ETIRU 6 - Na Huratu Matua

Na hanganji na-pamangara-nya i Morundikaï

¹ La rudungu nuna nda ana mbàpihu-ana na hanganji. Hi na-paràhangu papiti mbuku lii ndai pareta hi na-paràhangu padiha-ya.

² Nu la mbuku nahunggu-ya na pa-tulihu ba mbàda lapuru-naka i Morundikaï rukuna na pawuku-da i Mbikitàngu dàngu i Terihu da pa-kahala bai madaiya na kurungu hanganji, la pa-pameti-ya na hanganji.

³ Na-paàrangu na hanganji, “Nggàra mangarangu-yaka na limba hàmuna na pa-wuangu-ya i Morundikaï?” wàna. Dahema da malumu-nya, “Nda nggàra-a pa-wuangu-ya,” wàda.

⁴ Hi napanii na hanganji, “Nggamu panggawi-nggu maninya nàhu la uma hanganji?” wàna. La rehi nu bidi tàka-ma-ana i Hamàngu la talora uma hanganji; maina pa-paramihi la hanganji ka tiwalu-nya i Morundikaï la ai tiwalu pambàda pahada-na.

⁵ Dahema-ya na hanganji paraï da ma-lumungu, “Ninya i Hamàngu la uma hanganji, lua-nggunya lai tamu umbu, wàna,” wàda. “Paràha-nya ka natama,” wàna na hanganji.

⁶ Ba natama-ka i Hamàngu, na-paàra-nya paraïna hanganji, “Ninya na tau ka tembi halawàla-ya, wànggu. Nggiki-nggunyaka bàdi?” wànanya. Tàka daa la etina i Hamàngu, “Hili nggamu-yaipa na pawua-na tembi halawàla tungu nu paraïna hanganji? Jàka nda nyungga!” wàna.

^7-8 Tuna nuduka hi nahema, “Pitinya paki mangarangu pakàli pakina i Tamu umbu. Hàlaka, na njara kaliti-na i Tamu umbu wotunya ngaü pareta.

⁹ Haàtu amabokulu pareta welingu la honga tau bokulu nawotu-nyaha da paki la tau pawua-na tembi i Tamu umbu, hàlaka hi paï karia-nya ba na-kaliti-ya na njara kaliti-na i Tamu umbu li ningu la mbila paraingu. Na amabokulu ka na-mangilu dàngu warana, ‘Tuna nuduka na palimba-nanya mahàmu paraïna hanganji na tau patembi-na!’ ka wànanya,” wàna.

¹⁰ Tàka na hanganji, “Parenggangu, pitiha da paki dàngu na njara, wua-nyawa tanda tembi tungu nu i Morundikaï na tau Yahundi. Pahàra-nya hama tuna na papanii-mu kawai, àmbu haudu ma-talarahu. Napa ujàngapu-ya nyuna ba mandapu-na padua la tuba pindu bokulu uma hanganji,” hi wànanya i Hamàngu.

¹¹ Tàka i Hamàngu hi napiti-ha da paki dàngu na njara, hi nawotu-nyaha da paki i Morundikaï. Ba na-kaliti-yaka na njara i Morundikaï, paï karia-nanyaka la mbila paraingu paraïna i Hamàngu, hi nawara, “Tàngaru, tuna yia-duka ba na-palimba-nya mahàmu paraïna hanganji na tau patembi-na,” wàna.

¹² Hàlaka nu beli-nanyaka i Morundikaï la pindu bokulu uma hanganji. Tàka i Hamàngu beli nggànggatu-nanyaka la umana. Nda na-mbuhangu-a paita-ya tau ba dira makia-ya, hi na-tamalingu.

¹³ Hi napanii-nya na papaha-na dàngu da anguna, nu na manggàna-ya. Tàka na papaha-na dàngu da anguna nu da mini manggàna, “Ngeri kàku-nanyaka na màkamu lai Morundikaï. Nyuna tau Yahundi-ya dàngu nda jia tara-amu lai nyuna, jiangu-ma na-pakàku-kau,” wàdanya.

I Hamàngu pahuku pameti-ya

¹⁴ Ba talànga paniida dàngu i Hamàngu, tàka-danyaka ba ri - ringada da ma-pawaingaba la uma hanganji pa-karia-nya i Hamàngu la mbabu pa-paloku-na i Etiru.