BELINGU 1 - Na Huratu Matua

Pakirina

¹ Na mbuku yiana wotu-nanja da pulungu da pa-patàka-na i Muha la banjaru Ihirailu la rehi ba ninja la maràda telangu la Lolangu Yorundangu. Nuna na lolangu la pahunga loduna na Luku Yorundangu-ya, la lihina na paraingu Hupu, la manggawa paraingu Paràngu la hapapa hau, dàngu da paraingu Topilu, Lambàngu, Hahirutu dàngu Ndi-Hahàpu la hapapa hau. (

² Welingu la Palindi Hinai tàka la Kandihu-Mbarania pàlaku-ya la tana ma-palindingu la Endumu, hakambulu hau lodu bàdi ba lakunya.)

³ La kawunga lodu wulangu hakambulu hau la ndaungu papatu kambulu wàna kandai dunjaku-danya la Mehiru, patàka-nanjaka i Muha la banjaru nuna mbuu ndàbada da pa-paràhana i MIRI la papanii-nja nyuda.

⁴ Yiana matumbu ba na-hàlaka i Muha patalu-ya i Hihungu, hanganji tau Amori, na ma-pareta la paraingu Hehimbungu, dàngu i Onggu, hanganji Mbahàngu, na ma-pareta la parai - paraingu Àhitaròtu dàngu Endirei.

⁵ Ba tuna, la pahunga lodu Yorundangu la ngaba Muapu, pakiringu-nanyaka i Muha pa-palara-nja da uku - ukuna dàngu da pareta - paretana i MIRI. Napanii i Muha,

⁶ “Ba jiaya na ninda la Palindi Hinai, napanii i MIRI Ala, ‘Toma-mana-nyaka na mandaina bai ngiangu la palindi yiana.

⁷ Jiaduya, nyànggaru-hawa da maü terami dàngu lakuwa la pangia ma-palindingu tau Amori dàngu mbuu ndàbana na ngaba na maweli winggiru-nya, nu la Lolangu Yorundangu, la ngaba ma-patundungu dàngu ma-pamaràda-ngu, la ngaba mbara luru dàngu la hingi wara Tehiku Padua. Lakuwa kai mandapunya la tana Kanaàngu dàngu na ma-palindingu la Limbanongu lundu toma la luku bokulu Epuràtu.

⁸ Nyungga, MIRI, mbàda ràndimanggu-njaka da bokumi i Ambarahàmu, i Ihàku dàngu i Yakupu, dàngu na wàla wuada. Ba tuna lakuwa, kai mandapu-nyawa nuna na tana,’ ” wànanja.

I Muha ba nawotu hakimu

⁹ I Muha napanii-nya na banjaru Ihirailu, “Ba jiaya na ninda la Palindi Hinai, kupanii-manggaika nyimi: Mahema ndàbaya la pairu ngàndikai nyimi lalu mbotu-naka lai nyungga. Nyungga nda kumàka-apa paduku mehaya, nadu

¹⁰ i MIRI Alamu nabonja-kaika la padangu, hi hama dangu kandunu la awangu-kai.

¹¹ Màla àru i MIRI, Alada da boku la mangilu-mi natunggai bonjami lundu pa-harata wundangu, dàngu ka natukai banjaru ma-mbokaru hama tuna na pambàda ràndi-nanggai!

¹² Tàka nggiki wànggu-aka nyungga ba lalu pa-mehangu-nggu la paduku-ya na pahema wàngu na mambana mbotuna la pa-palànyapu ndàbanya na ma-kalutu lai nyimi?

¹³ Jiaduya nu, màlawa kai pindi tau mapira welingu la hau kabihu - hau kabihu mini manggàna, madangu kanandingu-na dàngu ma mbàda ndàmangu, ka kuwotu-ha la paliku-urunggai.

¹⁴ Nuna na pawuku mbàda kataku dàngu hàmu-mami-nyaka.

