DEDI 44 - Na Huratu Matua

Na kaba wai na ma-mbulangu

¹ Ba talànga tunaka nu i Yuhupu nawua-nya lii pareta na kapala ma-paloku-ya na kuru umana, “Paihi-nja uhu nggàndumu da karungu-da nuda da tau, hau dangu ràka pamàka-da pangàndi, puhi beliha da àmahu-da la karungu-da haàtu - haàtu la pinu uhu.

² Puhi-mbuya na kaba wai àmahu baranggu daa la karungu-na na eri hupuda, hamanai da àmahu wili uhu nggàndumu-na,” wàna. Nuna na papalewa nanunju-maya nuna na lii pareta.

³ Hadangu harii, la mba - mbaru, pahewa dàna-njaka i Yuhupu da anguna paluhu, ka hadangu laku-danyaka dàngu kalandai-da.

⁴ Ndedi damarau welingu la paraingu, i Yuhupu na paràha-nya na kapala kuru umana, “Parenggangu-kau yaulu-ha nàhu da tau. Jàka mutoma-njaka, kau paàra-nja, ‘Nggikina nyimi hi palimba wànya ma-akatu na mahàmu?

⁵ Nggikina hi imanganga-ya na kaba wai àmahu barana-na na miringgu? Na kaba wai nuna paunu wànanya dàngu pa-manyura wànanya. Nuna manjala bokulu-ya na pawunda-mi!’ wàmunja,” wàna.

⁶ Nuna na papalewa ba natoma-njaka da anguna paluhu i Yuhupu, panii-nanjaka hama tuna ba wànanja paraïna i Yuhupu.

⁷ Napaha nyuda, “Nggàra wàmu nu Umbu? Nyuma ma-harangu ba nda mawunda-a duma na matuna nu!

⁸ Nyumu Umbu mupi-manya, jiapa da àmahu pahunggu-ma la karungu-ma la pinu uhu, ba ma-pabeli-manjaka duma lai nyumu. Jia ba tuna nda peku-ana nyuma pa-manganga, ka mabara-ya ka marara-yakai welingu la umana na nggumbunuru!

⁹ Ha Umbu, jàka era hunggu-munya nuna na malanja la karungu-na na haàtu na anguma, màta ka huku pameti-ya tàka nyuma mbuu ndàbama kau ata-nggama,” wàdaka.

¹⁰ Nahema na papalewa, “Hàmu; na nyuna jiaya nyuna-a duku na ngia pahunggu-nggunya na kaba wai na paata-nggu; nyimi hawiangu ibeli hàla,” wànanja.

¹¹ Nu ka papuru parengga-danjaka da karungu-da haàtu - haàtu hi da-bunggahu-ha.

¹² Na papalewa-na i Yuhupu na-pareha pahàmu-manja hau karu - hau karungu, piti welingu la manguna na ma-maaya dehi lupa la manguna na ma-maeri hupu, ka hunggu-nanyaka na kaba wai la karungu-na i Mbanyamingu.

¹³ Da ayana lalu mbana handuka-ha hi lupa da hira - hiraha da pakida. Hi da-pabuku belinja da kalandai-da hi dabeli la paraingu.

¹⁴ Ba datàka-ka i Yahunda dàngu da anguna paluhu la umana i Yuhupu, nyuna ni-manyapa lai nu, dàngu hi da-maràbaku la hanggana.

¹⁵ Ka panii-nanyaka i Yuhupu, “Nggàra-yaka nu na pa-pandoi-mi? Ndai pi-anya dimi tau hama tuna nyungga ba kupi bianya na pa-pandoi-mi na ma-akatu wàngu kabeli mata?” wànanja.

¹⁶ “Ka hili nggàra wàmai-pa hi Miri?” wànaka i Yahunda ba nahema. “Nggiki hama pandia-maipa dàngu nggiki hama pamànangu-maipa wikima? Ba i Ala-maka duna na ma-bunggahu wikiya na panjala-ma. Nàhu màta kau ata hàla-nggamaka, nda mbulungu-na nyuna na ngia pahunggu-ya na kaba wai,” wànaka.

