LUKAHU 3 - Na Huratu Matua

Na rukuna i Yuhani Pa-runungu

¹ La ndaungu hakambulu lima ba na-pareta i Hanganji Bokulu Timbiriu, i Putihu Pilatu na nggumbunuru la Yundia, dàngu i Harondi na ma-pareta la Nggalilia, i Pilipu, angu dedina i Harondi na ma-pareta la tana Ituria dàngu Tarakuniti, tàka i Lihania na-pareta la Ambileni.

² Da ma-katangu ratu bokulu jiaha i Hanàhu dàngu i Kayapàhu. La ndaungu nuna-duka i Ala ba napuru pekanya i Yuhani, anana i Hakaria la maràda wara.

³ I Yuhani laku-nanyaka lai nu - lai nu la nggubulu ngaba Luku Yorundangu dàngu ba na-patàka-nya na lii welingu lai Ala. I Yuhani na-warangu, “Pa-mbelingu-wa welingu la nja - njala-mika, dàngu nyimi parunu-manggai bàdi, ka peku jàma-nanggai i Ala,” wàna.

⁴ Nuna na-pajàngapungu na pa-tulihu la mbukuna i Wunangu Yahaya, “Ningu tau ma-warangu la maràda wara, ‘Payema-nya àndana i Miri, pa-linjaku-nya ngarangia-na Nyuna.

⁵ Da lola - lolangu hungguru-nja, da palindi dàngu da tandula pedahu-ha. Da ànda ma-pabikungu patànji-ha, da ngarangia karobaku pamera-nja.

⁶ Na tau la pa-nggubulu awangu napa naita-ya i Ala ba na-pamàna-nya na tau!’ ” wàna.

⁷ Dangu tau mamai lai Yuhani ka parunu-nja. I Yuhani napanii-nja, “Nyimi tau akatu-kai! Nggamu na mapeka-nggai nyimi ba peku marami welingu la hukungu-na i Ala na manàmu-nya?

⁸ Pa-itangu-wa rukumi nyimi ba pa-mbelingu-minyaka welingu la njalami! Àmbi panii-duya, i Ambarahàmu ba boku la mangilu-minya. Namuya: Welingu la wa - watu yiada-mbu i Ala napeku-mbu patunya ana umbuku-na i Ambarahàmu!

⁹ Na kataka ninya padua-ka la papunggu-ha da pingi ai lundu la amuda. Da pingi ai - pingi ai da manda tu wuada mahàmu, napa papunggu-ha dàngu hi kawuka-nja la epi,” wàna.

¹⁰ “Ka nggikina wàma-aka nu?” wàda da tau ba da-paàra-nya i Yuhani.

¹¹ Nahema i Yuhani, “Na tau na maningu dua mbàla kalembi-na, màta ka nawua-nya na hawàla na tau na manda ningungu; dàngu na tau na maningu pa-ngangungu, màta ka na-paberi-nya,” wàna.

¹² Da ma-pahurungu hilu katiku damaimbu lai Yuhani ka na-parunu-nggama ba wàda. Hi da-paàra-nya, “Ka nyuma yia umbu ngguru nggikina wàma-aka?” wàdanya.

¹³ Nahema i Yuhani, “Àmbi pahuru pa-rihingu-du welingu la pambàda pa-daingu,” wàna.

¹⁴ Nimbunja da panjuri da ma-paàrangu, “Ka nyumai duma yia? Nggàra wàma-aka bàdi?” wàdanya. Nahema i Yuhani, “Àmbi kapidihu-duya jiapa nda nggamuya dàngu àmbi rambangu-du àmahu bai wàngu pa-palapingu. Màta ka jiaka-a da ngganjimi!” wànanja.

¹⁵ La rehi nuna pakiringu-nanyaka na tau pa-paàrangu, yiana i Yuhani hi jia biaya-ka na Hanganji Ma-pamànangu na panedi-da.

