NA RUKUDA DA PA-PAHURUNGU 8 - Na Huratu Matua

¹ Nahàmu-mbu na etina i Hauluhu ba pameti tudanya nu. La lodu nunama ba pakiringu panya - nyaraya na kabungguru la Yeruhali, hi lupa mbuu ndàbana na tau na mapawai, hinggilu-da da pa-pahurungu hau iha - hau iha-naka la nggubulu tana Yundia dàngu Hamaria.

I Hauluhu ba na-pamayila-ya na kabungguru

² Da tau da ma-mangàdatu-nya i Ala datani-nya i Hitipanu, dàngu da hii paduduru-nya ba dira hawina-ha.

³ Tàka nutakungu-mananya i Hauluhu pa-palàjaru-ya na kabungguru. Na-nimbihu-ha da hau uma - hau uma hi na-ruruhu-ha la hambeli da tau pawai, hàla hi napuhi-ha la uma kapàtangu.

Na Lii Mànangu welingu lai Ala ba bobaru-ya la Hamaria

⁴ Da tau da mapawai da ma-paihangu da-bobaru-ya na Lii Mànangu welingu lai Ala la nggi - nggini.

⁵ I Pilipu nalaku la paraingu Hamaria hi na-bobaru-ya la tau lai nu rukuna na Hanganji Pa-mànangu na paràndi-na i Ala.

⁶ Ba darongu-yaka tau na papanii-na i Pilipu dàngu ba daita-haka da pa-hangàtarungu da pa-patumbu-na, nadangu welingu lai nyuda da ma-tanaü-ya jàka nggàraya na papanii-na i Pilipu.

⁷ Nadu ba daluhu-duka da wàndi akatu ba la - ladada welingu la tau dangu da pa-huruku wàndi akatu. Da tau kaliparu dàngu da tau kanjiku dadangu-mbu da pa-pamàlaru.

⁸ Da tau la Hamaria da-hawola langatàka.

⁹ La paraingu lai nu ninya na haàtu na tau mini na ma-tamungu Himungu, mbàda mandai-manaka ba na-pamaratangu-ya na tau Hamaria paraï ruku pinguna kabeli mata. Napeka-nja nyuda ba tau nda ningu hamangu-ya nyuna.

¹⁰ Mbuu ndàbana na tau la paraingu lai nu, nggubulu-na da-patingi hàlanya nyuna, “Na tau yiana jia-yaka na kapàru-na i Ala, ‘na Mambiha manyola’ ba wàndanya,” wàda.

¹¹ Mandai-manaka ba na-pamaratangu-ya na tau paraï ruku kabeli matana, jia-duyaka hi kanjupu eti wàdanya.

¹² Tàka i Pilipu na-bobaru-nja nyuda rukuna na Lii Mànangu jàka nggikina i Ala ba na-pareta ba hanganji-ya dàngu rukuna i Yehu Karitu, na Hanganji Pa-mànangu. Dawaiya na lii pa-patàka-na i Pilipu, hàla hi na-parunu-nja, – mini-yakai kawini-yakai.

¹³ Jiapa i Himungu-kadu napawai-mbu. Dàngu ba hàlaka pa-parunu-nya, kiku pangala madua-nanyaka i Pilipu. Da tanda mbiha da manjadi jia-mahaka da pa-hangàtaru wàna i Himungu.

¹⁴ Da pa-pahurungu la Yeruhali mbàda rongu-daka, da tau Hamaria da-kataku-yaka na pulu na i Ala. Jia-duyaka hi da-palewa-ha i Peturu dàngu i Yuhani lai nàhu.

¹⁵ Ba datàka-ka i Peturu dàngu i Yuhani, hi da-hamaya-nja tungguda da tau Hamaria, ka da-ngalangu Ngahuna i Ala,

¹⁶ nadu na Ngahuna i Ala ndedi haàtu-mapa pa-kuaha lai nyuda ngia pamaina, ba hina-apa parunu-nja la tamuna i Miri Yehu.

¹⁷ Hàla i Peturu dàngu i Yuhani da-padambaku-nja lima da tau Hamaria, hi da-ngalangu Ngahuna i Ala.

¹⁸ Nuna nu naita-ya paraïna i Himungu hi kiri wuanja Ngahuna i Ala nuda da tau, ba ruku pa-dambaku-danja lima paraï da pa-pahurungu. Tuna nuduka hi nangàndi-nja àmahu i Peturu dàngu i Yuhani.

¹⁹ Hi napanii, “Wuangga duku kuaha tungu nu, ka pekuna jàka ku-padambaku-nya lima ka lai nggamu biaya ka na-ngalangu Ngahuna i Ala,” wàna.

²⁰ Tàka nahema i Peturu, “Hanggàmaru-munyaka dàngu da àmahu-mu! Bau kakaya na pawua-na i Ala ràka pakei wàngu àmahu-ya?

²¹ Nda ningua hàkumu nyumu la pakiku-nya na paràma-ma nyuma, nadu na etimu nda na pa-deningu hanggangu lai Ala.

