DEDI 3 - Na Huratu Matua

Na tau na-ndubaku-ya i Ala

¹ Na ularu bànda ma-kanjupu màhiya welingu la banda - bandaka da pa-padika-na i MIRI Ala. Na ularu na-paàra-nya nuna na kawini, “Màla tuba langatàka-manaka i Ala ba nalara-nggai panganja da wua-daka yiada da pingi ai la woka yiana?” wàna.

² Nahema na tau kawini, “Peku-mana duma la pangaa hàlanja da wuada da pingi ai - pingi aika la woka ngia pambawa yiana,

³ hinggilu-na na pingi ai daa la padua woka. I Ala nalara-nggama panganja da wuana na pingi ai nuna jàka ndia la pa-jonggaru-ya; jàka mawunda-ya nuna, napa meti-manyaka,” wàna na tau kawini.

⁴ Nahema na ularu, “Nda na-padeningu-a nuna; nda jia meti-àmi napa.

⁵ Hi napanii tuna nu i Ala, ba napi-dunya jàka minga-njaka da wuana na pingi ai nuna, napa na-habola na kanandingu-mi; napa nyimi mihama-nya i Ala, bai pinya jàka nggàraya na mahàmu dàngu jàka nggàraya na ma-akatu,” wàna na ularu.

⁶ Ba na-tàngaru-ya nuna na pingi ai paraïna kawini, na-manandangu ba naita-ya, tàka da wuana hada dahàmu-ma jàka nganja. Ka kanandi-nanyaka ba kanjupu mahàmu-maya jàka nalua-ya la pamàhi. Jia-duyaka hi napàpu-ya na wuana nuna na pingi ai, hi nanganya, dàngu hi nawua-mbunya na leina, tàka hi nangaa-mbunya paraïna leina.

⁷ Ba dahàla-kika panganya nuna na wua ai, ka habola-madua-nanyaka na kanandingu-da, ka pàdangu-danyaka wikida ba kalulu-danya. Ka utu-danyaka ruu kanjilu hi da-pandàdangu wikida.

⁸ La malingu nu darongu-ya i MIRI Ala ba nàhunya hu daa la woka, ka kapàndi-danyaka la njonga pingi ai ka àmbu naita-ta i MIRI ba wàda.

⁹ Tàka i MIRI Ala hi nawara-nya na tau mini, “Nggikau?” wànanya.

¹⁰ Nahema na tau mini, “Kurongu-makau ba ninggau la woka, mangàdatu-nggunya, hi ku-kapàndi ba kalulu-nggunya,” wàna.

¹¹ Na-paàrangu i Ala, “Ka nggamu na mapanii-nggau bau kalulu? Màla minga-nyaka na wua ai palara-nggu àmbi nganya ba wànggu?” wàna.

¹² Nahema na tau mini, “Na kawini na pawua-mungga ka ningu angunggu, nyuna na mawua-ngganya nuna na wua ai, hi kunganya,” wàna.

¹³ I MIRI Ala na-paàra-nya na kawini, “Nggikina hi tumu nu?” wànanya. Nahema na tau kawini, “Na ularu na ma-panyonga-ka, hi lupa kunganya nuna na wua ai,” wàna.

Ba napuha hukungu i Ala

¹⁴ Hàlaka nu i MIRI Ala napanii-nya na ularu, “Nyumu pa-hukungu-kau rukuna nuna na pawunda-mu welingu la banda danguka nyumua ma-hambeta-ya na ràtungu yiana: Pakiringu nàhu napa nyumu bei wàngu-munyaka kambumu, dàngu kumburu tanaka pangamu la ngala lurimu.

¹⁵ Nyumu dàngu yiana na kawini maràngga pa-umbingu-minyaka, da wàla wuana dàngu da wàla wuamu pa-muhungu mànu-danyaka. Na wàla wuana napa na-palàjaru-ya na katiku-mu, dàngu nyumu napa muwitu-ya na tandana,” wànanya.

¹⁶ Hàla i MIRI hi napanii-nya na tau kawini, “Napa Nyungga kubonja-ya na katiu-mu ba talànga mbotu ihimu dàngu la rehi habola-mu. Tàka jiapa-kai ba tuna nu, daingu-mana nyumu bau mataru-nya na leimu, na nyuna napa mu-pawawa lai nyuna,” wànanya.

¹⁷ Hàla i MIRI hi napanii-nya na tau mini, “Mu-patingi-nyaka nyumu na papaha-mu hi munganya na wua ai na palara-nggu àmbu nganya ba wanggu. Nu ba tumuka nu, pa-ràtungu-yaka na tana. Mu-mbangatu-ka bàdi paràma la ngala lurimu, ka pekuna na tana yiana ba natuu ihina na matoma bau ngangu.

¹⁸ Rumba dàngu rii madàka jia-haka da pawua-na na tana lai nyumu, dàngu da ma-àtalu tumbuda jia-haka napa da pangamu.

¹⁹ Dira matiki-mapa dàngu lundu wai hanggobu-mamupa nyumu napa bau ràma la pa-paloku-ya na tana hi ningu ana pangala-mu, lupa mubeli la tana, nadu ba welimu la tana-madu ba unggulu-kau. Nyumu pawulu welingu la tanakau dàngu napa mubeli la tanamai,” wànanya.

²⁰ I Andamu, na-patamu-nya Hawa na papaha-na, rukuna ba inana na nggubulu banjaru tau pinu tana-duya nuna na kawini.

²¹ Ka pandoi-nanyaka i MIRI Ala pakida welingu la manula banda ndumada i Andamu dàngu na papaha-na, hàla hi na-pakalambu-nja.

I Andamu dàngu i Hawa ba wànggaha welingu la woka ngia pambawa la Endingu

²² I MIRI Ala natuu liina, “Nahu na tau hama-nandaka Nyuta dàngu ninguka papi wàdanya rukuna na mahàmu dàngu na ma-akatu. Jia ba tuna dimbaku-yaka bàdi ka àmbu nanganya na wuana na pingi ai paluri wàngu, ka àmbu naluri lundu nu - nu,” wàna.

²³ Ka wàngga-nanjaka paraïna MIRI da tau welingu la woka ngia pambawa la Endingu tàka hi na-paràha-nja pa-paloku-ya na tana na ngia paweli-da.

²⁴ Tunaka nu, la tuba pahunga loduna na woka nuna la ngaru pindu tama, i MIRI Ala natuha da patau awangu dàngu ba hapungu-na na hapanda kabilaku na pa-pawilikungu lai nu - lai nu, ka mangganya na ànda na ma-hanggangu la pingi ai paluri wàngu. Ba wàngu patuna numaka, ka nda ningu-mapa duna haàtu mapeku la patama jàka ndia palihi-nya nuna na pingi ai.