¹⁷ Napaya i Yuhupu, “Ndia-a! Nyungga nda kubihu-a patunggu nu! Jiaya nyuna-a duku na ngia pahunggu-ya na kaba wai na paata-nggu. Hawiangu beli bia dàngu kalongga etingu la amami,” wànanja.

I Yahunda ba na-kahiri-ya i Mbanyamingu

¹⁸ I Yahunda na-ndàharungu palihi-nya i Yuhupu, “Malangu-mu, Miri, pahia àrungga ka kupanii dakinggau Miri. Àmbu hàngga-dungga atamu; nyumu Miri beringu jia-makauka na hanganji Mehiru wiki.

¹⁹ Yia nana Miri bau paàra-nggama nyuma, ‘Ningupa nu amami jàka ndia angumi paluhu hawiangu?’ wàmu.

²⁰ Mahema nyuma, ‘Na amama na-kaweda-maka tàka na erima dedina ba làpahu kaweda-manaka na amama. Na ayana angu inana na erima nameti-ka, jia nàhu didi-maki-ayaka nyuna na maluri welingu nyuda ba dadua, tàka nàhu i ama nàmu nda uku namu-nanya,’ wàma.

²¹ Karia-nya yiahu ka kuita-ya ba wàmu-nggama Miri,

²² jia hi mahema, na anakeda nuna nda peku pahewa da-ananya na amana; jàka na-pahewa dànya na amana, nameti wànya na amana, wàmanggau Miri.

²³ Tunaka nu, ‘Àmbi hili maidu la hangganggu, jàka ndia madu mi-karia-nya na erimi,’ wàmu-dunggama Miri.

²⁴ Ba mabeli-ka la amama, ma-patàka hàlanya, na paniimu Miri.

²⁵ Tunaka nu paràha-na-nggamaka na amama pamai pakei pangangu.

²⁶ Napa nyuma, ‘Nyuma nda peku lua-ama lai nàhu, nadu nyuma nda peku hurungu-ama la hangga nggumbunuru jàka nda na-tundungu-madu na eri hupuma. Hi peku luama nyuma, mbulungu-ana jàka nalua-mbu nyuna,’ wàmanya.

²⁷ Tunaka nu hi napanii na amama, ‘Nyimi pi-maminya i Rahilu na papaha-nggu ba da dua-ma-a da anana.

²⁸ Na ma-wungangu na-dunjaku-nggaka. Màndungu-mananya ba kaü-nanya mabohu nyuna, nadu lupa nàhu ba nda kuhili ita-ayapa.

²⁹ Jàka mihilu piti-mayaipa na ana kamuri-nggu yiana, jàka era nggikina nyuna, na handuka na pa-patàka-mingga, napa pameti wa-manggu-nyaka duku, nadu nyungga ba kaweda-nggunyaka,’ ” wàna.

^30-31 “Jia-duya Miri,” wàna i Yahunda lai Yuhupu. “Jàka kubeli la amama dàngu nda ninya na erima, jiangu-maka duna ba nameti na amama. Na lurina hanggetu na la anakeda nuna-ma-kiaka, dàngu nyuna kaweda nàkapu-mana-nyaka, jia-duya na handuka na pa-patàka-manya, jia-mayaka duna na pameti, wàna.

³² Hinggilu-nai, nyungga kunjanji-mayaka na amanggu, ba nyungga duku hariana na anakeda. Jàka nda ku-karia belinya na anakeda lai nyuna, nyungga-duka ma-hambeta-ya na hukungu la ngala luringgu.

³³ Jiaya nu, ku-kamahi-nggau Miri, puli àrungga ka ku-ndàdiku lai yiahu kau atangga hiluna na erima; nyuna màta àru ka nabeli karia-nja da ayana.

³⁴ Nggiki hili hama beli-ngguipa la amama jàka ndia-madu na-kikungu na anakeda? Nda ku-torungu-a pa-tàngaru-ya napa jàka na-handauni-ya ura pàda na amama,” wàna.