DEDI 4 - Na Huratu Matua

I Kaïngu dàngu i Hambilu

¹ Tunaka nu i Andamu angu-nanyaka i Hawa, na papaha-na, ka woru ihi-nanyaka nuna na kawini. Na-paana-nya na haàtu na anakeda mini, hi napanii, “Wàngu pa-ndulangu-na i MIRI ku-ngalangu-ka haàtu anakeda mini,” wàna. Jia-duyaka hi natunya tamu Kaïngu, wànanya.

² Nyuna i Hawa hilu habola-nanyaka na haàtu na anakeda mini, na tamuna Hambilu-ya. I Hambilu ma-pawangu mbimbiya, tàka i Kaïngu matungu wokaya.

³ Ngala mandai-naka la rehi malamiri, piti-nanyaka i Kaïngu ihi wokana hi na-maraku wànya i MIRI.

⁴ Hàla i Hambilu hi napiti-ya na heu kamboka mbimbi, kawunga anana na heu na bai mbimbina hi narupu-ya, hi na-maraku wànya na mahàmu halawàla lai MIRI. I MIRI nahàmu-nya eti i Hambilu dàngu na pa-maraku wàna,

⁵ tàka na-tulaku-ya i Kaïngu dàngu na pa-maraku wàna. Ka mbeni wàngu-nanyaka i Kaïngu, hi na-kaburaü na matana.

⁶ Ka kareuku-nanyaka i MIRI lai Kaïngu, “Nggikina hiu mbeni? Nggikina hi na-kaburaü na matamu?

⁷ Jàka nahàmu na pawàmu, jia làti hi muriki miri, tàka jàka muwànya na ma-akatu, na njala duna ndengi-nanggau-padua patama la etimu. Na njala ka pa-rajaku-ya wànanggau, na nyuna màtawa nyumu kau taluya,” wànanya.

⁸ Hàla i Kaïngu nawànda-ya i Hambilu, na erina, “Màla ka talua la woka,” wànanya. Ba datàka-ka lai nu, i Kaïngu na-kaporuku-nya i Hambilu, hi na-pameti-ya i Hambilu.

⁹ Nu i MIRI hi na-paàra-nya i Kaïngu, “Ka nggiya i Hambilu, na erimu?” wànanya. Nahema i Kaïngu, “Nda kupi-anya. Nyungga-maka bàdi mapawa-nya na eringgu?” wàna.

¹⁰ Natu liina i MIRI, “Nggikina hiu tuya na pa-maringgingu tungu nu? Na wai riana na erimu nawara-nggaka Nyungga welingu la tana, hama tuna na wara na ma-kaladaku pakarai-ya na pa-himbalungu.

¹¹ Nyumu pa-ràtungu-kau hi nda peku-amupa pa-paloku-ya na tana. Na tana ngia pa-mangunungu-na na wai riana na erimu, beringu hanganga-nanya la panggepi-ya na riana erimu bau pameti-ya.

¹² Jàka mutungu woka nda ana nggàra-apa ihina pawua-nanggau na tana; napa nyumu tau lindingu-kauka na manda ningu ngia pa-ngiangu la pinu tana,” wànanya.

¹³ Napanii i Kaïngu lai MIRI, “Lalu mbotuna na hukungu-nggu, nda kumaka-a patanggu-nya.

¹⁴ Yaulu-munggaka welingu la tana yiana, pamarau welingu la pangia-mu. Tau lindingu-kaka duku napa manda ningu ngia pa-ngiangu-nggu la pinu tana, dàngu napa pameti-nanggaka tau duku nggamu bia ma-hàmburu-ka,” wàna.

¹⁵ Tàka natuu liina i MIRI, “Ndia-a, jàka ningu ma-pameti-kau, na himbalu-na tau mapihu wànya na ma-pameti-kau da pa-pameti-mbu napa,” wàna. Tunaka nu tuna-nyaka tanda i MIRI lai Kaïngu, màta jàka nggamu bia ma-hàmburu-ya ka àmbu na-pameti-ya.

¹⁶ Hàla laku-nanyaka i Kaïngu welingu la hanggana i MIRI, hi na-engangu la tana “Ngia Pa-lindingu” ba wàdanya la pahunga loduna na Endingu.

Da wàla wuana i Kaïngu

¹⁷ I Kaïngu dàngu papaha-na da-ngalangu anakeda mini, na pa-patamungu Henuku. Tunaka nu i Kaïngu pahadangu-nanyaka paraingu dàngu hi natunya tamuna hama tuna na tamuna na anana.

¹⁸ I Henuku amana i Iràtu-ya. I Iràtu amana i Mahuyaïlu-ya, i Mahuyaïlu amana i Metuhailu-ya, dàngu i Metuhailu jia-duyaka na amana i Lamiku.

¹⁹ I Lamiku dadua da papaha-na, i Anda dàngu i Hila.

²⁰ I Anda na-paana-nya i Yambàlu, tàka da wàla wuana i Yambàlu jia-duhaka da ma-kabua banda dàngu hi da-ngiangu la maü tera.

²¹ Na erina i Yumbàlu-ya, tàka da wàla wuana i Yumbàlu jia-duhaka da mapingu pajungga dàngu pa-taleli.

²² I Hila na-paana-nya i Tumbàlu-Kaingu, tàka da wàla wuana jia-duhaka da mapingu pa-pandoi ma - màtu paràma wàngu welingu la wudu dàngu bàhi. Na erina kawini i Tumbàlu-Kaingu jiaya i Naama.

²³ Ka panii-nanyaka i Lamiku la papaha-na da madua, “Anda dàngu Hila pa-tingingu! Ku-pameti haàtu bidi mini lumuna ba mbàda nàhaku-nangga.

²⁴ Jàka tau mapihu pa-pameti pa-pahimbalu wànya ba pameti-ya i Kaïngu, pihu kambulu pihu tau pa-pameti jàka pameti-ka nyungga,” wàna.

I Hetu dàngu i Enuhu

²⁵ I Andamu dàngu na papaha-na dahili ngalangu haàtu anakeda mini. Napanii i Hawa, “I Ala nawua-nggaka duku anakeda mini hiluna i Hambilu, na pambàda pameti-na i Kaïngu,” wàna. Jia-duyaka i Hawa hi na-patamu-nya Hetu, na anana.

²⁶ I Hetu ningu haàtu anana mini, na pa-patamungu Enuhu. La rehina nuna-duka na tau ba na-pakiringu patiki-ya na tamuna i MIRI jàka da-lumungu.