LUKAHU 5 - Na Huratu Matua

I Miri Yehu ba napindi-ha da kawunga ma-kikungu

¹ Handàka, i Yehu ndolaku-nanya la hingi Tàma Nggeniharitu. Nadangu na tau na ma-pahuharungu la pa-patingi-nya na lii welingu lai Ala.

² I Yehu naita-ha da tena ba dàmbuda la hingi tàma; da mayàpa iyangu mbàda puru-daka welingu la tena dàngu baha-danja da jalada.

³ I Yehu nahei la hau tena, na tenana i Himungu, hi na-paràha-nya i Himungu ka na-ndujaru-kinya ka namarau-ki welingu la hingi tehiku. I Yehu na-mandapu la tena hi na-ajaru-ya na tau dangu.

⁴ Ba nahàla-ka pa-ajaru, hi napanii-nya i Himungu, “Buhiya la pangia mamanjolungu, kau walaha da njeringu-mu kau yàpa iyangu,” wànanya.

⁵ Nahema i Himungu, “Umbu Ngguru, kamodu mahari - rii-kama ba mapamukarungu, ba tuna nda nggàra-ma payàpa-ma! Tàka ba paràhangu-mu nyumuya, hàmudu; napa kuwala-kiha da njeringu-nggu,” hi wàna.

⁶ Ba dawànya-ka nuna ka ngalangu-duda-nyaka iyangu da - dangu, datika pa-kahira-ka-amangu da njeringu.

⁷ Jia-duyaka hi dakarai pa-ndulangu la anguda la hau tena. Ka mai-danyaka da anguda, hi da-pambapangu pa-paihi-nja da tena ba dàmbuda ba dambinu wàngu iyangu hi lupa datika pa-tambulu-ka-amangu nuda da tena.

⁸ Ba naita-yaka na matuna nu i Himungu, maràbaku-nanyaka la hanggana i Yehu, “Maraungga Miri! Nyungga tau njalaka duku!” hi wàna ba napanii.

⁹ I Himungu dàngu mbuu ndàbada da anguna da-hangàtaru ba daita-haka da iyangu payàpa-da ba dadangu tuda nu.

¹⁰ Jia-mayai duda da anguna i Himungu, nu i Yakombu dàngu i Yuhani, da anana i Hambandiu. I Yehu napanii-nya i Himungu, “Àmbu mangàdatu! Piti welingu nàhu nyumu napa mini njeringu taukauka,” wànanya.

¹¹ I Himungu dàngu da anguna yila-danjaka da tena la mara tunaka nu dunjaku hàla-danjaka, hi dakiku-nya i Yehu.

I Miri Yehu ba na-pamàlaru-ya na tau na mahidu manula pa-mayitangu

¹² La hau lodu, i Yehu ninya la hau paraingu. Lai nu ninya haàtu-na na tau na mahidu manula pa-mayitangu. Ba naita-yaka i Yehu, patika-nanyaka la hanggana, hi na-kamahingu, “Umbu, jàka umbuhangu, peku-mana dumu bau pamàlaru-ka!” wàna.

¹³ I Yehu nadàma-ya na tau nuna hi napanii-nya, “Ku-mbuhangu, màlaru-wa!” hi wànanya. Ndedi mbàdiku-na munangu-madua-danyaka da mahidu-nya.

¹⁴ Hàla i Yehu hi nahiri-nya na tau nuna la papanii-ya na rukuna nuna, jiapa nda nggamuya, “Luawa la ratu, kau karaiya ka na-pakaràngi-ya ba màlaru-munyaka nyumu. Hàla kau lua ngàndi kameti maraku hama tuna na lii pareta-na i Muha, tandana la tauka ba tuba màlaru langatàka-muka,” wànanya.

¹⁵ Ba tuna na rukuna i Yehu manaü wewarungu-ma-ana la nggi - nggi, dàngu nadangu na tau na mamai la pa-patingi-nya dàngu ka na-pamàlaru-kama welingu la hiduma ba wàda.

¹⁶ Hàlaka nu laku-nanyaka i Yehu pa-hamayangu la pangia ma-hinggilu.

I Miri Yehu ba na-pamàlaru-ya na tau kaliparu

¹⁷ La hau na lodu i Yehu talànga ajaru-na, ninja ba tau mapira-ha da tau Parihi dàngu ngguru anggama da ma-mandapu lai nu. Nyuda maida welingu la Yeruhali, dàngu welingu la parai - paraingu la Nggalilia dàngu Yundia. Na kuaha-na i Miri nimanya lai Yehu la pa-pamàlaru-ya na tau na mahidu.

¹⁸ La rehi nu ninja ba mapira-ha da mangàndi-ya na haàtu na tau kaliparu ba dàngu katuda-na la topu. Da-pamukarungu pangàndi-ya nu na tau daa la uma, ka peku bànjalu-ndanya la hanggana i Yehu, ba wàda.

