DEDI 48 - Na Huratu Matua

I Yakupu ba na-pakanyuru-nja i Epuraïmu dàngu i Manahi

¹ Ndedi pira mandaina la malamiri-na patàka-danyaka lii i Yuhupu, ba hidu mbotu-nanya na amana. Ka lua-nanyaka dàngu da anana ba duada, i Manahi dàngu i Epuraïmu la pa-tadalu-ya i Yakupu.

² Ba narongu-ka i Yakupu ba ninyaka i Yuhupu, pambulu-nanyaka na pa-àtalu wàna, hi na mandapu la ngia pa-katuda-na.

³ I Yakupu napanii lai Yuhupu, “I Ala na Mahupu-mbiha mbàda pa-itangu-naka wikina lai nyungga la Luhu la tana Kanaàngu, dàngu mbàda pa-kanyuru-nanggaka,” wàna.

⁴ Napanii-ngga, “Nyungga napa kuwua-nggau ana dàngu umbuku dangu; dàngu Nyungga napa kuwua-nggaunya na tana yiana la wàla wuamu hi damàngi-nya lundu nu - nu,” wàna.

⁵ Na-pangala-nya na paniina i Yakupu, “Yuhupu, da anamu ba dadua i Epuraïmu dàngu i Manahi da madedi yiahu la Mehiru ba ndedi kutàka, màta ka ananggu nyungga biaha, hama tuna i Rumbingu dàngu i Hamiungu.

⁶ Jàka muhilu ngalangu ana, ananggu nyunggaha nda wànggu-apa, tàka dàingu anamu nyumu-haka dumu; na kangeha-da napa dakei welingu lai Epuraïmu dàngu i Manahi.

⁷ Hi kiri tunggu nu ndumana i Rahilu na inamu. Nàmu la ànda ba kubeli welingu la Mahupatamia, nameti na inamu la tana Kanaàngu, nda nggi tuna marauna welingu la Epurata, dàngu lalu mbana handuka-nggu. Kutani-nya lai nu la hingi ànda la Epurata,” wàna. (La Epurata jia-duyaka nàhu la Mbetulehimu.)

⁸ I Yakupu ba naita-haka da anana i Yuhupu, paàrangu-nanyaka, “Nggamuha yiada da anakeda?” wàna.

⁹ Nahema i Yuhupu, “Jia-duhaka yiada da ananggu da pawua-nangga i Ala lai nyungga lai yiahu la Mehiru,” hi wàna. Nanapa-ya i Yakupu, “Pa-mareni-ha yiahu la lihinggu ka ku-pakanyuru-nja,” hi wàna.

¹⁰ I Yakupu nda peku ita hàmu-anapa ba kaweda-nanyaka dàngu da matana da-hambala-ka. I Yuhupu na palihi-nja da anakeda nuda lai Yakupu, tàka nyuna hi nanggepi rohuha dàngu hi na-puduku-ha.

¹¹ Ka panii-nanyaka i Yakupu lai Yuhupu, “Nda kuhili kanandi ndoku-manyapa la pa-pahàmburu dànggau nyumu, tàka nàhu i Ala na-pahia-manggaipa la paita-ha da anambu-mu,” wàna.

¹² Tunaka nu i Yuhupu hi napiti-ha nyuda welingu la babana i Yakupu, hàla nyuna wiki hi na-maràbaku la hanggana na amana.

^13-14 Hàlaka nu i Yuhupu hi natuha da anakeda ba dadua la lihina i Yakupu, i Epuraïmu na ma-maeri na tuya la kalai tàka i Manahi na ma-maaya natuya la kawana. Tàka i Yakupu duna na-panjipalu-maanja da limana tàka na lima kawana-na natuya la katiku-na i Epuraïmu, tàka na lima kalaina natuya la katiku-na i Manahi.

¹⁵ Hàlaka patuna nu ka pakanyuru-nanyaka i Yuhupu, hi napanii, “I Ala, Nyuna MIRI-ya palumu-da i Ambarahàmu dàngu i Ihàku, Nyuna-maka na ma-kapipi-ka lundu nàhu;

¹⁶ Nyuna-maka na papalewa na ma-pahàla-ka welingu la mbuu ndàbana na handuka-nggu. Màla àruki ka na-pakanyuru-ha paraïna i Ala yiada da anakeda. Màla àru ka naluri pangalangu na tamunggu dàngu na tamuda i Ambarahàmu dàngu i Ihàku, paraï rukuda da anakeda yiada! Màla àru ka da-paana pa-umbukungu, dàngu ka dadangu da wàla wuada la pinu tana,” wàna.

¹⁷ I Yuhupu nda na-mbuhangu ba naita-ya na amana ba na-bànjalu-ya na limana kawana la katiku-na i Epuraïmu; hi nayàpa-ya na limana na amana ka paleli-nya welingu la katiku-na i Epuraïmu la katiku-na i Manahi.

¹⁸ Hi napanii-nya na amana, “Àmbu tumu nu ama. Yiana-ya na ana kawunga; bànjalu-ya na lima kawana-mu ama la katiku-na nyuna,” wàna.

¹⁹ Tàka na amana nda nabihu-a hi napanii, “Kupi-manya ananggu, kupi-manya. I Manahi napa na-bokulu na kuaha-na dàngu na wàla wuana napa nadedi-ha banjaru bokulu. Na nyuna ba tuna na erina narihi bokulu-pa duna welingu lai nyuna, dàngu napa da wàla wuana na erina nadedi-ha banjaru bokulu mada - dangu,” wàna.

²⁰ Hàla hili pa-kanyuru-nanjaka da anakeda la lodu nuna, “Na tau Ihirailu napa natiki-ha da tamumi, jàka da-pakanyurungu tau. Dapanii napa, ‘Màla àru i Ala ka natukau hama tuna i Epuraïmu dàngu i Manahi,’ ” wàna wànguduka. Tuna nuduka i Yakupu ba napa-mangilu-ya i Epuraïmu welingu lai Manahi.

²¹ Ka panii-nanyaka i Yakupu lai Yuhupu, “Hama tuna bau itaka, mareni-ama-naka na-njàpunggu, na nyuna i Ala nandula-makai duna, hi nangàndi belikai la tanada da boku la mangilu-mi.

²² Lai nyumu-maka, nda la angumu paluhu-a na ngia pawua-nggunya la Hikimu, na ngaba ma-kamboka, na pambàda wàhinggu welingu la tau Amori, ba kuwàngu hapanda dàngu pananggu,” wàna.