HAPANYA 3 - Na Huratu Matua

Ba hukunya dàngu ba pamara-ya la Yeruhali

¹ Màtawa ka nanggàna-ya harangu la Yeruhali na paraingu iraku na ma-mbuhangu pa-patula ngganggangu lai MIRI dàngu na ma-kapidihu wiki-naha da mangia-nya!

² Nai-a-ai na paraingu na manda kataku-ya na lii panamu welingu lai MIRI, dàngu na manda wàrihu-mbuha da kanyàngi-na, na manda pa-jàmangu ura lai MIRI, dàngu nda nakarai pa-ndulangu lai Nyuna!

³ Da tau bokulu-na na paraingu nuna hama hinga ma-kanggaüku-ha. Da hakimu-na hama ahu rumba rimbangu-ha; kanjupu malumbangu-ha, hi nda hapungu-mbu rii kawudu pabida nduma haromu.

⁴ Da wunangu-da nda da-paweli etingu dàngu nda pamonu-anja; ba hapajia-ha da ratu da-pairaku-ya jàka nggàraya na pa-pahinggilu ndumana i MIRI dàngu da-kabeli puhaha da Ukuna i MIRI ba da-kehangu utu nduma wikida.

⁵ Na nyuna ni-manyapa i MIRI la paraingu nuna; nawunda mànuma duna ma-padeningu dàngu ndedima manjala. Nimbihu mbaru jiangu-ma nawua-nya mamola na banjaru-na. Ba tuna, na tau na manda pinya na mamola la paraingu nuna pa-daingu bia-nanya pawunda akatu dàngu nda pinguna pa-makia wàngu.

⁶ Napanii i MIRI, “Mbàda pa-molungu-ngguka banjaru dangu; ku-pakabu-ha da paraingu-da, dàngu kutuha watu tanyungguru da kangeli dàngu da lewatu-da. Da-malinggitu da paraingu-da ba nda ningu mangia-nja dàngu da-kahàna da àndada.

⁷ ‘Jiangu-maka nàhu datembi-ka banjaru-nggu hi da-wàrihu-ha da kanyàngi-nggu. Jiangu-maka ba danamu-ha da papekangu pawua-nggunya,’ wànggu bia la etinggu. Tàka na ma-lohangu, rihi parukangu-daipa pawunda akatu welingu la mangilu-na.

⁸ Na nyuna pananjarungu! Patia bianya na lodu bànduku-nggu ba ku-pakàla. Ba mbàda bota-nggunyaka la pa-pauhi-nja da banjaru dàngu da pa-hanganji, ka pabuku-nja hàngganggu. Nggubulu na pinu tana napa na-pambuta-ya epi hàngganggu.

⁹ Na nyuna tiangu taï ku-panjilu-nja da etida nyuda da banjaru, hi Nyungga-a pa-hamaya-da, nda la kamàla ala-a. Mbuu ndàbada nuda da banjaru napa da-karàdaku ndàbangga Nyungga.

¹⁰ Jiapa welingu la mamarau la Hundangu, nu na banjaru-nggu na ma-paihangu napa damai hi da-wotungga Nyungga kameti maraku.

¹¹ La rehi nu, ha dimi banjaru-nggu, nda nggàra-ayapa la pa-makia rukuna ba mbàda patula ngganggangu-mi lai Nyungga. Napa kuwàngga-ya nimbihu-na na tau na ma-ngànjangu dàngu na ma-abungu, tàka nyimi ndai hili patula ngganggangu-apa lai Nyungga la tandula matua-nggu.

¹² Napa kumàta-nya ka na-padaingu lai nu na hau banjaru na ma-karàda etina, mamonu-nya na pa-ndulangu-ma-anggu. Peku-mana ka da-ndàdiku lai nu.

¹³ Da pa-manjabii da tau Ihirailu da mani-injapa, nda dahili wunda-apa ma-akatu ka lai nggamuya-kadu; nda dahili kambàliku-apa dàngu nda da-palapingu-mbupa. Napa da-mbokaru dàngu dapeku hàmu, dàngu nda nggamu-apa pa-mangàdatu-da,” wàna.

Na wiliku mbaha eti

¹⁴ Ha dimi Ihirailu, miludu mi-kayaka-wa! Ha dumu Yeruhali, hawola weli etingu-wa!

¹⁵ Ba pànjangu-nanyaka i MIRI pahuku-nggai nyimi; mbàda wàngga-nahaka da muhumi. Naopa-nggai na MIRI wikimi, na Hanganji Ihirailu. Nàhu nda nggàra-apa la pa-mangàdatu.

¹⁶ Napa natoma na rehina ba dapanii ngeru da tau, “Ha dumu Yeruhali, àmbu mangàdatu dàngu àmbu namàli na etimu.

¹⁷ Naopa-nggai paraïna i MIRI na Alami na marihi talu. Ruku kawaha-na Nyuna tàka hi italu. Na-hawola dàngu nambaha eti i MIRI rukumi nyimi, la pa-namungu-na nawua-nggai luri bidi.

¹⁸ Rukumi nyimi, naludu mbaha eti hama tuna tau na ma-talànga remi,” wàna. Napanii i MIRI, “Na ura mila na mabahi-nggai ku-payila-nya. Na ngia wawami mbàda podahu-nggunyaka.

¹⁹ Napa natàka na rehina ba ku-pakabu-ha da ma-kapidihu-kai, dàngu ba ku-pahàla ma-kanjiku; mbutada da ma-tanawangu dabeli ba kulonda-ha. Na ngia wawada ku-panjilu-nya hi tembiha; la nggi-yakadu, jiapa ka la nggubulu pinu tana, pa-pabokulu dàngu pa-wotungu-maha napa.

²⁰ Napa natàka na rehina, kulonda pabeli-nja da mangia-nggau da ma-i-ihada. Ku-pawiti-nya kai kawulangu la nggubulu pinu tana, dàngu na mbokaru-mi ku-pabeli-nya napa,” wàna. i MIRI mambàda panii.