DEDI 46 - Na Huratu Matua

I Yakupu dàngu kuru umana ba dalaku la Mehiru

¹ I Yakupu na-kamomatu hàlaha da banda da malanja-naka hi nalaku. Tàka la Mbiruhemba hi nawotu-nya kameti maraku i Ala, na palumu-na i Ihàku, na amana.

² La dalu harii mata la hau na rudungu, i Ala napanii dànya i Yakupu, “Yakupu, Yakupu!” wànanya. “Ou MIRI,” hi wàna ba nahema.

³ “Nyungga Ala, na-palumu-na na amamu,” wànanya. “Àmbu mangàdatu-du palaku la Mehiru. Napa Nyungga ku-paworu-ya na wàla wuamu hi lupa nadedi banjaru bokulu lai nu.

⁴ Napa Nyungga ma-karia-nggau la Mehiru, dàngu napa da wàla wuamu kungàndi beliha la tana yiana. I Yuhupu nimanya la lihimu jàka jia-yaka na rehi metimu,” wànanya.

⁵ Ka hadangu laku-nanyaka i Yakupu welingu la Mbiruhemba. Da anana dawotu-ya na amada dàngu da ana da papaha-na la kareta pa-pangàndi-na na hanganji Mehiru.

⁶ Nyuda dangàndi mbuha da bandada la maràda dàngu da bandada la uma da pangala-da la Kanaàngu, hàla laku-danyaka la Mehiru. I Yakupu na karia-hàla-manja da wàla wuana, nu

⁷ mbuu ndàbada da ana umbuku-na, mini kawini.

⁸ Da ana umbuku-na i Yakupu da ma-tundungu la Mehiru, jiaha:

⁹ i Rumbingu, ana ma-maaya dehi; da anana: i Henuku, i Palu, i Hehirungu dàngu i Kàrami.

¹⁰ I Hamiungu; da anana: i Yemuilu, i Yamingu, i Ohàtu, i Yakingu, i Hohàru, dàngu i Haulu, anana na papaha kawini Kanaàngu.

¹¹ I Lewi; da anana: i Nggerihongu, i Kehàtu dàngu i Marari.

¹² I Yahunda; da anana: i Hiyela, i Perihu dàngu i Heràhu, tàka da anana i Yahunda hawiangu, nu i Eru dàngu i Onàngu dameti la Kanaàngu. Da anana i Perihu: i Hehirungu dàngu i Hamulu.

¹³ I Ihakàru; da anana: i Tola, i Pua, i Ayupu dàngu i Himurungu.

¹⁴ I Hembulungu; da anana: i Heritu, i Elungu, dàngu i Yàhaleyilu.

¹⁵ Nyuda mbuu ndàbada ana pa-paana-na i Lia lai Yakupu la Mahupatamia, hinggilu-da nyuda na anana kawinimbu na ma-tamungu Ndina. Jia ba tuna nggubulu-da da wàla wuana i Yakupu welingu lai Lia na papaha-na, tau tailu kambulu tailu-ha.

¹⁶ I Nggàtu; da anana: i Hipuyungu, i Hanggi, i Huni, i Ehimbongu, i Eri, i Arondi dàngu i Areli.

¹⁷ I Ahiaru; da anana: i Yimuna, i Yiwàhu, i Yiwihu dàngu i Mbiria lupa i Hera na anawini-da. Da anana i Mbiria, jiaha i Hembiru dàngu i Màlakialu.

¹⁸ Nuda da tau hakambulu manomu wàla wuana i Yakupu welingu lai Hilupa, ata ngàndina i Lia na anana kawini na pawua-na i Lambàngu.

¹⁹ I Rahilu papaha-na i Yakupu da dua da anana, nu i Yuhupu dàngu i Mbanyamingu.

²⁰ La Mehiru i Yuhupu tau madua-ha da anana, nu i Manahi dàngu i Epuraimu da pa-paana-na na papaha-na i Ahanàtu, anana i Potipera, na ratu la Haliupolihu.

²¹ I Mbanyamingu; da anana: i Mbela, i Mbikiru, i Àhambilu, i Nggera, i Naamàngu, i Ehi, i Ròhu, i Mupimu, i Hupimu dàngu i Aritu.

²² Da tau hakambulu mapatu nuda, wàla wuana i Yakupu welingu lai Rahilu na papaha-na.

²³ Pandàkingu i Ndàngu; na anana: i Huhimu.

²⁴ I Nàputali; da anana: i Yaheyilu, i Ngguni, i Yehiru dàngu i Hilimu.

²⁵ Nuda da tau mapihu da wàla wuana i Yakupu welingu lai Mbiluha, ata ngàndi pawua-na i Làmbangu lai Rahilu na anana.

²⁶ Da wàla wuana i Yakupu da malaku la Mehiru mbuu ndàbada tau nomu kambulu nomuha, nda datama la diha da rii anana.

²⁷ Da anana i Yuhupu da madedi la Mehiru tau madua-ha, hi lupa da ihi kuru umana i Yakupu da matàka la Mehiru mbuu ndàbada tau pihu kambulu-ha.

I Yakupu dàngu kuru umana la Mehiru

²⁸ I Yakupu na-paràha-nya i Yahunda palaku mangilu-nya la papaau-nya i Yuhupu ka namai pa-hàmburu-ya na amana la Nggohingu. Ba datàka-ka la Nggohingu,

²⁹ i Yuhupu na-kaliti-ya na kareta-na palua pa-pahàmburu dànya na amana lai nu. Ba da-pahàmburu-ka, na-nggàlihu-ya na amana hi namandai ba nahii.

³⁰ Napanii i Yakupu lai Yuhupu, “Nàhu màla biaka ka kumeti, nadu ba kuita-kauka nyumu dàngu ba kupi-nggauka bau luri,” wànanya.

³¹ Hàla panii-nanyaka i Yuhupu la anguna paluhu dàngu da nua da kalembi-na hawiangu, “Nàhu kulua ka bàdi, ka kupanii-nya na hanganji, da angunggu paluhu dàngu nggubulu-da da nua da kalembi-nggu da ma-ngiangu la Kanaàngu ba ninjaka, ka wànggunya.

³² Napa ka kupeka-nya ba tau pawangu mbimbi hapikai nyimi, dàngu bai ngàndi-mahaka da bandami dàngu da mangu-mika.

³³ Jàka napaau-nggai na hanganji dàngu ka na-paàra-nggai nggàra paràma-mi,

³⁴ peka-manya nyimi ba tau ma-paloku bandakai piti welingu pa-anakeda-mi, hama tuna da boku la mangilu-mi, ka wàminya. Ba timika nu napa na-paràha-manggai duna pa-ngiangu ningu la Nggohingu,” wànanja. Hi napanii tuna nu i Yuhupu nadu na tau Mehiru ba pa-pawawa wànguya wàda jàka panggolu dàngu tau na ma-pawangu banda.