DEDI 11 - Na Huratu Matua

Na Lewatu la Mbambilu

¹ La kawunga-na, da banja - banjaru la pa-nggubulu awangu hau hilu-aha, dàngu da kareuku pawàda da-pahama-ma.

² Ba da-njadangu-ka la pahunga lodu, tàka-danyaka la hau maràda la tana Mbambilunia, ka pa-engangu-danyaka lai nu.

³ Dapanii dàngga anguda, “Màla ka ta-pandoi watu rara ka tatunu-ha lundu da-kalatungu,” wàdaka. Nu-duyaka hi ningu watu rarada pawulu wàngu uma dàngu teru pa-panditaku wàngu.

⁴ Dapanii ba da-pahamangu, “Màla ka ta-pahadangu paraingu dàngu hau lewatu na kawuku-na na matoma la awangu, ka peku wuwa wàngunda dàngu ka àmbu ta-paihangu la pa-nggubulu awangu,” wàdaka.

⁵ Ka puru-nanyaka i MIRI pa-tàngaru-ya na paraingu dàngu na lewatu pa-pahada-da da tau.

⁶ Hi napanii, “Nyuda yia hau banjaru-aha dàngu hau hilu-aha, dàngu yiana hina-apa pakiri-nanya na pawuku - pawuku-da. Nda namandai-apa ba damàka pa-pandoi-ya jàka nggàra biaya na pambuha-da.

⁷ Nahàmu-pa ka tapuru dàngu ka ta-kubaru-ya na hiluda, ka àmbu da-maràngga papingu hilu dàngga anguda,” wànaka.

⁸ Tuna nu i MIRI ba na-paiha nggangganja la pa-nggubulu awangu. Ka pànjangu-danyaka pa-pahada-nya na paraingu.

⁹ Jia-duyaka hi datunya tamuna na paraingu nuna, Mbambilu, nadu ba lai nuduka i MIRI ba na-kubaru-ya na hiluna mbuu ndàbana na banjaru, dàngu welingu lai nuduka ba na-paiha - paiha-nya la pa-nggubulu awangu paraïna i MIRI.

Da wàla wuana i Hemu

¹⁰ Yiada-haka da wàla wuana i Hemu. Dàmbu ndau-naka la hambeli iwa obungu, ba 100 mbua ndau-naka na lurina i Hemu, ngalangu-nanyaka haàtu anakeda mini, na tamuna Àrapàkahàtu-ya.

¹¹ Hàlaka nu naluri-mapa 500 mbua ndaungu, dàngu nangala-manjapa da anana hawiangu.

¹² Ba 35 mbua ndau-naka na lurina i Àrapàkahàtu, ngalangu-nanyaka haàtu anakeda mini, Helàhu-ya na tamuna.

¹³ Hàlaka nu i Àrapàkahàtu naluri-mapa 403 mbua ndaungu, dàngu nangala-manjapa da anana hawiangu.

¹⁴ Ba 30 mbua ndau-naka na lurina i Helàhu, ngalangu-nanyaka haàtu anakeda mini, Embiru-ya na tamuna.

¹⁵ Hàlaka nu i Helàhu naluri-mapa 403 mbua ndaungu dàngu nangala-manjapa da anana hawiangu.

¹⁶ Ba 34 mbua ndau-naka na lurina i Embiru, ngalangu-nanyaka haàtu anakeda mini, Peliku-ya na tamuna.

¹⁷ Hàlaka nu i Embiru naluri-mapa 430 mbua ndaungu, dàngu nangala-manjapa da anana hawiangu.

¹⁸ Ba 30 mbua ndau-naka na lurina i Peliku, ngalangu-nanyaka haàtu anakeda mini, i Rehuya na tamuna.

¹⁹ Hàlaka nu i Peliku naluri-mapa 209 mbua ndaungu, dàngu nangala-manjapa da anana hawiangu.

²⁰ Ba 32 ndau-naka na lurina i Rehu, ngalangu-nanyaka haàtu anakeda mini, i Heruku-ya na tamuna.

²¹ Hàlaka nu i Rehu naluri-mapa 207 mbua ndaungu, dàngu nangala-manjapa da anana hawiangu.

²² Ba 30 mbua ndau-naka na lurina i Heruku, ngalangu-nanyaka haàtu anakeda mini, i Nahuru-ya na tamuna.

²³ Halaka nu i Heruku naluri-mapa 200 mbua ndaungu, dàngu nangala-manjapa da anana hawiangu.

²⁴ Ba 29 mbua ndau-naka na lurina i Nahuru, ngalangu-nanyaka anakeda mini, i Teraya na tamuna.

²⁵ Hàlaka nu i Nahuru naluri-mapa 119 mbua ndaungu, dàngu nangala-manjapa da anana hawiangu.

²⁶ Ba 70 mbua ndau-naka na lurina i Tera, ngala-nanjaka da anana ba dadua haàtuda, i Àmbaràmu, i Nahuru dàngu i Haràngu.

Da wàla wuana i Tera

²⁷ Yiada-haka da wàla wuana i Tera: i Tera amada i Àmbaràmu, i Nahuru dàngu i Haràngu. I Haràngu ninya na anana mini, i Lòtuya na tamuna.

²⁸ I Haràngu nameti la kotaku wikina la Uru, la tana Mbambilunia, ba naluri-ipa na amana.

²⁹ I Àmbaràmu na-kanoma-ya i Harai, tàka i Nahuru na-kanoma-ya i Miluka na anana kawini i Haràngu. I Haràngu ni-manyapa na anana mini haàtu, i Yikàhu-ya na tamuna.

³⁰ I Harai nambuta.

³¹ I Tera na-dunjaku-nya na paraingu Uru la Mbambilunia hi da-pakariangu dàngu i Àmbaràmu na anana, i Lòtu umbuku-na, dàngu i Harai na ri anana, na papaha-na i Àmbaràmu. Na pawuku-na ka kulaku la tana Kanaàngu wàna làti. Tàka ba datàka-ka la Haràngu, pa-engangu-danyaka lai nu.

³² Lai nu-mbuduka nameti ningu i Tera, 205 mbua ndauna na lurina.