¹⁵ Jiaduya nu nyungga hi kupiti-ha da mini manggàna da mambàda ndàmangu, da pambàda pindimi welingu la kabihu - kabihu-mi, dàngu hi kuwotu-ha la paliku-urunggai nyimi. Ninja da mairu tau 1.000, hawiangu da mairu tau 100, da mairu tau 50 dàngu ningumbu mairu tau 10. Nyungga kuwotu-mbuha hawiangu da ina-ama kabihu-mi, wànanja.

¹⁶ La rehi nu nyungga ku-patanggu-nja: Tanara-maha da ma-pahili - pahilitu na matumbu la hongada da banjaru-mi. Wuanja botangu ma-deningu, ka ma-kalutu la angu banjaru-ami jàka ndia la tau hangàdangu na ma-ngiangu la hongami.

¹⁷ Na botangu-mi àmbu nambotu hapapa; màta haàtu - haàtu kai timbanya la lata ma-pahama, dàngu nda rekimi-nya jàka nggamuya. Àmbi mangàdatu-du jiapa nda nggamuya, nadu na-pabota-mi ba ma-pawelingu lai Alaya. Na hau palakara jàka lalu kalutu-na lai nyimi, ngàndiya lai nyungga, ka kubota-ya.

¹⁸ La rehina nunambu ba ku-paita-nggai ànda, màta jàka nggikina wàmi na pawàngu la mbuu ndàbana hawiangu na pawunda-mi,” wànanja.

Da ma-butingu da pa-paràhangu welingu la Kandihu-Mbarania

¹⁹ “Tunaka nu nunjuya na pareta-na i MIRI Alanda, dunjaku-ndanyaka la Palindi Hinai, hàla laku ndanyaka ba tali la maràda telangu na mambana nggailaru-na dàngu na ma-hawiru hanggangu la ngaba ma-palindingu pangia tau Amori. Ba jia-yaka na tàkanda la Kandihu-Mbarania,

^20-21 kupanii-nggai: Nàhu tàka-minyaka la ngaba ma-palindingu pangia tau Amori, na tana na pawua-nanda nyuta paraïna i MIRI Alanda dàngu na Alada da boku la mangilu-nda. Tàngaru, lai nuyaka nuna na tana. Lakuwa kai mandapu-nya hama tuna na lii pareta-na i MIRI. Àmbi hondaru-du dàngu àmbi mangàdatu-du, wànggu-nggai wàna.

²² Tàka nyimi imai lai nyungga papanii, ‘Nahàmu-pa ka ta-paràhangu tau mapira palua pabuti pàkunya nuna na tana ka pekuna nyuda ka dapeka-nda nyuta nggiya na ànda na marihi hàmu dàngu nggiki hamada da paraingu patàka tomanda napa,’ wàmi.

²³ Nuna na paniimi kuora-nya, jia-duyaka hi kupindi tau hakambulu madua, haàtu welingu la hau kabihu.

²⁴ Ka tama-danyaka na ngaba ma-palindingu hi da-lundungu tàka la Lolangu Ehikòlu, hi danjada-nya.

²⁵ Tunaka nu kabeli-danyaka lai nyuta ba dangàndi wua ai pahunggu-da lai nu, hi da-patàka-nda, nuna na tana pawua-nanda i MIRI Alanda lalu kamboka langatàka-ya.

²⁶ Tàka nyimi mipanda-ya na pareta-na i MIRI Alami, ba ndai bihu patama-nya nuna na tana.

²⁷ Tuna yia bai panii hoputu, ‘Karaü-manada eti i MIRI, tàka hi naluhu ngàndita welingu la Mehiru la pa-pajàma-nda la lima tau Amori pa-pameti-ta.

²⁸ Nggàra linguna ba talaku lai nàhu? Da tau pa-palewa-nda palua lai nàhu da-pa-mangàdatu-ta ba da-patàka-nda, na banjaru lai nu narihi kapàru dàngu narihi kaborangu-pa welingu lai nyuta, dàngu nyuda da-ngiangu la parai - paraingu matoma la awangu na kangeli-da. Da-itangu-maka tau mahama milimungga-ha lai nu!’ wàmi.

²⁹ Tàka nyungga: Àmbi mangàdatu-nja da tau nuda.