¹⁶ Jia-duyaka i Yuhani hi napanii-nja, “Nyungga parunu wànggunggai wai-a, tàka napa nàmu-nyapa duna na tau na marihi bokulu welingu lai nyungga. La pa-wàkahu-nya liku halapa-ana nyungga yia nda ràka-mbunggu. Nyuna napa na ma-parunu wànggai Ngahuna i Ala dàngu epi.

¹⁷ La limana ninya na tàpi hi natàpi hàlaya na uhu nggàndumu-na hi lupa na-yarahu. Na karohu-na na-pauhi-nya la uma uhu, tàka na kalàmba-na mbuu ndàbana natunu-ya la epi panda peku pàda!” wàna.

¹⁸ Tuna nu i Yuhani ba napanii-nya na tauka ba nawàngu màtu - màtu àndana, nu ba jiaya na bobaru-nanya na Lii Mànangu.

¹⁹ Tàka i Harondi, na ma-kuaha-ya la Nggalilia, natenda-nya paraïna i Yuhani rukuna ba na-kanoma-ya i Harondia, na papaha anguna paluhu, dàngu mbuu ndàbana na akatu pambàda tuna.

²⁰ Ba tuna i Harondi manaü bonja-ma-ananja da akatu-na ba na-patama-nya i Yuhani la uma kapàtangu.

I Miri Yehu ba parunu-nya

²¹ Ba parunu hàla-nyaka na tau, i Yehu pa-parunungu-mbuya. Ba talànga hamayangu-naka, tawangga-nanyaka na awangu,

²² tàka i Ngahuna i Ala puru-nanyaka lai nyuna ba hama kulundiha-ya. Hàla hi ronguya na liina i Ala, “Nyumu Ananggu na pambuha-nggu. Nyumu muli hàmuya na etinggu,” wàna.

Na ruku dedina i Miri Yehu

²³ Ba jiaya na pakiri-nanya na paràma i Yehu, Nyuna tailu kambulu ndaunaka na umuru-na. Pa-namatu-nya la panii tau, nyuna jiaya na anana i Yuhupu, anana i Eli,

²⁴ anana i Matàtu, anana i Lewi, anana i Màlaki, anana i Yanai, anana i Yuhupu,

²⁵ anana i Matiha, anana i Amuhu, anana i Nahumu, anana i Hehili, anana i Nanggai,

²⁶ anana i Maàtu, anana i Matiha, anana i Himei, anana i Yohiku, anana i Yonda,

²⁷ anana i Yuhanàngu, anana i Reha, anana i Herumbambilu, anana i Halatialu, anana i Neri,

²⁸ anana i Màlaki, anana i Andi, anana i Kohàmu, anana i Elimandàmu, anana i Eru,

²⁹ anana i Yehua, anana i Eliyehiru, anana i Yorimu, anana i Matàtu, anana i Lewi,

³⁰ anana i Hamiungu, anana i Yahunda, anana i Yuhupu, anana i Yonàmu, anana i Eliyakimu,

³¹ anana i Malia, anana i Mina, anana i Matata, anana i Natàngu, anana i Ndautu,

³² anana i Ihai, anana i Ombitu, anana i Mbowàhu, anana i Hàlumungu, anana i Nahahungu,

³³ anana i Aminandàpu, anana i Àtamingu, anana i Àrini, anana i Hehirungu, anana i Perihu, anana i Yahunda,

³⁴ anana i Yakupu, anana i Ihàku, anana i Ambarahàmu, anana i Tera, anana i Nahuru,

³⁵ anana i Heruku, anana i Rehu, anana i Peliku, anana i Embiru, anana i Hàlamungu,

³⁶ anana i Kenangu, anana i Àrapàkahàtu, anana i Hemu, anana i Nuhu, anana i Lamiku,

³⁷ anana i Metuhala, anana i Henuku, anana i Yaritu, anana i Mahalaleyilu, anana i Kenangu,

³⁸ anana i Enuhu, anana i Hetu, anana i Andamu, anana i Ala, wàda.