AMUHU 1 - Na Huratu Matua

¹ I Amuhu haàtu mini pawangu mbimbiya welingu la paraingu Takua. Nanjadi wunangu la rehi pareta-nanya na Yahunda paraïna i Hanganji Uhia, tàka na Ihirailu na pareta-ya paraïna i Hanganji Yerumbiamu anana i Yoàhu. Dàmbu ndaungu ba ndedipa natungu na hau na upungu, napanii-nya i Amuhu paraïna i Ala rukuda da manggàna-ya na Ihirailu.

² Yiana duyaka na papanii-na i Amuhu, “Na-kangaüku welingu la Tandula Hiungu i MIRI, nanggàngi na talia liina welingu la Yeruhali. Da maràda rumba da-katukuru, da rumba la Palindi Kàramilu damàdu marokutu,” wàna.

Na hukungu welingu lai Ala la nanggara - nanggara lihina na Ihirailu Hiria

³ Napanii i MIRI, “Mbàda panua-naingu-naka panjala na ma-ngiangu la Ndamàhiku, rukuna nuna jiangu-ma napa kuhuku-nja. Wàngu kanjupu mbana etiha ba da-palua-nja lima da tau Nggiliatu,

⁴ jia ba tuna napa ku-pangàndingu epi la umana i Hanganji Hahailu, dàngu hi hulu pambuta-ha da ngia patoru - ngia pa-torungu-na i Hanganji Mbenihandàtu.

⁵ Napa ku-weharu-ha da pindu bokulu-na na Ndamàhiku, dàngu kuwari pambuta-ha napa welingu la pangia-da da ma-ngiangu la Lolangu Awingu. Da maningu kawahangu la Mbetu-Endingu ku-papuru-nja napa welingu la kanjàka pareta-da, dàngu pa-tanawangu-ha napa da ma-ngiangu la Hiria hi dundilu-ha la tana Kiru,” wàna.

Pilitingu

⁶ Napanii i MIRI, “Mbàda panua-naingu-naka panjala na ma-ngiangu la Nggaha, rukuna nuna jiangu-ma napa kuhuku-nja. Mbàda dundilu-daka hau banjaru nggubulu-na hi da-padangga atanja la tau Endumu.

⁷ Jia ba tuna napa ku-pangàndi-nja epi da kangeli-na na Nggaha, hi hulu pambuta-ha da ngia patoru - ngia patorungu-na.

⁸ Napa ku-payila-nja da mangia-nya dàngu da maningu kawahangu la Àndutu dàngu la Àhakelungu. Na parai Ekurungu kuhuku-nya, tàka da marihi welingu la tau Pilitingu napa ku-patàlaru-ha,” wàna.

Tiruhu

⁹ Napanii i MIRI, “Mbàda panua-naingu-naka panjala na ma-ngiangu la Tiruhu, rukuna nuna jiangu-ma napa kuhuku-nja. Mbàda dundilu-daka hau banjaru nggubulu-na la ngia pa-tanawangu, hi dawua-ha la Endumu; mbàda pangga-danyaka na pa-njanjingu pa-mbuhangu.

¹⁰ Jia ba tuna napa ku-pangàndingu epi la kangeli-na na Tiruhu, hi hulu pambuta-ha da ngia patoru - ngia pa-torungu-na,” wàna.

Endumu

¹¹ Napanii i MIRI, “Mbàda panua-naingu-naka panjala na ma-ngiangu la Endumu, rukuna nuna jiangu-ma napa kuhuku-nja. Wàngu nda paaïngu-da mbàda kaluluku-danjaka da tau Ihirailu da angu dedida. Pangalangu-mananya na karaü etida, dàngu pa-daingu pa-umbingu-mada.

¹² Jia ba tuna, napa ku-pangàndingu epi la parai Temàngu, hi hulu pambuta-ha da ngia patoru - ngia pa-torungu-na na Mbòhura,” wàna.

Amungu

¹³ Napanii i MIRI, “Mbàda panua-naingu-manaka panjala na banjaru Amungu, rukuna nuna jiangu-ma napa kuhuku-nja. Ba da-pabera ka pa-nggàlairu-ya na tana ngabada, dahàli-ha da kambu kawini ma-pa-anakedangu la Nggiliatu.

¹⁴ Jia ba tuna, napa ku-pangàndingu epi la kangeli-na na parai Ramba, hi hulu pambuta-ha da ngia patoru - ngia pa-torungu-na. Parongu-ya napa la rehi nu na kanyaüru pa-hànjalungu, dàngu na-hambumbatu hama làpuru-ya, napa na pabera.

¹⁵ Pa-dundilu la ngia pa-tanawangu-ha napa na hanganji-da dàngu da liku uruda. Nyungga yia, MIRI mambàda panii,” wàna.