³⁰ I MIRI Alami napa nairu ngàndi-kai ba na-patarangu tunggumi nyimi hama tuna na pambàda hakahii wikimi la Mehiru

³¹ dàngu la maràda telangu. Miita-mayaka jàka nggiki hamana i MIRI Alami ba nangàndi mangu hàmunggai bai tundu ànda nàmu lundu tàka lai yiahu, ba nda hili hauna na haàtu ama na malunggu anana.

³² Tàka jiapa ka mbàda panii tunggu nu, ndedi-mapa nyimi miwaiya i MIRI Alami,

³³ na ma-mangilu mànunggai pahimbu-nggai ngia pa-pamaüngu-mi. Na-paita-nggai ànda la rudungu wàngu tandai epi, dàngu la lodu nawàngu tandai karumangu,” wànanja.

I MIRI nahuku-nya na Ihirailu

³⁴ “I MIRI narongu-ya na halimi ura dedi, hi nahàngga wànya. Harangu-nanyaka,

³⁵ ‘Nda haàtu-apa welingu la ndalaru akatu tungu yia napa matama-nya na tana na paràndi-nggunja da boku la mangilu-mi.

³⁶ Didi-aya i Kalipu anana i Yapuni napa na matama-nya, nadu ba na-manundu mànu lai Nyungga. Napa kuwua-nja i Kalipu dàngu wàlana nuna na tana na pambàda njadana.’

³⁷ Rukumi nyimi-maka nyungga hi nahàngga-mbungga i MIRI, ‘Muha, nyumumbu, ndau tama-anyapa na tana nuna.

³⁸ Na nyuna pa-bokulu-ya na etina na ma-karaha-kau, i Yuhua anana i Nungu. Nyunaka napa na matanggu iru ngàndiya na tau Ihirailu pawahi-ya nuna na tana,’ wànangga.

³⁹ Hàla i MIRI hi napanii dànda nyuta mbuu ndàbada, ‘Da anami, da makudu biapa la pa-kawàri-ya na mahàmu dàngu na ma-akatu, napa da pawàhi muhu ba wàmi nyimi, lai nyudaka napa na ngia pa-wuangu-ya na tana nuna, dàngu nyudaka napa ma-mandapu-nya.

⁴⁰ Tàka nyimi, lakuwa kai beli la maràda telangu, kai li ningu la ànda na ma-hanggangu la Njobu wai Akamba,’ wànanda.

⁴¹ Minapa-ya nyimi, ‘Muha, njala-manyaka lai MIRI. Nàhu nyuna laku-manyaka pa-pabera hama tuna na pareta-na i MIRI, Alanda,’ wàmi. Hàla ikawàra karinggatu palua pa-pabera, bai rekiya namuda-a jàka tahada-nya la ma-palindingu ba wàmi.

⁴² Tàka i MIRI napanii-ngga, ‘Àmbu puli-dunja la pa-pabera, nadu Nyungga ba nda kulaku karia-anja, napa natalu-maha duda paraï papada,’ wàna.

⁴³ Ku-patàka-nggainya na papanii-na i MIRI lai nyimi, tàka nyimi ndai wàrihu-aya. Kawutaru-ma-aminya hanggangu lai MIRI, bai wàngu katadaku-mi bai pajuru hanggangu la ma-palindingu.

⁴⁴ Hàla da tau Amori da ma-ngiangu la tana ma-palindingu luhu danyaka pa-rawaku-kai. Nyuda lalu mbana danguha, hama kabàba tawongu-ha. Ka yaulu-danggaika lundu tàka la Hòruma, hi da-pakàku-kai, la ma-palindingu la Endumu.

⁴⁵ Tunaka nu kabeli-minyaka dàngu hi mikarai pa-ndulangu lai MIRI, tàka Nyuna nda na-mbuhangu parongu jàka ndia nda na-mbuhangu paeti wànggai,” wànanja.

Da nda - ndaungu la maràda telangu

⁴⁶ “Tunaka nu dira mandaita ba ta-ndàdiku la Kandihu.