²² Jia ba tuna nu, dunjaku-nya nuna na pawuku-mu na ma-akatu, dàngu karaiya i Miri ka najàma-nya na kanandingu-mu na ma-akatu!

²³ Nadu ba kupi-manggau nyumu ba na-pakilitungu na etimu dàngu ba naata-nggau paraï ma-akatu,” wànanya.

²⁴ Hàla i Himungu hi nakarai-ha i Peturu dàngu i Yuhani, “Màla ndula àruka angu dedi ka àmbu ningu haumbu manggàna-ka welingu nudaka da papanii-mi,” wànanja.

²⁵ Tunaka nu ba dahàla-ka pa-hakahii-nya dàngu pa-bobaru-ya na puluna i Miri, beli-danyaka i Peturu dàngu i Yuhani la Yeruhali. Nàhu la ànda bobaru-madanya na Lii Mànangu la kota - kotaku Hamaria.

I Pilipu dàngu na haàtu na panggawi bokulu la Etiopia

²⁶ Na haàtu na papalewa-na i Miri napeka-nya i Pilipu, “Màla hadangu! Kau laku hu luru la ànda na ma-welingu la Yeruhali hanggangu la Nggaha,” wànanya. Na-malinggitu nuna na ànda.

^27-28 Ka laku-nanyaka i Pilipu. La rehi nu ninya na haàtu na panggawi la uma hanganji Etiopia, talànga nàhunya ba nabeli la tanana. Na tau nuna haàtu panggawi bokulu-ya, ba nyuna-duka na mahangga-nja da bandana i Kandaki, na hanganji kawini la Etiopia. Nyuna welina la Yeruhali palumu-nya i Ala, nàhu beli wàngu-nanyaka kareta-na. Ba dàngu mandapu-na nu la kareta-na, mbaha-nanyaka na mbukuna i Wunangu Yahaya.

²⁹ Na Ngahuna i Ala napeka-nya i Pilipu, “Lua kau lihinya na kareta,” wànanya.

³⁰ Ka lua-nanyaka i Pilipu hi nalihi-nya na kareta, hi narongu-ya na tau nuna ba mbaha-nanya na Mbukuna i Yahaya. Hi na-paàra-nya paraïna i Pilipu, “Màla mupinya nu umbu na pambaha-mu?” wànanya.

³¹ Nahema na tau nuna, “Nggiki hama pi-nggunyaka, jàka nda ningu ma-pakaloka-ngganya?” hi wàna. Ka wànda-nanyaka i Pilipu pahei la kareta, hi da-mandapu papera.

³² Yiadaha da ndalaru da pambaha-na, “Nyuna beri mbimbi pa-welingu la parupu-ya, beri ana mbimbi na manda kabia ba nggutinya na wulu ihina, tuna nu Nyuna ba nda ana wundana hau kareuku-na.

³³ Nyuna da-paaka-nya dàngu da-lapiya. Na lurina pa-butuhu-ya welingu la pinu tana hi lupa nda ningu-apa haàtu mapanii-ya na dedina,” wàna.

³⁴ Nuna na panggawi bokulu welingu la Etiopia napanii lai Pilipu, “Màla làti kau paniingga nggamuya duna na pawuku-na na wunangu? Panii-nanya na wai ngera wikina jàka ndia hi wai ngera haàtu?” wàna.

³⁵ Ka pakiringu-nanyaka pa-kareuku i Pilipu; na-pakiri wànja da ndalaru nuda kawai ba na-bobaru-ya na Lii Mànangu na rukuna i Yehu la panggawi bokulu nuna.

³⁶ Nàhu la padua ànda tàka-danyaka la hau pangia na maningu waingu. Napanii nuna na panggawi, “Tàngaru-ya nina na wai! Màla ningupa nu ma-pabetangu ka parunu-ngga nyungga?” wàna. [

³⁷ Napaya i Pilipu, “Umbu, jàka weli eti-madumu papawai, peku-manaka ka parunu-nggau,” hi wànanya. “Kuwaiya i Yehu Karitu ba Ana Alaya,” wànaka nuna na panggawi bokulu Etiopia.]

³⁸ Hi na-paràhangu papàtu-ya na kareta-na; tunaka nu puru-danyaka nyuda i Pilipu dàngu nuna na panggawi bokulu, datama la wai, tàka i Pilipu hi na-parunu-nya nyuna.

³⁹ Ba dadita-ka welingu la wai, pamuna-nanyaka i Pilipu paraïna Ngahuna i Ala, welingu lai nu. Na panggawi bokulu Etiopia nda naita-ayapa nyuna. Dàngu nggaüru etina na panggawi bokulu nuna pangala-nanyaka na àndana.

⁴⁰ Hi jia mbàda ni bianya i Pilipu la Àndutu. Dàngu ba na-pangala-nyaka na àndana, bobaru-nanyaka na Lii Mànangu rukuna i Yehu la mbuu ndàba paraingu lupa nataka la Kaiharia.