¹⁹ Tàka ba lalu mbana danguna na tau, nda peku tama ngàndi-adanya hu daa la uma. Ruku tunanu-duka hi dawotu-ya dita la toku ndidu uma. Hàla hi da-pukalu-ha da ruu uma, hi da-duluru mangu topunya la hanggana i Yehu, la padua tau dangu.

²⁰ I Yehu ba naita-yaka ba na-bokulu tuna nu na pawaida, panii dàna-nyaka nuna na tau, “Angu dedi, da njalamu pa-jàmangu-haka,” wànanya.

²¹ Da ngguru anggama dàngu da tau Parihi batangu-danyaka dàngga anguda, “Nggamuya ni na tau nina, hi natoru mbeni bia pa-hihiku-ya i Ala? Nggamu nàhu ma-jàmangu njala, ba mbulungu i Ala pàku?” wàda.

²² I Yehu napinya na pabata-da. Jia-duyaka hi napanii, “Nggikina hi tuna nu na pa-paàra-mi la eti?

²³ Nggiya na marihi muda wàmi, ‘Da njalamu pa-jàmangu-haka’, wànggunya jàka ndia, ‘Hadangu-wa, lakuwa!’ wànggunya?

²⁴ Tàka nàhu napa ka ku-pakaràngi-nggainya, la pinu tana yiana na Ana Tau ba na-kuaha la pa-jàmangu njala,” wàna. Hi napeka-nya na ma-kaliparu, “Hadangu-wa dumu, dendiha da topumu, lakuwa!” wànanya.

²⁵ Manyamalu hadangu-madua-nanyaka na tau nuna la hanggada nyuda mbuu ndàbada, nadendi-ya na pa-katuda wàna, hi nalaku dàngu wotu-nanya i Ala.

²⁶ Nyuda mbuu ndàbada da-hangàtaru langatàka hi dawotu-nya i Ala. Dàngu mangàdatu-da dapanii, “Nda ningu hamana na paita-nda la lodu nàhu!” wàda.

I Miri Yehu ba napaau-nya i Lewi

²⁷ Hàlaka nu luhu-nanyaka i Yehu, hi naita-ya na haàtu na tau na makei hilu katiku, Lewiya na tamuna, mandapu-na padua la katuru-na. I Yehu napanii dànya, “Kikungga!” wànanya.

²⁸ Hadangu-nanyaka i Lewi, hi na-dunjaku hàlanja, hi nakiku-nya i Yehu.

²⁹ Hàlaka nu i Lewi hi nawunda-nya remi i Yehu la umana. Dadangu da tau makei hilu katiku dàngu tau hawiangu mangaa dànja nyuda.

³⁰ Ba mapira-ha da tau Parihi dàngu da ngguru anggama da ma-karaü etida, dapanii dànja da makiku-nya i Yehu, “Ka nggikina nyimi hi mingaa ngunu daa bianja da tau kei hilu katiku dàngu da tau nda hàmu hawiangu?” wàda.

³¹ Nahema i Yehu, “Na tau na ma-hayandalu nda naihi wàngua ndotiru; mbulungu tau mahidu-a duna.

³² Nyungga ba kumai, ka kupaau-nja da tau da mareki wikida ba tau hàmuha nda wànggua, tàka jiaha da tau njala ka da pa-mbelingu welingu la njalada wànggu duku,” hi wàna.

Na rukuna na puaha

³³ Da tau dapanii-nya i Yehu, “Da makiku-nya i Yuhani dàngu da makiku-nja da tau Parihi dakàli puaha dàngu da-hamayangu. Tàka da makiku-nggau Nyumu ngangu ngunungu bia-danya,” wàdanya.

³⁴ Nahema i Yehu, “Màla nyimi pekuna bai paràha-nja pa-puaha la remi pamaü papa da ariyaa, ba dàngu ninya padua na bidi papa mini la hongada nyuda? Ndia-mapa duna!

³⁵ Tàka napa ninya na rehina na bidi papa mini jàka piti-yaka welingu lai nyuda. La rehi nuna hinaka duda hi da-puaha,” wànanja.

³⁶ Hàla i Yehu peka-nanjaka na pangerangu yiana, “Nda ningua tau matambu kalembi memangu dàngu ha-kadipu tera welingu la kalembi bidi. Nadu ba nahira-ya na kalembi bidi. Dàngumbu na tera tambu bidi nda nanggepi-mbu la kalembi ndai.

³⁷ Tuna numbu nda ningua tau maburi-ya na angguru bidi la kanai manulangu ndai, nadu na angguru bidi napa jia-yaka na ma-pawiti-nya hi nakapoku na kanaingu. Ka mbungu-nanyaka na angguru, tàka na kanaingu ruha-nanyaka.

³⁸ Na angguru bidi buriya la kanaingu bidimai bàdi.

³⁹ Hamanai nda ningua tau ma-mbuhangu pa-unungu angguru bidi ba nahàla pa-unungu angguru ndai. ‘Na angguru ndai narihi hàmupa,’ wàda,” hi wàna.