ETIRU 2 - Na Huratu Matua

I Etiru nanjadi tamu ràmbu

¹ Ndedi pira mandaina la hambeli-na nu, jiapa-kai ka nda na-karaü-apa na etina na hanganji, na-miripu mànu-mapa la kanandingu-na na pawunda-na i Tamu Ràmbu Wàtihu, dàngu na-papalimba wànya.

² Tuna nu duka da amabokulu la lihi hanganji hi da-wuangu kareuku, “Narihi hàmupa làti ka himbunya anakaria manandangu i Tàmu umbu.

³ Wotu bàdi panggawi la mbuu ndàba porupinihu pareta ka dahimbu anakaria manandangu ka ngàndiha la uma maràmba kawini lai yiahu la Huhàngu. I Henggai na pa-kahala bai, na kapala kuru uma pangia tau kawini, nyunaka ma-tanara-ha, dàngu mawua-nja karanu pa-manandangu wàngu.

⁴ Hàlaka i Tàmu umbu ka napindi anakaria parihi mbuha halawàla-na, ka panjadi-ya tamu ràmbu hiluna i Tamu Ràmbu Wàtihu,” wàda. Na hanganji na-patunju-ya na kareuku nuna hi na-pahàra-nya.

⁵ La parai Huhàngu ninya na haàtu tau Yahundi na ma-tamungu Morundikaï anana i Yairu. Nyuna ana umbuku-na i Kihu dàngu i Himei-ya welingu la kabihu Mbanyamingu.

⁶ I Morundikaï pa-tanawangu-ya ba nabera-ya na parai Yeruhali paraïna i Nembukatunehàru, hanganji Mbambilu. I Morundikaï pangàndi-ya la Mbambilu kariana i Yoyakingu, hanganji Yahunda, dàngu dadangu-mapa da tau tanawangu hawiangu.

⁷ Ninya na anawini, angu bokuna, anakaria manandangu ma-kalanggihu, na ma-tamungu Etiru, tàka na tamu Imbarani-na Handaha-ya. Da ina amana i Etiru mbàda meti-daka, tàka hi nanjadi nganggu anana i Morundikaï, na-kabida hama tuna ana wiki-nanya.

⁸ Ba bobaru-yaka na pareta hanganji, dangu anakaria pa-pauhingu la Huhàngu, dàngu i Etiru nimbunya la hongada. Nyuna pa-kariangu-mbuya la uma hanganji hi pakata-nya lai Henggai na kapala kuru uma pangia tau kawini.

⁹ Na-hangàtaru i Henggai ba naita-ya i Etiru dàngu nanamu-ya. Hi naluu wuanya karanu pa-manandangu wàngu dàngu pangangu papindi nu na anakaria. I Etiru pa-palelingu la pangia marihi halawàla la pahàmu nu la pangia kawini; tàka tau mapihu-ha da anakaria marihi karinggatu halawàla la uma hanganji da pawuangu waingaba palumu-nya nyuna.

¹⁰ Panamatu-nya na papekangu-na i Morundikaï, i Etiru nda napanii-a ba tau Yahundi-ya.

¹¹ Nimbihu lodu i Morundikaï ba na-wenangu la talora uma pangia kawini, ka pinya na ngerana i Etiru jàka nggàra ehina.

¹² Panamatu-nya na pakàli wàngu, pa-wuangu karanu pa-manandangu wànguha la dalu hau ndaungu: nomu mbua wulangu wàngu lonahu pakorungu karanu, hili nomu mbua wulangu wàngu lonahu pakorungu mbii kati hangia - hangia. La hambeli-na nu, da anakaria da-pahilu - pahilungu palua la Hanganji Ahaweru.

¹³ Ba nalua la hanganji na haàtu anakaria pekuna nawàngu etina jàka nggàra papaki-na.

¹⁴ Wàngu rudungu ba karia-nya la uma hanganji, hadangu harii hi karia-nya la hili hau uma, hi na-tanara-ya paraïna i Haànggahu, na pa-kahala bai ma-tanara kala wihi hanganji. Na anakaria nuna nda nahili lua-apa la hanganji, hinggilu-na jàka nawuku-ya paraïna hanganji dàngu tiki-nanya tamuna ba napaau-nya.

¹⁵ Ka toma-nanyaka na ngerana i Etiru palua la hanganji. – I Etiru anana i Ambihaïlu-ya angu bokuna i Morundikaï na manganggu ananya i Etiru ba hama tuna ana wiki-nanya; nu i Etiru na-pa-hangàtarungu ta - tauka na maita-ya. Ba nalua la hanganji, nawotu pakina i Etiru tundunya na panii dàngu na panaungu-na i Henggai, na pa-kahala bai ma-kapala-nya na uma pangia kawini.

¹⁶ Tu dunaka la ndaungu papihu wàna na pareta-na i Ahaweru la wulangu hakambulu, na wulangu Tembitu, pa-kariangu-ya i Etiru lai Hanganji Ahaweru la uma hanganji.

¹⁷ Nyuna, narihi mbuhanya paraïna hanganji welingu la anakaria hawiangu. Tu dunaka ruku dira mbuha-nanya paraïna hanganji, hi na-patàngapu-nya na tubuku pareta la katiku-na i Etiru, hi na-panjadi-ya tamu ràmbu hiluna i Tamu Ràmbu Wàtihu.

¹⁸ Hàlaka nu nambabu pa-bokulungu na hanganji ka pa-mangara-nya i Etiru, dàngu hi nadunda ndàbanja da panggawi dàngu da tau bokulu-na. Na-bobaru pakada-nya na lodu nda ràma la nggubulu pareta dàngu hi napabe - beringu pawua juana manda na-jarungu.

I Morundikaï na-pamara-ya na lurina na hanganji

¹⁹ Nu ba tuna i Morundikaï pawotu-yaka panjadi panggawi pareta.

²⁰ Ndedi napanii-a i Etiru ba tau Yahundi-ya nyuna, ba nahiri-dunya paraïna i Morundikaï. Nadu i Etiru ba na-panamatungu lai Morundikaï hama tuna ba anakeda-yapa ba na-kabubulu-ya paraïna na anamini-na, nu na angu bokuna.

²¹ La hau lodu ba talànga ràmana la uma hanganji i Morundikaï da madua da pa-kahala bai la lihi hanganji, i Mbikitàngu dàngu i Terihu, da-pahama kangunduhungu la pa-pameti-ya i Hanganji Ahaweru ba dira karaü-danya eti.

²² Nu na pawuku-da napinya paraïna i Morundikaï, hi naluu paniinya i Etiru. Tàka i Etiru nda na-mangenahu-mai duna papanii-nya na hanganji nu na paniina i Morundikaï.

²³ Nu na lii hi manginjiru-ya, ka lohangu-duna-nyaka ba ma-padeningu-ya nu na kareuku. Nu da tau madua, hi huku pameti-ha ba wàngu pa-tiwalu-nja. Tundunya na pareta-na na hanganji, na rukuna nuna patulihu-ya la mbuku lii ndai pareta.