yahundi!

¹⁶ Na banjaru na maluri la kapàtangu da-itangu-ka harii ma-hanggilangu! Ndumada nyuda da ma-ngiangu la kapàta meti nahunga-njaka ma-handaraku hambila!” ba wàna.

¹⁷ Piti welingu la rehi nu pa-kiringu-nanyaka i Yehu pa-pabobarungu, “Panjilungu-wa! welingu la njalami, nadu i Ala ba pareta-ama-naka ba Hanganji-ya!” wàna.

I Miri Yehu ba napaau-nja da mini jala tau mapatu

¹⁸ Ba talànga njàlapu-na i Yehu la hingi wara Tàma Nggalilia, naita-ha da mini jala tau madua, i Himungu (i Peturu ba wàda-mbunya tamuna) dàngu na erina i Andaria. Nyuda yàpada-padua iyangu lai nu la tàma wàngu jala.

¹⁹ I Yehu napanii dànja nyuda, “Mai kai tundungga. Napa ka ku-ajaru-kai la pajala tau,” wànanja.

²⁰ Manyamalu dunjaku-madua-danjaka da jalada hi datundu-nya i Yehu.

²¹ Laku pa-ngalangu-nanyaka i Yehu, hi naita-ha da tau madua da habanjaru da ma-paangu paluhu i Yakombu dàngu i Yuhani, anana i Hambandiu. Da-pambapa dànya na amada pa-pahulungu jala daa la tena. I Yehu napaau-nja nyudambu,

²² ka manyamalu dunjaku-madua-danyaka na tena dàngu na amada, hi datundu-nya i Yehu.

I Yehu ba na-ajaru, ba na-pabobarungu dàngu ba na-pamàlaru tau

²³ La Nggalilia, i Yehu na-winggiru hàlanya na tana hi na-ajaru la uma - uma bungguru-da. Na-bobaru-ya na Lii Mànangu, ba pareta-nanyaka napa i Ala. Dàngu na-pamàlaru-mbuha da tau mahidu dàngu da maningu nyurangu.

²⁴ Na langu rukuna i Yehu nakada hàla-nyaka la tana Hiria, hi lupa nadangu na tau na mamai lai Nyuna. Nyuda dangàndi-ha da tau ma-pàdangu hidu dàngu handuka hangia - hangia. Da tau da pa-huruku wàndi akatu, da mawutu manu, dàngu da ma-kaliparu, na-pamàlaru ndàbaha paraïna i Yehu.

²⁵ Dangu ailulu tau matundu-nya i Yehu la rehi nuna. Ningu mamai welingu la Nggalilia, ningu welingu la Parai Hakambulu, welingu la Yeruhali, la Yundia, dàngu ningumbu mamai welingu la tana la hapapa luku Yorundangu.