LUHU 11 - Na Huratu Matua

I Muha na nyuraya na metida da kawunga ana

¹ I MIRI napanii-nya i Muha, “Hau-ki-anaka na ura pàda na papuha-nggunya na hanganji Mehiru dàngu na rayatu-na. Hàlaka nu napa napuli-manggai duna palaku. Jiapa nawàngu pawàngga-makai nyimi mbuu ndàbami welingu lai yiahu.

² Jia ba tuna peka-nyawa na banjaru Ihirailu; paràha-nja ka dakarai ngaü àmahu marara mabara welingu la angu ngiangu-da,” wànanja.

³ I MIRI najuju-ha da etida da tau Mehiru, hi damila-nja eti da tau Ihirailu. Tàka i Muha tembi nda uku-danya paraï da maningu wai ngabada dàngu na rayatu Mehiru nggubulu-na.

⁴ I Muha napanii-nya na hanganji, “Tuna yia na paniina i MIRI, ‘Ràkangu ba manda lora-yaka taï njada-nggunyaka na tana Mehiru.

⁵ Nimbihu-da da kawunga ana la Mehiru dameti napa, piti welingu la ana hanganji Mehiru lupa tomaya na ana kawini ata matanggu nggihu uhu nggàndumu. Da kawunga anada da banda mbuu ndàbada dameti-mbu.

⁶ La nggubulu tana Mehiru napa parongu-ya na mahii kaladaku, hama tuna ba ndedi handàkangu-ma patuna nu àmangu dàngu nda hilu tuna nu-apa ngeru.

⁷ Nu ba tuna la kaloka tau Ihirailu, ka tauya ka banda-yakai, nda ningua pa-kumilu. Napa kai pinya Nyungga ba MIRI-ka, maheka-nya na tau Mehiru dàngu na tau Ihirailu,’ ” wàna.

⁸ Tunaka nu hi napanii i Muha, “Mbuu ndàbada da maningu wai ngabada lai nyumu Miri napa damai hi da-marubuku lai nyungga, hi da-kamahi-ngga, nyungga dàngu da angu banjaru-ngguka ka ma-dunjaku-nya yiana na tana. Hàlaka nu ka laku-nggunyaka duku,” wàna. Hàla dàngu mbenina i Muha dunjaku-nanyaka na hanganji.

⁹ I MIRI napanii-nya i Muha, “Napa na hanganji nda nawàrihu-mayapa duna na paniimu, ka peku wunda padangu-nggu pa-hangàtarungu la nggubulu tana Mehiru,” wànanya.

¹⁰ I Muha dàngu i Harungu da-patumbu hàlaha da pa-hangàtarungu la hanggana na hanganji, na nyuna i MIRI nawuku-ma pa-pamalihu-ya na katiku-na, hi lupa nda na-pahia-nja da tau Ihirailu pa-dunjaku-nya na tanana.